BIBLE THU BUL: “In nunna thu . . . lungkham suh u.”—Matthaia 6:25.

Eng tihna nge ni? Isua’n Tlâng Chunga Thusawiah hêng thute hi a sawi a. Bible dictionary pakhat sawi dân chuan, “lungkham” tia lehlin Grik thu mal hian “miin retheihna, ṭâmna, leh a nî tin nuna thleng harsatna dangte a chhân lêt dân pângngai tak” a kâwk thei a ni. Lungkhamnaah chuan nakin huna thleng mai thei thilte chungchâng ngaihtuah hahna a tel fo va. Kan tisa lam mamawh leh kan hmangaihte ṭhatna tûr ngaihtuah chu thil pângngai tak leh inâwm tak a ni. (Philippi 2:20) Mahse, Isua’n “lungkham suh u,” tia a sawi hian, a hnungzuite chu a lutuka lungngaihna—vawiin nun hlimna la bo thei khawpa naktûka thil lo thleng tûr a lutuka hlauhna—pumpelh tûrin thurâwn a pe a ni.—Matthaia 6:31, 34.

Tûn laiah a hman tlâk em? Isua thurâwn pêk zawm chu a finthlâk a ni. Engvângin nge? Lehkhabu ṭhenkhat chuan mi a lungkham lutuk hian, “ulcer te, lung natna te, leh asthma te” a neih phah thei niin a sawi.

Isua chuan a lutuka lungkhamna pumpelh chhan tûr ṭha tak a pe a ni: A lutuka lungkham chu a sâwt lo, tiin. “Nangni zîngah lungkham avângin tuin nge mahni dung lam tawng khata tisâng chuang thei?” tiin, a zâwt a. (Matthaia 6:27) Kan ngaihtuah hahna chuan kan nun a tihhmasâwn chu sawi loh kan sân zâwng chhe tê pawhin a belhchhah thei lo. Chu bâkah, kan hlauhthâwn angin thil a thleng ṭhîn lo bawk. Mi thiam pakhat chuan: “Nakin hun tûr ngaihtuah hah chu thil ṭangkai lo a ni a, nakin hun chu kan hlauhthâwn ang tlukin a chhe ngai mang lo,” tiin a sawi.

Engtin nge lungkhamna chu kan pumpelh theih? A hmasa berah chuan, Pathian rinchhan rawh. Pathian chuan savate chu châwmin, pangpârte mawi taka a thuam si chuan, an nuna amah biakna dah pawimawhtute mamawh chu a pe dâwn lo vem ni? (Matthaia 6:25, 26, 28-30) Pahnihnaah chuan, ni khat tân chauh ngaihtuah rawh. Isua chuan, “Atûk atân lungkham suh u, atûk chuan ama tân a lungkham chawp dâwn si a,” tiin a sawi. “Ni khat atâna ni khat hrehawm chu a tâwk a ni,” tih chu i pawm dâwn lâwm ni?—Matthaia 6:34.

Isua thurâwn pêk fing tak ngaihsakna hmangin, tisa lama chhiatna kan pumpelh thei a. Chûng zawng ai pawhin, Bible-in “Pathian thlamuanna” tia a sawi, chhûngrila thlamuanna chu kan nei ang.—Philippi 4:6, 7. ▪ (wp16.01-E)