Bebe-i chuan a pa a ngaina hle a. Chu hnemna thu chu an chhûngkaw ṭhian ṭha tak hnên aṭanga a hriat mah ni se, thlamuanpui ahnêkin rilru nat nân a hman phah ta zâwk a ni. “A thih hi ka tâna ṭha ber tûr a ni lo asin,” tiin a phun neuh neuh ṭhîn a. Kum tam tak a liam hnua Bebe-i’n lehkhabua chu thil a thlen dân a han chhiar chuan, a pa chu a la sûn reng tih a chiang ta hle a ni.

Bebe-i hriatthiam tâk ang khân, ṭhenkhat tân a bîk takin a hmangaih tak a nih hian lusûnna tuar chhuah nân hun a duh rei lehzual a ni. Bible chuan thihna chu “hmêlma hnuhnûng ber” tiin inchawih takin a târ lang a. (1 Korinth 15:26) Thihna chuan rin loh takin kan chungah thla a zâr ṭhîn a, dan theih rual lohvin kan hmangaih takte nun a la ṭhîn. Thihna do hneh thei tumah kan awm lo. Chuvângin, thihna leh a nghawngte tawrh dân kan thiam lo chu thil mak a ni hran lo.

Heti hian i lo ngaihtuah tawh mai thei: ‘He lusûn khaw harna reh tûrin hun engtia rei nge ngai? Engtin nge mi chuan a lusûnna chu a hmachhawn theih? Engtin nge lusûntute chu ka thlamuan theih ang? Kan hmangaih tak thi tawhte tân beisei tûr engemaw tal a awm em?’ tiin. (wp16.03-E)