Rei lo te chhûng i na tawh ngai em? I ṭhat chhuah leh nghâl avângin a hrehawmna i theihnghilh der pawh a ni thei. Mahse, lusûnna chu chutiang a ni ve lo. Dr. Alan Wolfelt-a chuan Healing a Spouse’s Grieving Heart tih a lehkhabuah chuan, “Lusûnna hi ‘reh’ tih a awm thei lo,” tiin a ziak a. Mahse: “I lusûnna chu khua rei hnuah leh mi dangte ṭanpuinain a zia awm ang,” tiin a sawi belh a ni.

Entîrna atân, thlahtu Abrahama’n a nupui a sûn dân kha han ngaihtuah teh. Bible chuan, “Abrahama chuan Sari sûnin a ṭah ṭan ta a,” [New World Translation] tiin a sawi. Heta “ṭan” tih ṭawngkam hian a lusûnnain hun engemaw chen a awh dâwn tih a târ lang a ni. * Entîrna dang chu, a fapa Josefa sakawlhin a sehhlum tia bum tâwk Jakoba a ni a. Ani chuan “ni rei tak” sûnin, a chhûngkaw zînga mite’n an thlamuan thei lo va. Kum tam tak a liam hnuah pawh, Josefa thihna chu a rilruah a la vei reng a ni.—Genesis 23:2; 37:34, 35; 42:36; 45:28.

Tûn laiah pawh an mi ngainat tak chântu tam tak chuan chutiang tho chuan an sûn a. A hnuaia entîrna pahnihte hi ngaihtuah ang che.

• “Ka pasal Robert-a chuan July 9, 2008-ah min boralsan a. Accident a tawh tûk chuan ni dang ang bawkin engkim a thleng a. Zîng chaw ei khama hna thawk tûra a chhuah hma chuan kan tih ṭhin dân angin, kan infâwpin, kan inpawm a, ‘Ka hmangaih che,’ tiin kan inhrilh a. Kum ruk a liam hnuah pawh ka thinlung chu a la na reng a ni. Ka pasal Robert-a ka chânna chu a reh theih ka ring lo.”—kum 60 mi, Gail-i.

• “Ka nupui duh tak tel lovin kum 18 aia tam khawsa tawh mah ila, ani chu ka ngaiin, ka la sûn reng a ni. Thil siam duhawm tak ka hmuh apiang hian ka hre chhuak ṭhîn a, ka thil hmuhte hmu ve se chuan, engtin tak awm ang maw tiin ka ngaihtuah ṭhîn.”—kum 84 mi, Etienne-a.

Chutianga rei tak rilrua tawrhna neih chu thil pângngai tak a ni tih a chiang hle. Mi tinin sûn dân kawng an nei ṭheuh va, mi dangte lusûn dân sawisêl chu thil finthlâk a ni lo. Chutih rual chuan, sûn lutuk anga kan lan avânga mahni inthiam lohna chu kan pumpelh a ngai mai thei. Engtin nge lusûnna chu kan tawrh theih ang? (wp16.03-E)