A KAWM THU | HMANGAIH TAKIN MIN BORALSAN HIAN
Lusûnna Hmachhawn Theih Dân
He mi chungchângah hian thurâwn tam tak a awm a. Mahse, a ṭangkai vek lo. Entîr nân, mi ṭhenkhat chuan ṭap lo tûr emaw, i tawrhzia engti kawng maha lantîr lo tûr emawin thurâwn an pe mai thei che a. Mi dangte erawh chuan ṭap chhuak a, rilrua i vei zawng zawngte leihbaw tûrin an fuih mai thei bawk che. Bible erawh chuan tûn lai zir chîkna nêna inmil thlîr dân inbûk tâwk tak a târ lang a ni.
Hnam ṭhenkhat chuan ṭah hi mipa tâna thiltih chi lovah an ngai a. Mittui tlâk chu, mipui hma pawh ni hial mah se, thil zahthlâk anga ngaih chhan tûr a awm tak zet em? Rilru sûkthlêk dân zirtu mithiamte chuan mittui tlâk chu lusûnna pângngai tak a ni tih an pawm a. I chânna chu nasa hle mah se, chutianga sûnna chuan a hnuah tuar thei tûrin a ṭanpui thei che a ni. Mahse, intipachanga lusûnna lan chhuahtîr lohna chuan ṭhatna aiin chhiatna a thlen thei zâwk a. Bible chuan lusûn avânga mittui tlâk hi thil dik lo emaw, a pâ lohthlâk emaw anga ngaih chu a thlâwp lo. Entîr nân, Isua Johana 11:33-35.
chungchâng hi han ngaihtuah teh. A ṭhian Lazara a thih khân, mitthite kaitho tûrin thiltihtheihna nei mah se, Isua chu a ṭap tho!—Lusûnnaah hian thinur taka ân vakna a tel ṭhîn a, a bîk takin sâr thi a nih hian a tel duh lehzual a ni. Lusûntu chuan thinur theih chhan tûr tam tak a nei thei a, chu chu mi zahkai tak pakhatin ngaihtuahna nei lêm lova thu bulbâl nei lo a sawi hian a ni ṭhîn. South African rama awm Mike-a chuan: “Ka pa a thih hian kum 14 mi chauh ka ni a. A vuinaah chuan Anglican kohhran rawngbâwltu chuan Pathianin mi ṭhate chu a mamawh a, a la hmasa ṭhîn tih a sawi a. * Ka pa chu kan la mamawh êm avângin, chu thusawi chuan min tithinur hle. Kum 63 a liam hnu, tûnah pawh hian ka rilru a la na reng a ni,” tiin a sawi.
Inthiam lohna chungchâng hi eng nge ni ve? Beisei lo taka thihna a thlen hian lusûntu chuan, ‘Heti hian, a nih loh leh chuti chuan lo ti ta ila, he thil hi a thleng lo tûr,’ tiin a ngaihtuah fo mai thei a. A nih loh leh, mitthite nêna in inhmuh hnuhnûn berah chuan in inhnial pawh a ni thei bawk. Chu chuan i inthiam lohna a belhchhah thei a ni.
Chutiang inthiam lohna leh thinurna ang chi i nei a nih chuan, chhûngrila thup bo reng loh chu thil pawimawh tak a ni a. Thup bo ai chuan, i thusawi ngaithla a, lusûn tam takte tân chutiang ngaih dân âtthlâk tak neih chu thil pângngai tak a nih thu hrilha thlamuan theitu tûr che i ṭhian hnênah hrilh zâwk rawh. Bible chuan: “Ṭhian chuan englai pawhin a hmangaih reng a, mangan nî atân unauva piang a ni,” tih min hriattîr a ni.—Thufingte 17:17.
Lusûntu neih theih Ṭhian ṭha ber chu, min Siamtu Pathian Jehova a ni a. “Anin a ngaihsak ṭhin che” avângin ṭawngṭaiin a hnênah i thinlung leihbua ang che. (1 Petera 5:7) Chu bâkah, chutianga titu zawng zawngte ngaihtuahnate leh rilru veizâwng chu “Pathian thlamuanna, rilru rêng rênga hriat sên loh” hian a tihdamsak dâwn tih a tiam a ni. (Philippi 4:6, 7) Tin, Pathianin a thlamuanna Thu, Bible hmanga a tihdamna che chu pawm bawk rawh. Mi thlamuan thei Bible chângte chu ziak chhuak ang che. ( Bâwm en rawh.) Chûng zînga tlêm azâwng chu by heart i duh hial mai thei bawk. Chutianga ngun taka ngaihtuah tûr neih chu mahni chauhva i awm hunah leh zâna i muthilh theih loh hunah a ṭangkai lehzual thei ang.—Isaia 57:15.
Tûn hnai mai khân, kum 40 mi, Jack-a tia kan koh mai chuan a nupui duh tak chu cancer avângin a chân a. Ani chuan mal ngawih ngawih nia inhriat châng a nei tih a sawi. Mahse, ṭawngṭainain a ṭanpui a ni. “Jehova hnênah ka ṭawngṭai hian, mal nia inhriatna ka nei lo. Zâna ka ṭhangharh hian, ka muhîl leh thei tawh ṭhîn lo va. Bible-a thu thlamuanthlâk takte ka chhiara ngun takin ka ngaihtuah hnua ṭawngṭaia thinlunga ka veite ka leihbuak hnu chuan, ka rilru leh thinlung chu a hahdamin ka thla a muang a, ka muhîl leh thei ta ṭhîn a ni,” tiin a sawi.
Nula Vanessa-i chuan damlohna avângin a nu a chân a. Ani pawhin ṭawngṭaina thiltihtheihzia chu a tawng ve a ni. “Ka harsat hun lai ber chuan Pathian hming lamin ka ṭap chhuak hial a. Jehova chuan ka ṭawngṭaina ngaithlain, ka mamawh chakna min pe ṭhîn,” tiin a sawi.
Lusûnna lama thurâwn petu ṭhenkhat chuan lusûntute chu mi dangte ṭanpuinaa tel tûr, a nih loh leh tualchhûng tlâwmngaia thiltih ṭhenkhata an hunte hmang tûrin an râwn a. Chutianga tihna chuan lusûntu chu hlimna leh rilru hahdamna a thlen thei a ni. (Tirhkohte 20:35) Lusûn ngai tawh Kristian tam tak chuan, mi dangte an ṭanpuinain thlamuanna nasa tak a thlen tih an hria a ni.—2 Korinth 1:3, 4. (wp16.03-E)
^ par. 5 Hei hi Bible zirtîrna a ni lo. Bible chuan kan thih chhan thil pathum a târ lang.—Thuhriltu 9:11; Johana 8:44; Rom 5:12.