Bible ang hi sakhaw lehkhabu dang a awm lo va. Bible anga hun rei tak chhûng mi tam takte rinna siamtu lehkhabu dang lah a awm hek lo. Kawng lehlamah chuan, Bible tluka bih chian hlawh leh sawisêl hlawh lehkhabu dang a awm lo bawk.

Entîr nân, Bible lama mi thiam ṭhenkhat chuan tûn laia Bible-te hi atîra ziak aṭanga ziak chhâwn rin tlâk tak a nih an ring lo va. Sakhaw lam chanchin zirtîrtu professor pakhat chuan: “Atîra lehkha ziak hi a nihna tûr dik takin kan rem tih kan chiang ngawt thei lo. Tihsual tam tak nei a copy-te chauh kan nei a, chûng zînga a tam zâwk chu atîra ziakte ziah zawh hnu kum zabi tam taka siam a ni a, kawng tam takin atîra ziak nên chuan a inang lo,” tiin a sawi.

Mi dangte chuan an sakhaw vawnte avângin Bible a dikna chu an sawisêl a. Entîr nân, Faizal-a chu Kristian ni lo a chhûngte chuan Bible chu lehkhabu thianghlim a ni a; mahse, tihdanglam a ni tawh tih an zirtîr a. Ani chuan: “Chuta ṭang chuan, mite’n Bible chungchâng min hrilh an duh hian rinhlelhna engemaw tak ka nei,” tiin a sawi. “Tihah chuan, atîra ziak Bible an nei tawh lo va. Bible chu tihdanglam a ni tawh si a!”

Bible tihdanglam a nih leh nih loh chu thil pawimawh a ni em? Hêng zawhnate hi han ngaihtuah teh: Nakin hun tâna Bible thutiam thlamuanthlâk takte chu atîra ziakah a awm leh awm loh hre lo ta la, chûng thutiamte chu i ring thei ang em? (Rom 15:4) Tûn laia Bible-te hi tihsual tam tak nei mihringte ziak chhâwn mai ni ta se, Bible thu bulte chu i hnathawh tûr te, chhûngkua te, a nih loh leh biaknate chungchânga thu tlûkna pawimawh takte siam nân i hmang ngam ang em?

Atîra ziak Bible-te chu hmuh theih ni tawh lo mah se, kutziak Bible bu sâng tam takte pawh tiamin, hmân lai copy-te chu kan râwn thei a. Engtin nge chûng kutziak Bible-te chu ṭawih chhiatna te, dodâlna te, leh a thuziak tihdanglam tumnate laka a dam khawchhuah? An dam khawchhuahna chuan tûn laia i neih theih Bible chu a dik a ni tih engtin nge a rintîr che? Chûng zawhnate chhânna chu a dawta dam khawchhuahna chanchinah ngaihtuah a ni ang. (wp16.04-E)