Bible chu a dam khawchhuak a. Chuvângin, tûn laiah i nei theiin, i chhiar thei a ni. Bible lehlin ṭha pakhat i thlan hian, atîra ziak aṭanga ziah chhâwn rin tlâk tak i chhiar a ni tih i chiang thei a ni. * Mahse, engvângin nge Bible chuan amaha ṭawih chhiatna te, nasa taka dodâlna te, leh a thuchah tihdanglam luih tumnate a tuar chung pawha mak taka a dam khawchhuah fo ṭhin? Chu lehkhabu a danglam bîkna chu eng nge ni?

Bible zirlai tam tak chuan: “Pathian Lehkha Thu zawng zawng hi Pathian thâwk khuma pêk a ni,” tia ziaktu tirhkoh Paula thu tâwp siam ang chu an siam a. (2 Timothea 3:16) Anni chuan Bible chu Pathian Thu danglam bîk tak a nih avâng leh tûn thlenga Pathianin a vawn ṭhat avânga dam khawchhuak a nih an ring a ni. He thuziak inzawm hmasa bera kan sawi tâk Faizal-a chuan, a tâwpah chuan Bible zirna hmangin chûng sawisêlnate chu mahni ngeia fiah a tum ta a. A fiah hnua a thil hmuh chhuah chu mak a ti hle. Kristianna rama hluar êm êm zirtîrna tam tak chu Bible-ah a tel lo tih a hre ta thuai a. Chu bâkah, Pathian Thu-a târ lan leilung atâna Pathian thiltum chuan a thinlung a khawih hle bawk.

Ani chuan: “Tûnah chuan, ka Bible neih hi Pathian thilpêk a ni tih ka ring tlat tawh. Tihah chuan, Pathianin lei leh vân a siam theih chuan, lehkhabu pakhat chu min pe theiin, kan tân a vawng ṭha thei dâwn lâwm ni? A vawng ṭha thei dâwn lo anga ka sawi chuan, Pathian thiltihtheih chin tâwk ka siamsak a ni ang. Engkimtitheia thiltihtheihna chin tâwk siamsak tûrin tu nge maw ka nih le?” tiin a sawi a ni.—Isaia 40:8. ▪ (wp16.04-E)