1, 2. Engtin nge Paula chuan Pathian khawngaihna avânga a lâwmzia a târ lan?

TIRHKOH Paula chuan: “[Pathian] khawngaihna mi pêk chu athlâwnin a awm lo,” tiin a sawi thei a. (1 Korinth 15:9, 10 chhiar rawh.) Pathian zahngaihna chu a hlawh chhuak lo va, a phû hek lo tih a inhre chiang hle a ni. Kristiante tiduhdah ṭhîntu a ni si a.

² A nun tâwp dâwn lamah, Paula chuan Timothea hnênah: “Mi tichaktu Krista Isua kan Lalpa hnênah chuan lâwmthu ka sawi a ni, . . . a rawngbâwltua mi ruat tâk avâng hian,” tiin a ziak a. (1 Timothea 1:12-14) Chu chu eng rawngbâwlna nge ni? Paula chuan Ephesi khuaa kohhran upate hnênah: “Ka tlânsiakna kawng ka hmabâk hlen tûr leh, Pathian khawngaihna chanchin ṭha hriattîr tûr, Lalpa Isua hnênah kha mi rawngbâwl hna ka hmuh kha thawk zo phawt ila, ka nun pawh thlâkhlelh tlâkah ka ruat lo ve,” tiin a hrilh a ni.—Tirhkohte 20:24.

3. Paula chu eng rawngbâwlna hlu tak nge pêk a nih? (A thupui chunga milem en rawh.)

³ Paula’n eng “chanchin ṭha” nge a hrilh a, chu chuan engtin  nge Jehova khawngaihna a târ lan? Paula chuan Ephesi khuaa Kristiante hnênah: “Nangni tân Pathian khawngaih enkawlna hna mi pêk kha in lo hre tawh châwk ang,” tiin a hrilh a ni. (Ephesi 3:1, 2) Isua chuan Paula chu Juda mi ni lote hnêna chanchin ṭha hril tûrin a hrilh a. Tûnah chuan Jentailte pawh Messia rorêlna Lalram sawrkârnaah an tel thei tawh a ni. (Ephesi 3:5-9 chhiar rawh.) Paula chuan ṭhahnemngai taka thu hrilin, tûn laia Kristiante tân entawn tûr ṭha a siam a. Pathian khawngaihna chu atân “athlâwnin a awm lo” tih a târ lang a ni.

4, 5. Engvângin nge “Ram chanchin ṭha” chu “Pathian khawngaihna” chanchin ṭha nên a inang kan tih theih?

⁴ Tûn tâwpna hunah hian, Jehova mite chuan ‘Ram chanchin ṭha chu hnam zawng zawng hriattîrna tûra khawvêl zawng zawnga’ hril tûrin mawhphurhna an nei a. (Matthaia 24:14) Ram chanchin ṭha chu “Pathian khawngaihna chanchin ṭha” a ni bawk. Chu chu engtin nge a nih theih? Pathian Rama kan dawn tûr malsâwmna zawng zawng chu Jehova khawngaihna vâng a ni a. (Ephesi 1:3) Paula chuan ṭhahnemngai taka thu hrilin Jehova khawngaihna avânga a lâwmzia a târ lang a ni. A entawn tûr siam chu kan entawn em?—Rom 1:14-16 chhiar rawh.

⁵ Thuziak hmasaah khân, mi sual ni mah ila, kawng tam taka Jehova khawngaihna kan hlâwkpui theih dân kan zir tawh a. Kan hlâwkpui nasat êm avângin, Jehova’n hmangaihna a lantîr dân leh chu mi an hlâwkpui ve theih dân chu mi dangte zirtîr tûrin mawhphurhna kan nei a ni. Eng kawngin nge mi dangte chu Pathian khawngaihna avânga lâwm tûra kan ṭanpui theih?

6, 7. Mite hnêna tlanna chungchâng kan hrilhfiah hian, engtin nge Pathian khawngaihna chanchin ṭha chu kan hril?

⁶ Tûn laiah thil sual ti mi tam tak chuan inthiam lohna an nei tawh lo va; chuvângin, mihringte’n tlanna an mamawh chhan an hre thiam lo. Chutih rual chuan, an nun dânin hlimna a thlen lo tih hria an tam tawlh tawlh a ni. Mi tam tak chuan Jehova Thuhretute’n an hrilh hma chuan, sual nihna te, sualin min nghawng dân te, leh sual bâwih ata zalên tûra kan tih ngaite chu an hre lo. Sual nihna an hriatthiam hnu chuan, mi rilru ṭhate chuan Jehova’n sual leh thihna ata min chhuah zalên tûra a Fapa leia a rawntîr chu an lâwm hle a. Chutianga a rawn tirh chhan chu Jehova hmangaihna nasa tak leh a khawngaihna vâng a ni.—1 Johana 4:9, 10.

⁷ Paula’n: “A thisen avângin amahah chuan kan tlanna kan nei a ni—a khawngaihna ngahzia ang zêla kan bawhchhiatnate ngaihdamna chu,” tia Pathian Fapa duh tak chungchâng a sawi hi chhinchhiah ang che. (Ephesi 1:7) Krista tlanna inthawina chu Pathian min hmangaihzia târ lanna ropui ber a ni a, A khawngaihna nasatzia pawh a târ lang a ni. Isua inthawina kan rin chuan, kan sualte ngaihdam niin, chhia leh ṭha hriatna thiang tak kan nei ang tih hriat chu a va thlamuanthlâk tak êm! (Hebrai 9:14) Chu chu mi dangte hnêna hrilh tûr chanchin ṭha a ni chiang hle!

8. Engvângin nge sual nei mihringte tân Pathian nêna inrem leh a ngaih?

⁸ Mite’n Isua inthawina an rin loh chuan, Pathianin anni chu hmêlma angin a thlîr a. Chuvângin, Pathian ṭhian an ni thei tih hrilh  tûrin mawhphurhna kan nei a ni. Tirhkoh Johana chuan: “Tupawh Fa ring apiangin chatuana nunna an nei tawh; nimahsela tupawh Fa thu âwih lo apiangin nunna an nei lo vang a, Pathian thinur an chungah a awm reng zâwk a ni,” tiin a ziak a. (Johana 3:36) Krista inthawina chuan Pathian ṭhian ni thei tûra min siam avângin kan lâwm thei a ni. Paula chuan heti hian a sawi a ni: “Nangni hmâna in thiltih sualnaah khân ama lakah ṭhenin in lo awm a, in rilruah chuan a hmêlma in lo nih bawk kha, nimahsela tûnah zawng, . . . a thihnain a tisa taksaah chuan amah nên a inremtîr tawh che u a ni,” tiin.—Kolossa 1:21, 22.

9, 10. (a) Krista chuan hriak thih a unaute chu eng mawhphurhna nge a pêk? (b) Engtin nge “berâm dang” chuan hriak thihte an ṭanpui?

⁹ Krista chuan leia hriak thih a unaute chu “inremna rawngbâwl hna” a pe a. Paula chuan an hnênah: “Engkim Pathian hnên ata chhuak a ni a; ani chuan Krista avângin amah nên inremin min siam a, inremna rawngbâwl hna min pe a; khatia, Pathianin Kristaah chuan khawvêl hi amah nên inremin a siama an bawhchhiatnate chu bawhchhiatnaa ruatsak lovin, inremna thu min kawltîr kha. Chutichuan Krista aia palai kan ni a, Pathianin keimahni min hmangin a ngên chiam che u tih theih a ni; ‘Pathian nên lo inrem rawh u,’ tiin Krista aiah kan ngên che u a ni,” tiin a hrilh a ni.—2 Korinth 5:18-20.

¹⁰ “Berâm dang” tân he rawngbâwlnaa hriak thihte ṭanpui chu chavo hlu tak a ni a. (Johana 10:16) Krista thuchah kengtute an nih angin “berâm dang” chuan thu hrilh rawngbâwlna hna ropui ber thawkin mite thutak an zirtîr a, Jehova nêna inlaichînna ṭha nei tûrin an ṭanpui a ni. Chu chu Pathian khawngaihna chanchin ṭha hrilhna pêng pawimawh tak a ni.

11, 12. Engvângin nge mite’n Jehova hnêna an ṭawngṭai theihzia hriat chu chanchin ṭha a nih?

¹¹ Mi tam tak chu ngaihṭhatna a neihtîr avângin an ṭawngṭai a; mahse, Pathianin an ṭawngṭaina a ngaithlâk tak tak an ring lo. Chuvângin, Jehova chu “ṭawngṭaina ngaithlatu” a ni tih an hriat a ngai a ni. Fakna hla phuahtu Davida chuan: “Aw ṭawngṭaina ngaithlatu, i hnênah tîsa zawng zawng chu an lo kal ang. Khawlohnate chuan mi hneh ṭhîn nâ a: kan bawhchhiatnate zawng nangin i tlêng fai ang,” tiin a ziak a ni.—Sâm 65:2, 3.

¹² Isua’n a zirtîrte hnênah: “Ka hminga engpawh in dîl chuan, chu chu ka ti zêl ang,” tiin a hrilh a. (Johana 14:14 Parallel Bible) Jehova duhzâwng nêna inmil “engpawh” ṭawngṭaiin kan dîl thei tihna a ni. Johana chuan: “Hei hi ama chunga kan huaina chu a ni, engpawh a duhzâwng anga kan dîl chuan anin min ngaihthlâksak ṭhin hi,” tiin a ziak a. (1 Johana 5:14) Ṭawngṭaina chu ngaihṭhat nân mai ni lovin, Jehova “khawngaihna lalṭhuthlêng” hnaih theihna a ni tih hre thiam tûra mite ṭanpui chu a va ṭha tak êm! (Hebrai 4:16, C.L Re-edited) Mite chu ṭawngṭai dân tûr, ṭawngṭaina tûr, leh dîl tûr dik tak kan zirtîr hian, Jehova ṭhian ni tûr leh hrehawm an tawrh huna thlamuanna hmu tûrin kan ṭanpui tihna a ni.—Sâm 4:1; 145:18.

13, 14. (a) Hriak thihte’n nakinah eng chanvo ropui tak nge an neih dâwn? (b) Hriak thihte chuan mihringte tân eng thil ropui tak nge an tih ang?

¹³ Jehova chuan a khawngaihna chu “hun lo la thleng tûrahte chuan” a lantîr lehzual ang a. Engtin nge a lantîr ang? Krista nêna vân rorêltu tûr mi 144,000-te hnênah chuan chanvo ropui tak a pe ang. Paula chuan, chu chanvo  chu: “Pathian chuan khawngaihna a ngahin a mi hmangaihna nasa tak avâng khân, kan bawhchhiatnate avânga thi kan nih lai meuh pawhin Krista rualin min tinung ve a, (Khawngaihnaa chhandam in ni ta e,) Krista Isuaah chuan ama rual vêka min kai thovin, vân hmunahte ama hnênah min ṭhuttîr ta a: chutichuan hun lo la thleng tûrahte chuan Krista Isuaah hian kan chungah ngilneiin a khawngaihna ngah nasatzia chu a entîr thei ang,” tia ziakin a hrilhfiah a ni.—Ephesi 2:4-7.

¹⁴ Vâna Krista nêna ro an rêl huna hriak thih Kristiante neih tûr Jehova buatsaih thil ropui takte mitthla chu a harsa hle a. (Luka 22:28-30; Philippi 3:20, 21; 1 Johana 3:2) Jehova chuan an chungah kawng danglam bîk takin “a khawngaihna ngah nasatzia chu a entîr” ang. Anni chu “Jerusalem Thar,” Krista mo an ni ang a. (Thu Puan 3:12; 17:14; 21:2, 9, 10) ‘Hnam tinte tihdamnaah’ Isua an thawhpui ang. Mihringte chu sual leh thihna phurrit ata chhuah zalên tûr leh mi ṭha famkim ni tûrin an ṭanpui bawk ang.—Thu Puan 22:1, 2, 17 chhiar rawh.

15, 16. Engtin nge nakin hunah Jehova’n a khawngaihna chu ‘berâm dangte’ chungah a lantîr ang?

¹⁵ Ephesi 2:7 chuan, Pathianin khawngaihna chu “hun lo la thleng tûrahte chuan” a lantîr ang tih a sawi a. Chutih hunah chuan, leia mi tinte chuan “a khawngaihna ngah nasatzia chu” an hmu ngei ang. (Luka 18:29, 30) ‘Thlân’ aṭanga mitthite thawhlehna chu Jehova’n leia mite chunga a khawngaihna lantîrna ropui ber zînga pakhat a ni ang. (Joba 14:13-15; Johana 5:28, 29) Tute nge tholeh ang? Krista thih hmaa thi mi rinawm a hmei a pate leh ni hnuhnûng chhûnga Jehova chunga rinawm taka thi ‘berâm dangte’ chu an tholeh ang a. Chûng mi rinawm zawng zawngte chu Jehova rawngbâwl zawm zêl tûra kaihthawh an ni ang.

¹⁶ Pathian hre lova thi, mi maktaduai dang tam takte pawh an tholeh bawk ang. Johana chuan: “Mitthite, alian atein, lalṭhutphah  hmaa ding ka hmu a; tin, lehkhabute an hawng a; tin, lehkhabu dang, Nunna Bu chu an hawng bawk a; tin, mitthite chu lehkhabutea ziak an thiltih ang zêla rêlsakin an awm ta a. Tuifinriat chuan a chhûnga mitthi awmte chu a chhuahtîr a, Thihna leh Mitthi khua chuan an chhûnga mitthi awmte chu an chhuahtîr bawk a; tin, mi tin an thiltih ang zêla rêlsakin an awm ta a,” tiin a ziak a ni. (Thu Puan 20:12, 13) Mitthi tholehte chuan a rorêlna pawm tûrin Jehova chungchâng zir theihna hun remchâng an nei ang a. Anni chuan Bible thu bulte zirin an nunpui ang a, “lehkhabutea” chuang kaihhruaina tharte an zâwm bawk ang. Chûng kaihhruaina tharte chu Jehova’n a khawngaihna a lantîr dân kawng dang a ni ang.

17. Thu hrilh rawngbâwlnaa kan tel huna kan hriat reng tûr chu eng nge ni?

¹⁷ Tâwpna kan hnaih tawh êm avângin, tûn hma zawng aiin Lalram chanchin ṭha kan hrilh chu a pawimawh lehzual a! (Marka 13:10) Thu kan hrilh hian kan tum ber chu Jehova chawimawi a ni tih kan hre reng tûr a ni. Engtin nge kan chawimawi theih? Khawvêl thara kan dawn tûr malsâwmna zawng zawngte chu Jehova khawngaihna ropui tak vâng a ni tih mite kan hrilh tûr a ni.

18, 19. Engtin nge Jehova khawngaihna chu kan chawimawi?

¹⁸ Mite hnêna thu kan hrilh hian, Krista Lalramin ro a rêl hun chuan mihringte’n tlanna avânga hlâwkna zawng zawng dawngin, zawi zawiin an ṭha famkim ang tih kan hrilh thei a. Bible chuan: “Thil siam zawng zawngte ngei pawh chu chhiatna bâwih ata tihchhuahin an awm ang a, Pathian fate zalênna ropuiah chuan an lût dâwn si a,” tiin a sawi. (Rom 8:21) Chu chu Jehova khawngaihna avâng chauhva neih theih a ni ang.

¹⁹ Mite hnênah chuan Thu Puan 21:4, 5-a thutiam phûrawm tak hriattîr theihna chanvo kan nei a ni: “[Pathianin] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tih hi. Chu bâkah, lalṭhutphaha ṭhu, Jehova chuan: “Ngai teh, thil engkim ka siam thar e,” a ti a. “Ziak rawh, hêng thu hi a rinawmin a dik si a,” tiin a sawi bawk a ni. He chanchin ṭha hi ṭhahnemngai taka mi dangte hnêna kan hrilh hian, Jehova khawngaihna chu kan chawimawi tak zet a lo ni! (ws16.07-E)