A KAWM THU | BIBLE—DAM KHAWCHHUAHNA CHANCHIN
Bible A Dam Khawchhuak—Ṭawih Chhiatna Lakah
DINHMUN HLAUHAWM: Bible ziaktute leh ziak chhâwngtute chuan phairuanga siam lehkha leh savuna siam lehkhate chu an hmang ber a. * (2 Timothea 4:13) Engtin nge chutiang lehkhate chuan Bible chu dinhmun hlauhawm taka a dah?
Phairuang lehkha chu a thlêr hma a, a rawng a da hmain, a chhe hma bawk. Aigupta chanchin zirmi Richard Parkinson-a leh Stephen Quirke-a te chuan: “Phairuang lehkha phêk chu khua reiah lazai angin a thlûr tê têin a awm a, a mawihin a dip thei a ni. Lei hnuaia phûma dah ṭhat a nih hian, a hnâwnna chuan phairuang lehkhazial chu a tihmuarin, a tiṭawih thei a, sazu ang chi leh a bîk takin tlumpi ang chi rannungte’n an ei chhe thei,” tiin an sawi. Phairuang lehkha ṭhenkhat chu, hmuh chhuah an nih hnuah êng lutuk emaw, boruak hnâwng emaw hnuaia a awm hian a chhe rang lehzual a ni.
Savun lehkha chu phairuang lehkha aiin a tlo zâwk a; mahse, dîm lo taka khawih emaw, sa lutuk, hnâwng lutuk, leh êng lutuka a awm chuan a chhe thei a. * Savun chu rannungin an ei duh hle bawk. Chuvângin, Everyday Writing in the Graeco-Roman East, tih lehkhabu chuan, hmân laia thuziakte zîngah “dam khawchhuak a awm zeuh zeuh chauh” tih a sawi. Bible chu chutianga a ṭawih chhiat chuan, a thuchahte chu a rualin a boral ngei ang.
BIBLE A DAM KHAWCHHUAH DAN: Juda dân chuan an lalte chu Bible bu hmasa lam pangaa ‘dânte chu lehkhabua ziak chhâwng’ tûrin a phût a. (Deuteronomy 17:18) Chu bâkah, lehkha ziak chhâwngtu thiam takte chuan hmân lai kutziak Bible tam tak an siam avângin, kum zabi khatna a lo thlen chuan Pathian Lehkha Thute chu Israel ram puma inkhâwmna inah leh hmun hla tak, Makedonia-ah te pawh hmuh theih a ni tawh! (Luka 4:16, 17; Tirhkohte 17:11) Engtin nge kutziak Bible hlui tawh tak ṭhenkhat chu tûn thlenga a dam khawchhuah theih?
Dead Sea Lehkhazial anga hriat kutziak Bible, thlalêr hmun ro taka pûk chhûnga lei bêla dahte chu kum zabi tam tak chhûng a dam khawchhuak
New Testament scholar Philip W. Comfort-a chuan, “Juda mite chu Pathian Lehkha Thute chuanna lehkhazialte kawl ṭhat nân no tungah an dah ṭhîn nia hriat an ni,” tiin a sawi. Kristiante chuan chu tih dân chu an zui zêl niin a lang. Chuvângin, hmân lai kutziak Bible ṭhenkhat chu lei bêlah te, hmun thim takah te, pûk-ah te, leh hmun ro takahte hmuh chhuah a ni.
A RAH CHHUAH: Kutziak Bible lehkha them sâng tam tak—a ṭhen kum 2,000 aia upate—chu tûn thlengin a dam khawchhuak a. Kutziak Bible anga upa hmân lai lehkhaziak tam tak a awm lo. (wp16.04-E)
