SARI chu a hnathawh lai chuan a han zimar a, tichuan kâwlkil lam chu a han thlîr vêl a. A kaihhruaina fing tak hnuaiah a chhiahhlâwhte chu an hlim tlangin an hnaah an buai hle a ni. Mi taima tak Sari pawhin tih tûrte chu a ti ve a. A kut kham laite leh a taksa rawl laite a’n hmet nawk nawk lai chu han mitthla teh. An chênna puan in ṭet laite chu uluk takin a ṭhui ṭha a ni mai thei. An kêl vun puan khauh takte chu a sûr a sa hnuaiah kum tam tak an lo hman tawh avângin a hlui hle tawh a, chu chuan Sari chu chênna bulbâl nei lova insawn kuala a awm rei tawhzia a hriat chhuahtîr ngei ang. Chawhnu lam a inher a, khaw êng pawhin duai lam a pan ṭan ta. Sari chuan zing khawvâr hlima Abrahama * kal chhuak chu a thlîr liam tawh a, tûnah chuan beiseina nei takin chu mi lam chu a thlîr leh a ni. An bul hnai tlânga a pasal ni âwm tak rawn lang a hmuh chuan, a hlim hmêl duhawm tak chu a lang ngei ang.

Abrahama’n a chhûngkaw lian tak chu Euphrates Lui kâna Kanaan rama a hruai ni aṭang chuan kum sawm bi a liam tawh a. Sari chuan hriat loh rama an khualzin kawngah a pasal chu inhuam takin a thlâwp a, a chhan chu hnam zawng zawng malsâwmtu tûr chi thlah lo chhuahna chungchânga Jehova thiltumah Abrahman’n chanvo ropui tak a nei tih a hriat vâng a ni. A nih leh, Sari’n eng chanvo nge a neih ve? Fa nei thei lovin a awm reng a, tûnah chuan kum 75 lai a ni tawh a. Ani chuan, ‘Abrahama nupui ka nih lai hian Jehova thutiam chu engtin nge a thlen famkim theih ang le?’ tiin a ngaihtuah ngei ang. Chutianga a thlaphâng emaw, a dawhthei lo emaw a nih pawhin hriatthiam awm tak a ni.

Keini pawh Pathian thutiamte thlen famkim hun tûr ngaihtuah châng kan nei a. A bîk takin, kan hlut êm êm beiseina kan nghah laiin dawhtheihna neih a harsa hle ṭhîn. He hmeichhe danglam tak rinna aṭangin eng nge kan zir theih?

An chhûngkua chu Aigupta ram ata an rawn lêt hlim hlawl a ni a. (Genesis 13:1-4) Bethel, a nih loh leh Kanaan mite’n Luz tia an koh khaw chhak lama tlângahte chuan awmhmun an khuar a. He hmun sâng tak aṭang hian Sari chuan Ram Tiam zau tak chu a hmu thei a ni. Chutah chuan Kanaan mite chênna khuate, hmun hla taka zin kawngte a awm a. Mahse, chung hmun zau takah chuan Sari seilenna hmun anga hmun nuam rêng a awm lo. Ani chu Mesopotamian mite chênna Ur khawpuia seilian a ni a, chu chu mêl 1,200 (1,900 km) vêla hla a ni. Chutah chuan laichîn unaute a neih bâkah dâwr leh bazaar awmna khawpui nuam tak a awm a, chung khuh leh bang ṭha tak nei, awlsam taka tui herhchhuah theih in nuam takte a nei a, chûng zawng zawng chu a kalsan a ni! Mahse, Sari chuan a seilenna in nuam tak awmna khaw chhak lam chu ngai êm êm leh lung chhîr taka a thlîr anga kan ngaih chuan he Pathian ṭih mi hmeichhia hi kan hre chiang tâwk lo a ni ang.

A hnu kum 2,000 vêla thlarauva thâwk khum tirhkoh Paula thuziak hi chhinchhiah ang che. Sari leh Abrahama rinna chungchângah: “An chhuahna ram chu lungkham sela chuan hâwnna remchâng an hmu tawh ngei tûr a ni,” tiin a sawi a. (Hebrai  11:8, 11, 15) Sari leh Abrahama chuan hun kal tawhte chu ngaiin an thlîr lo. Chutiang rilru chu nei ni se chuan, an khaw lama hawn chu an rêl thlu daih tawh ang. Mahse, Ur khawpuiah kîr leh se chuan, Jehova pêk chanvo hlu tak chu an chân dâwn a ni. Mi maktaduai tam takte thinlung khawihtu rinna lama entawn tlâk ni lovin, mihring chanchin ata thai bo an ni ang.

Sari chuan hnung lam thlîr lovin hma lam a thlîr tlat a. Chuvângin, an khualzin chhûngin puan in an seng hunah te, an ran rual an khalh hunah te, hmun danga awm hmun an khuar leh hunahte pawh a pasal chu a thlâwp tlat a. Harsatna dangte leh inthlâk danglamnate pawh chhel takin a tuar a ni. Jehova’n a thutiam chu Abrahama hnênah a sawi nawn leh a—Sari chungchâng erawh sawi lan a la ni ta chuang lo!—Genesis 13:14-17; 15:5-7.

A tâwpah, Sari chuan a rilrua awm chu Abrahama a hrilh a lo hun ta a. “Ngai teh khai, LALPAN fa mi neihtîr phal loh hi,” tia a sawi laia a rilru hrehawm tûrzia chu han mitthla teh. Tichuan a pasal chu a bâwihnu Hagari laka fa nei tûrin a hrilh ta a. Sari’n a pasal hnêna chu thu a sawi laia hrehawm a tih tûrzia chu i mitthla thei em? Chutianga a hrilh chu, tûn laiah thil mak a ni mai thei a; mahse, chûng hun lai chuan, roluahtu * a lo pian nân mipain nupui pahnih, a nih loh leh hmei a neih chu thil danglam lutuk a ni hran lo. Abrahama aṭanga chi thlah hnam lo piang tûr Pathian thiltum chu chutiang kawnga hlawhtling tûrin Sari’n a ngai a ni ang em? Engpawh ni se, Sari chuan inpêkna harsa tak siam chu a inhuam a. Abrahama’n engtin nge a chhân lêt? Ani chuan “[Sari] thu chu a zâwm ta” tih kan chhiar a ni.—Genesis 16:1-3.

Jehova’n Sari chu chutianga thil ti tûrin a chêttîr tih Bible-in a sawi em? Sawi lo. Sari hma lâk dân hian mihring thlîr dân angin a thlîr tih a târ lang zâwk a ni. A harsatna tawhte chu Pathian vâng niin a ngai a, chinfel dân kawng dang a ngaihtuah thei lo a ni. Sari thil chinfel dân chuan a tân rilru hrehawmna leh buaina mai a thlen zâwk a. Chutiang chu ni mah se, a hma lâk dân hian hmasialna a neih lohzia a târ lang a ni. Mi dangte ṭhatna aia mahni duhzâwng dah hmasakna khawvêlah, Sari lantîr hmasial lohna rilru hi a ngaihhlut awm hle lo maw? Mahni duhzâwng aia Pathian thiltumte dah hmasak duhna kan neih chuan, Sari rinna kan entawn a ni ang.

A hnu rei vak lovah, Hagari chuan Abrahama lakah fa a pai ta a. Fa a pai tih a inhriat chuan Sari aia hlu zâwk tûrah a inngai a, tichuan a pi chu a hmusit ta a ni. Fa nei thei lo Sari tân a va tlâwmthlâk dâwn em! Abrahama phalna leh Pathian awmpuina avângin, Sari chuan Hagari chu târ lan loh  kawng engemaw takin a tirethei ta a. Hagari chuan fapa Ismaela a hring a, tichuan kumte a liam zêl a. (Genesis 16:4-9, 16) A hnuah, Jehova hnên aṭangin thu a lo thleng tih Bible chuan a sawi a, Sari chu kum 89 a ni a, a pasal chu kum 99 a ni. Thu danglam tak an dawng ta!

Jehova chuan a ṭhian Abrahama chu a thlah a tihpun tûr thu a tiam leh a. A hming pawh a thlâk bawk a ni. Tûn thleng hian Abrama tia hriat a la ni a. Mahse, Jehova’n ani chu Abrahama tih hming a pe a, chu chu “Mi Tam Takte Pa” tihna a ni. Tûnah chuan, a hmasa ber atân, Jehova’n Sari chanvo chelh tûr chu a hrilh ve ta. Saraii tih awmzia chu “ân hmang” a ni a, chu chu kan hriat ṭheuh Sari tiin a thlâk a ni. Sari tih hming awmzia chu eng nge ni? “Lal Fanu” tihna a ni! Jehova’n he hmeichhe duhawm tak tâna he hming a thlân chhan chu heti hian a sawi a: “Ani chu mal ka sâwm ang a, chu lo pawh chu ama lakah chuan fapa ka pe ang che: a ni, amah chu mal ka sâwm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang,” tiin.—Genesis 17:5, 15, 16.

Hnam zawng zawng malsâwmtu tûr chi thlah lo piang tûra Jehova thuthlung chu Sari fapa hmanga tihfamkim a ni ang! Naupang tâna Pathian hming thlân chu Isaaka a ni a, a awmzia chu “Tinui” tihna a ni. Jehova’n Sari chu mahni rila rah ngei fapa neihtîr a tum tih Abrahama’n a hriat ve leh “a bawkkhup a, a nui a.” (Genesis 17:17) Mak a tiin a lâwm hle a ni. (Rom  4:19, 20) Sari chungchâng chu eng nge ni ve?

A hnu rei vak lohvah, ram dang mi, mi pathumte chu Abrahama puan inah an lo kal a. A hun chu chhûn vânglai tak a ni a; mahse, he nupa kum upa tawh takte hian chûng an mikhualte chu an lo lâwm nghal vat a. Abrahama’n Sari hnênah: “Rang takin, chhangphut dip tak tehkhâwngthum siam la, hmet la, chhanpêrahte siam rawh,” a ti a. Chutih hun laia khualchhâwn thiamnaah chuan tih tûr tam tak a awm a. Abrahama chuan a nupui a thawhtîr vek lo; bâwng no nalh tak talh tûr leh, ei tûr, in tûrte buatsaih tûrin ani pawh a tlân chhuak nghal a ni. (Genesis 18:1-8, O.V. Re-edited) Chûng “mite” chu Jehova vântirhkohte an ni! Tirhkoh Paula’n: “Mikhualte chungah hmangaih chhuah theihnghilh suh u; chutiang tiin ṭhenkhatten hre lovin vântirhkohte an lo thleng si a,” tia a ziah khân, chu thil thlêng chu a rilruah a awm a ni ngei ang. (Hebrai 13:2) Khualchhâwn thiamna lantîrna kawnga Abrahama leh Sarite entawn tûr siam ṭha tak chu i entawn thei ang em?

Vântirhkoh pakhatin Abrahama hnênah Sari’n fapa a hring dâwn tih Pathian thutiam a hriatnawntîr khân, Sari chuan a puan in aṭangin a lo ngaithla a. Hetiang kum zât a nih hnua fa a hring dâwn tih a’n ngaihtuah chuan mak a ti lutuk chu insûm zo lovin a nui chhuak a: “Tar ka nih tawh hnu hian lâwmna ka nei ang maw, ka lalpa lah a upa tawh bawk si a?” tiin a sawi a ni. Vântirhkohvin Sari chu “LALPA tân thil rêng rêng a harsa lutuk em ni?” tia zâwtin a zilh a. Sari chuan hlau tak leh thiam thu sawiin, pângngai takin a chhâng lêt a ni. “Ka nui lo!” tiin a sawi chhuak ta phawng a. Vântirhkoh chuan: “Awih loh loh tûr! I nuih ngei kha le,” a ti a.—Genesis 18:9-15.

Sari chu a nuih avângin rinna a nei lo tihna a ni em? Ni lo ve. Bible chuan: “Rinnain Sari ngei pawhin, a tiamtu chu rinawma a ruat avângin, tar hnu tawhin chi pai theihna a hmu a,” tiin a sawi a. (Hebrai 11:11) Sari chuan Jehova a hria a, a thutiam engpawh a hlen ang tih a ring bawk a ni. Kan zîngah chutiang rinna nghet tak mamawh lo tunge awm ang? Thutak Pathian chu kan hriat chian lehzual a ngai a ni. Chutianga kan tih chuan, Sari’n rinna a neih avângin chutiang thil chu a ti tih kan hria ang. Jehova chu a rinawmin a thutiam engpawh hlen ṭhîntu a ni—a châng chuan, kan tâna mak tak leh min tinui khawpa makin thil a ti pawh a ni mai thei!

Kum 90 mi a lo nih chuan, Sari chu a dam chhûng zawnga a lo nghah thil avâng chuan a lâwm thei ta a ni. Tûna kum za ni tawh a pasal duh tak tân fapa a hrinsak ta! Abrahama’n naupang chu Pathian sawi tawh angin Isaaka, a nih loh leh “Tinui” tih hming a pe a. Sari chu chau hle mah se: “Pathianin mi tinui ta; mi tin a hria apiangin mi nuihpui ang,” tih a sawi laia a hlim hmêl chu kan mitthla thei a ni. (Genesis 21:6) Jehova pêk he  lâwmman mak tak hian Sari chu a thih thlengin a tihlim ngei ang. Mahse, mawhphurhna lian tak pawh a neihtîr bawk a ni.

Isaaka kum nga mi a nihin, an chhûngkua chuan naupang hnutê hnêk bântîr a nih chhinchhiah nân ruai an ṭheh a. Mahse, an vaiin an hlim vek lo. Sari’n a rilru tibuaitu thil pakhat “a hmu a” tiin kan chhiar a ni. Hagari fapa kum 19 mi Ismaela’n naupang Isaaka chu a nuihsawh a. Hei hi fiamthu anga ti a ni lo. A hnuah, Ismaela’n a tihduhdahna chu tilang tûrin tirhkoh Paula chu thlarauva thâwk khum a ni. Sari’n chu hnehchhiahna thil tih, a fapa ṭhatna tûr dâltu thil hlauhawm tak chu a hmu a. Sari chuan Isaaka chu a fapa mai ni lovin, Jehova thiltumah chanvo ropui tak nei tûra ruat a ni tih a hria a ni. Chuvângin, Abrahama hnênah huaisen tak leh tlang takin a sawi a. Hagari leh Ismaela chu hnawtchhuak tûrin a ngên ta a ni.—Genesis 21:8-10; Galatia 4:22, 23, 29.

Engtin nge Abrahama’n a chhân lêt? “Chu thu chu a fapa avângin Abrahama ngaih chuan thil ṭha lo tak a ni,” tiin kan chhiar a. Ismaela chu a hmangaih a, chu bâkah, pa ber anga a’n ngaihtuah chuan chu thil chu a hre thiam thei lo a ni. Mahse, Jehova chuan thil awm dân chu fiah taka a hmuh avângin a rawn inrawlh ta a. “Pathianin Abrahama hnênah chuan, ‘Naupang chungchâng thu leh i bâwihnu chungchâng thu hi i ngaihin thil ṭha lo tak ni suh se; Sarin i hnêna thu a sawi zawng zawng chu zâwm rawh; Isaakaah hian i thlahte an la ti dâwn si a,’” tiin kan chhiar a ni. Jehova’n Abrahama hnênah Hagari leh naupang chu a enkawl ang tih a tiam a. Mi rinawm Abrahama chuan a zâwm ta a ni.—Genesis 21:11-14.

Sari chu Abrahama tân nupui fel tak, thlâwptu ṭha tak a ni a. A pasal hriat duh apiang a hrilh mai a ni lo. An chhûngkua leh an nakin hun tibuai theitu harsatna a awm tih a hmuh chuan, a pasal hnênah tlang takin a hrilh a ni. Chutianga tlang taka a hrilh ṭhîn avângin, mi zahpahna nei lo angin kan ngai sual tûr a ni lo. Dik tak chuan, nupui nei tirhkoh Petera ngei pawhin, a hnuah pasalte chûnga zahna lantirtu hmeichhe entawn tlâk tak niin a sawi a. (1 Korinth 9:5; 1 Petera 3:5, 6) A nihna takah chuan, he mi chungchângah Sari’n engmah sawi lo ta se, Abrahama chungah zahna a lantîr lo a ni zâwk ang, a chhan chu Abrahama leh an chhûngkaw chunga chhiatna nasa tak a thlen theih dâwn avângin. Sari chuan a sawi tûr âwm tak chu hmangaihna nei takin a sawi zâwk a ni.

Nupui tam tak chuan Sari entawn tûr siam chu an hlut hle a. A hnên aṭangin pasalte nên tlang tak leh zah thiam taka inbiak pawh theih dân an zir a ni. Jehova’n Sari dinhmuna a inrawlh ang khân, nupui ṭhenkhat chuan an dinhmunah pawh Pathian rawn inrawlh ve se tih châng an nei a. Engpawh ni se, Sari rinna, hmangaihna, leh dawhtheihna chhinchhiah tlâk tak aṭangin an inzir thei a ni.

He hmeichhe duhawm tak hi Jehova ngeiin “Lal Fanu” tiin hming pe mah se, lal fanu anga cheibâwl chu a beisei lo. Kum 127 mi a niha a boral khân, Abrahama chuan ‘Sari chu a sûnin a ṭah a ni.’ * (Genesis 23:1, 2) A hmangaih tak “Lal Fanu” chu a ngai khawp ang le. Rinhlelh rual lohvin, Pathian Jehova pawhin he hmeichhe rinawm hi a hre reng ngei ang a, lei paradis-ah kaihthawhleh a tum a ni. Sari leh a rinna entawntu zawng zawngte chu chatuan hmabâk hlimawm takin a nghâk reng a ni.—Johana 5:28, 29.