Awm e, vântirhkoh sualte an awm a ni. Khawi aṭanga lo awm nge an nih? Pathianin vântirkohte chu zalên taka duhthlan theihna neiin a siam tih hre reng rawh. Mihring hmasa ber Evi leh Adam te siam an nih hnu lawk khân, ṭha famkim thlarau pakhat chuan zalên taka duhthlan theihna a neih chu hmang sualin leiah helna a tichhuak a. Pathian laka hel tûrin Evi leh Adam te chu a thlêm thei a ni. (Genesis 3:1-7; Thu Puan 12:9) Bible chuan he thlarau thilsiam hming chu tu nge a nih tih leh a hel hmain vânah eng dinhmun nge a chelh tih chiang takin a sawi lang lo. Mahse, a hel hnuah Bible chuan “Dodaltu,” tih awmze nei Setana tih leh “Sawichhetu,” tih awmze nei Diabola tiin inâwm takin a ko a ni.—Matthaia 4:8-11.

Lungchhiatthlâk takin, Pathian laka helna chu, chutah chuan a tâwp mai lo va. Nova hun laiin vântirhkoh ṭhenkhatte chuan vâna Pathian chhûngkuaa ‘an awmna pângngai chu an kalsan’ a ni. Leiah rawn chhukin nungchang bawlhhlawhna kawng an zawh theih nân mihring taksa an pu a, chu chu siam an nih chhan nên inkalh tak a ni.—Juda 6; Genesis 6:1-4; 1 Petera 3:19, 20.

Chûng vântirhkoh sualte chu eng nge an nih tâk? Pathianin khawvêl pumpui tithianghlim tûra tui a lêttîr khân, an mihring taksa chu kalsanin thlarau ramah an kîr leh a ni. Mahse, Pathianin hêng nungchang ṭha lo vântîrhkohte hi an ‘awmna pângngaia’ kîr leh a phal lo va. Anni chu Tartarus tia hriat, dinhmun hnuaihnung tak “khuarkhurum [thlarau lam] thimah,” a dah zâwk a. (Juda  6; 2 Petera 2:4) Hêng ramhuaite hi ‘êng tirhkohva insiam chawp’ “ramhuai lal,” Diabol Setana thununna hnuaiah an intulut a ni.—Matthaia 12:24; 2 Korinth 11:14.

Bible chuan Pathian Messia Lalram, vân sawrkâr chu kum 1914-ah din a ni tawh tih a sawi a. * Chu thilthleng pawimawh tak hnuah, Setana leh a ṭhuihhruaite chu vân aṭangin lei lamah paihthlâk an ni. Kan chênna khawvêl tichhetu suahsualna pung chho zêl leh nungchang bawlhhlawhnate hian Setana leh a ṭhuihhruaite chu an thinrim hle tih leh thununna ṭha lo tak an nei tih a târ lang a ni.—Thu Puan 12:9-12.

Mahse, nungchang bawlhhlawhnate leh nunrâwnna hlauhawm takte hian an thuneihna râwng tak chu tihtâwp a ni thuai ang tih a târ lang a. Nakin lawkah, hêng thlarau suaksual takte chu engmah ti thei lova siam an ni ang. Pathian Lalramin kum 1,000 chhûng lei paradis a awp hnuah, chûng thlarau sualte chuan mihringte fiah tûrin hun remchâng hnuhnung ber an la nei ang a, chu mi hnuah chuan, chatuanna tihboral an ni ang.—Matthaia 25:41; Thu Puan 20:1-3, 7-10.