Curacao khawpuia chêng Kenneth-a leh Filomena-i te chuan chawlhni chawhnu lamah an Bible zirpui nupa tuak khat chu an va tlawh a.

“Kan thlen chuan kawngka chu a inkhar a, motor pawh hmuh tûr a awm lo. Mahse, engemaw hian a nupui phone tûrin mi chêttîr a ni,” tiin Kenneth-a chuan a sawi.

Nu ber chuan phone a lo vuan a, a pasal chu hna thawka a kal thu a sawi a. Mahse, Kenneth-a leh Filomena-i te chu an lo thleng tih a hriat chuan kawngka a va hawn a, in chhûngah lut tûrin a sâwm a ni.

A lo ṭap reng tih an hre ta nghal a. Kenneth-a’n ṭawngṭaia Bible zirna a han ṭan chuan, chu nu chu a ṭap leh ta a. Tichuan Kenneth-a leh Filomena-i te chuan thil awm dân chu an zâwt ta a ni.

Ani chuan chumi chhûn chuan inthah tumin a pasal tâna a hnutchhiah tûr lehkha tawitê a ziah laia Kenneth-a’n a rawn phone avânga a ziak zawm tâk loh thu a hrilh a. A beidawnzia a han hrilh chuan Kenneth-a te nupa chuan Bible-a thlamuanna thutein an hnêm a. Chu fuihna chuan nun chhanhimna a thlen a ni.

“He hmeichhe lungngai tak hi kan ṭanpui theih avângin Jehova chungah kan lâwm tak meuh va, a bîk takin vântirhkoh emaw, A thlarau thianghlim emaw hmanga phone tûra min chêttîr vâng a ni!” tiin Kenneth-a chuan a sawi. *

Kenneth-a leh Filomena-i te’n vântirhkoh emaw, thlarau thianghlim emaw hmangin Pathian a rawn inrawlh anga an ngai chu a dik em? Nge ni a, Kenneth-a’n a hun taka a phone chu tihpalh thil thu mai a ni zâwk?

A nih dân chiah chu kan sawi thei lo. Pathianin mite chu thlarau lama ṭanpui tûrin vântirhkohte a hmang tih erawh kan hre chiang a. Entîr nân, Bible chuan Pathianin a kaihhruaina zawngtu Ethiopia mi tilreh chu ṭanpui tûra Kristian chanchin ṭha puangtu Philipa hrilh tûrin vântirhkoh a hmang tih min hrilh a ni.—Tirhkohte 8:26-31.

Sakhaw hrang hrang chuan thlarau thiltithei takte an awm tih leh ṭhenkhat chu Pathian duhzâwng titu vântirhkoh ṭhate angin emaw, mi mal tinte vêngtu vântirhkoh angin emaw hna an thawk niin an ring a. Mi tam tak chuan vântirhkohte an awm mai bâkah, chûng vântirhkohte chuan an chungah awmze nei taka thunun niin an ring bawk a ni. Mahse, mi dang lehte chuan vântirhkohte an awm tih an ring lo hulhual a ni.

Vântirhkohte chu an awm tak tak em? An awm a nih chuan, khawi aṭanga lo awm ṭan nge an nih? Vântirhkoh chungchânga thu dik chu eng nge ni? I nun an thunun thei em? A finfiahnate chu i lo bih chiang ang u.