ṬHENKHAT CHUAN HMAN TLAK LO AN TI. Doctor pakhat chuan kaihhruaina atâna Bible hman chu chemistry zirtîr nân kum 1920 bâwr vêla tihchhuah zirlaibu hman nên a khaikhin a. Bible zah lotu chuan tûn lai chhuak computer hmang tûrin hmân lai chhuak computer tâna siam kaihhruaina chu i hman dâwn em ni tiin a zâwk che pawh a ni thei. Thu danga sawi chuan, mi ṭhenkhatin Bible chu hman tlâk tawh loh hulhual angin an ngai a ni.

Tûn lai khawvêl changkâng takah hian engvângin nge miin chu hmân lai kaihhruaina chu a hman ang? Tihah chuan, chhiar sên loh khawpa tam website leh blog-te chuan thurâwn leh kaihhruaina thar ber berte chu khaihlak lovin an tichhuak reng a. Rilru lama mi thiam te, nun dân zirtîrtu te, leh lehkhaziaktute chuan TV aṭangin thurâwn ṭha tak takte an sawi ṭhîn bawk. Lehkhabu dâwrte chuan mahnia inzirna lehkhabute chu an tichhuak reng a, lehkhabu siamtute chu nasa takin an tihausa a ni.

Minute-tina chanchin thar hmuh tûr a awm a nih chuan, engvângin nge kum 2,000 kal taa ziah zawh tawh lehkhabu—Bible chu kan râwn duh ang? Kaihhruaina atâna Bible hman chu hluihlâwn tawh chemistry zirlaibu leh hmân lai computer tâna siam kaihhruaina hman ang a ni tia Bible ringhleltute sawi chu a dik thei mai lo vang maw? Dik tak chuan, chu khaikhinna chu a dik lo hulhual a ni. Science leh thiamnate chu inthlâk chak hle mah se, mihringte mamawh bulpuite chu a inthlâk em? Mite chuan nun awmze nei tak neih bâkah hlimna leh himna, chhûngkaw inlaichînna ṭha leh inṭhian ṭhatna duhawm tak neih chu an la duh reng a ni.

Hmân lai lehkhabu a nih angin, Bible chuan chûng mamawhte aia tam chu a târ lang a. Min Siamtu thâwk khum niin a insawi bawk. Kan nun kawng tinrêng atâna kaihhruaina min pe a, harsatna engpawh hmachhawn thei tûrin min buatsaih bawk. (2 Timothea 3:16, 17) Chu bâkah, englai pawha hman tlâk reng thurâwn—hluihlâwn ngai loh tûr—chu min pe bawk! Bible ngeiin: “Pathian thu hi a nung,” tiin a sawi.—Hebrai 4:12.

Bible insawi dân chu a dik tak tak thei em? A hmân lai lutuk nge ni a, lehkhabu hman tlâk ber leh ṭangkai ber—dik tak chuan, lehkhabu nung—a ni zâwk? Tûn ṭum chhuak Vênnainsâng, special issue chhuak tûrte zînga a hmasa berin a tum chu a chunga zawhnate chhânna zawng hmu tûra nangmah ṭanpui che hi a ni.