HEI HI HAN MITTHLA TEH: Hmân lai hriatrengna thilte dah khâwmna hmun museum chu i va tlawh a. A tam zâwk chu khem nennung, rawp tawh tak, leh thil ei chhiat tawhte an ni. Ṭhenkhatah chuan bung lian tak takte a kim tawh lo va. Mahse, pakhat erawh danglam tak maiin a pumin a him a; a la kim vek a ni. “Hei hi a dang aiin a thar lâm zâwk em ni?” tiin a hruaitu che chu i zâwt a. Ani chuan: “Ni lo ve, hei hi a dang zawng aiin a hlui ber a, chu bâkah, siam ṭhat a ni ngai lo,” tiin a hrilh che a ni. “Sik leh sate lakah vênhim a ni em?” tiin i zâwt leh a. Ani chuan, “Ni lo, nasa takin ruahpui leh thlipui a tuar a. Thil tihchhiat ching mite chuan tihchhiat an tum bawk,” tiin a hrilh che a. Chutah tak chuan, ‘Enga siam nge ni?’ tiin mak ti takin i ngaihtuah ngei ang.

Bible hi, chu hmân lai hriatrengna thil danglam tak ang chu a ni tiin kan sawi thei a. Hei hi hmasâng lehkhabu—lehkhabu dang zawng aia hlui zâwk a ni. Hmân lai lehkhabu hlui dangte pawh a awm ngei mai. Mahse, hmân lai hriatrengna thil chhe tawhte angin, hmân lai lehkha ziak tam zâwk chu hunte a liam zêl chuan an chhe zo ta a. Entîr nân, Science chungchânga an thusawite chu hriatna tharte leh finfiahna tharte nên a inmil tawh lo a ni. Damdawi lam chungchânga an thurâwn pêkte chu ṭangkaipui ahnêkin a hlauawm zâwk a. Chu bâkah, hmân laia lehkha ziak tam tak chu a ṭhen lai chauh a bâng tawh a; a dangte chu en tlâk tawh lovin, a che lutuk tawh a ni.

Mahse, Bible erawh danglam tak a ni. Bible ziah ṭanna chu kum zabi 35 chuang ni tawh mah se, a bu pumin a la him a. Kum zabi tam tak chhûng chu nasa taka beih—hal te, khap beh te, leh deusawhte—a tâwk a, a chhûng thute chuan sawichhiat a hlawh reng bawk. Hriatna thar zêlte avânga hman  tlâk tawh lova awm ahnêkin, Bible chuan thil lo thleng tûr a hmuh lâwk theihzia târ langtu thil tam tak a sawi a ni.—“Hman Tlâk Tawh Lo Nge Ni A, A Tûn Lai Lutuk Zâwk?” tih bâwm chu en rawh

‘Bible zirtîrnate chu tûn lai hunah a la ṭangkai tak zet em?’ tiin i ngaihtuah mai thei. A chhânna hriat nân, heti hian inzâwt ang che: ‘Tûn laia mihringte tawh mêk buaina khirh takte chu eng nge ni? Engte hi nge râpthlâk ber?’ tiin. Indona te, boruak bawlhhlawhna te, dân bawhchhiatna te, leh ei rûknate chu i ngaihtuah chhuak mai thei a. Tûnah Bible zirtîrna thu bul ṭhenkhat kan sawiho vang. Chutianga kan sawiho lai chuan, heti hian inzâwt ang che: ‘Chûng thu bulte chu mite’n an nunpui chuan khawvêl hi hmun ṭha zâwk a ni ang em?’ tiin.

REMNA NGAINATNA

“Remna siamtute chu an eng a thâwl e; Pathian faa vuahin an la awm dâwn si a.” (Matthaia 5:9) “A theih phawt chuan nangmahni lam tal, mi zawng zawng nên inremin awm rawh u.”—Rom 12:18.

KHAWNGAIHNA LEH NGAIHDAMNA

“Mi khawngaih thei takte chu an eng a thâwl e; khawngaih an la hlawh dâwn si a.” (Matthaia 5:7) “Tupawhin tu chungah pawh thupawi nei ang ula indawh tawnin inngaidam tawn ula; Lalpa chuan a ngaidam che u ang tak khân ngaidam ve rawh u.”—Kolossa 3:13.

HNAM TIN INLUNGRUALNA

Pathian chuan “lei chung zawng zawnga awm tûrin bul hmun khat vekin hnam tin mi a siam a.” (Tirhkohte 17:26) “Pathianin mi duhsak bîk a nei lo, . . . nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn.”—Tirhkohte 10:34, 35.

LEILUNG ZAHNA

“Tin, LALPA Pathian chuan mihring chu a hruai a, Eden huanah chuan a enkawl leh vêng tûrin a dah ta a.” (Genesis 2:15) Pathianin ‘lei tichhetute a tihchhiat ve thung hun chu a lo thleng’ ang.—Thu Puan 11:18.

DUHAMNA LEH NUNGCHANG BAWLHHLAWHNA HUATNA

“Awhna rêng rêng lakah chuan invêng rawh u; sum ngah hi mihring dam chhan a ni lo ve.” (Luka 12:15) “Nimahsela mi thianghlimte tiha mawi âwm rêngin, inngaih leh bawlhhlawh zawng zawng, duhâmna nên in zîngan lam pawh lamin awm suh se.”—Ephesi 5:3.

FEL TAKA THILTIH LEH TAIMAKNA

‘Engkimah fel taka awm kan tum a ni.’ (Hebrai 13:18) “Rûk hmang chuan ru tawh suh sela; . . . a kuta thil ṭha thawkin rim zâwk rawh se.”—Ephesi 4:28.

ṬANPUI NGAITE ṬANPUI A PAWIMAWH

“Rilru tête chu fuih ula, chak lote chu ṭanpui ula, mi zawng zawng lakah dawhthei takin awm rawh u.” (1 Thessalonika 5:14) ‘Fahrah leh hmeithaite an hrehawm laiin kan rawh.’—Jakoba 1:27.

Bible-in chûng thu bulte chu a târ lang mai a ni lo. Chûng thu bulte chu ngai hlu tûr leh nî tina nunpui tûrin min zirtîr a. Kan sawi tâkte kha mi tam zâwkin nunpui ta sela, mihringte hian buaina an neih tlêm phah sawt lo vang maw? Dik tak chuan, Bible thu bulte chu tûn hma zawng aiin a pawimawhin, a tûn lai hle a ni! A nih leh, Bible zirtîrnate chuan tûnah eng nge a tihsak theih che?

Mihring zînga fing ber chuan: “Finna chu a thiltih aṭangin a dikzia a lang a ni,” tiin a lo sawi tawh ngai a. (Matthaia 11:19) Chu chu i pawm dâwn lâwm ni? Finna fiah theih dân ṭha ber chu a hna thawh dân aṭanga hriat a ni. Chuvângin, ‘Bible hi ṭangkai tak a nih chuan ka nunah rah ṭha a chhuah lo vang maw? tiin i ngaihtuah mai thei. Bible chu tûna ka hmachhawn mêk buainate tân engtin nge a ṭangkai? Entîrna pakhat i lo ngaihtuah ang u.

Delphine-i, * chuan hna ṭha thawh tûr a ngahin chu chu a hlâwkpui hle a. Mahse, vawilehkhatah chânna râpthlâk tak takte a tâwk a. A fanu tleirâwl chuan a boralsan a. An nupa inkârah buaina lian tak a thleng bawk. Sum leh pai lamah pawh harsatna a tâwk bawk a ni. Ani chuan: “Ka fanu, ka pasal bâkah ka in te ka chân a—tu nge ka nih tih pawh ka inhre tawh lo. Engmah ni tawh lo hian ka inhria—mizia te, chakna te, hma thlîrte pawh engmah ka nei tawh lo,” tiin a sawi.

Delphine-i chuan he thu dikzia hi tûn hmain a hre ngai lo: “Kan dam chhûng kumte chu kum sawmsarih a ni a, chakna avângin kum sawmriat pawh a ni thei e; nimahsela a reina chu thawhrimna leh lungngaihna mai a ni; a ral thuai a, keini pawh kan thlâwk bo ṭhîn,” tih hi.—Sâm 90:10.

 Delphine-i chuan a harsat laiin a mamawh ṭanpuina chu Bible-ah a zawng a. A hlâwkpuizia chu chhinchhiah tlâk tak a ni. A dawta thuziak pathumin a târ lan angin, mi dang tam tak pawhin an harsatnate hmachhawn thei tûra Bible fuihnate an nunpui hian hlâwkna tam tak an hmu a. Bible hi a tîra kan sawi tâk hmân lai hriatrengna thil ang a ni tih an hria a. Lehkhabu hlui leh hman tlâk loh tam tak lakah a danglam hle a ni. A nih leh, Bible chu danglam taka siam a nih vâng a ni em? Bible hi mihringte ngaihtuahna ni lovin, Pathian ngaihtuahna a ni tak zet em?—1 Thessalonika 2:13.

Nun hi a tawiin buainain a khat tih chu i pawm ve ngei ang. Buainain a chîmbuai lutuk che hunah, thlamuanna te, ṭanpuina te, leh rinchhan tlâk thurâwnte hmu tûrin khawi lam nge i pan ang?

Nunah Bible ṭangkaina finfiah theih dân kawng thum i lo en ang u. Bible-in

1. a theih phawt chuan buainate pumpelh dân a zirtîr thei che.

2. harsatnate lo chhuah huna chingfel dân a zirtîr thei che.

3. i tihdanglam theih loh dinhmunte hlawhtling taka hmachhawn dân a zirtîr thei che a ni.

A dawta thuziakahte chuan chûng dinhmun pathumte chu sawiho a ni ang.