Rosie-i chuan, “A chhe zâwnga thil ka ngaihtuah vâng leh a chhe thei ang bera thil lo thleng tûra ka ngaih avângin lungkhamna engemaw ka nei reng a ni,” tiin a sawi. Ani chu eng Bible chângin nge ṭanpui? Bible châng pakhat chu Matthaia 6:34-a thu: “Chutichuan atûk atân lungkham suh u, atûk chuan ama tân a lungkham chawp dâwn si a. Ni khat atân ni khat hrehawm chu a tâwk a ni,” tih hi a ni a. Rosie-i chuan he Isua thusawi hian a tûka thil lo thleng mai theite lungkham lo tûrin a ṭanpui tih a sawi. “Ka tawn miah loh dinhmun leh nakin pawha ka tawn loh tûr dinhmunte ngaihtuah buai ngai lovin, tûnah pawh buaina ka nei reng tawh a ni,” tiin a sawi belh bawk.

Yasmine-i pawhin lungkhamnain a thunun tlat niin a inhria a. “Chawlhkâr khat chhûngin ni engemaw zât chu ka ṭap ṭhîn a, mut theih loh zânte pawh ka nei bawk. A chhe zâwnga ngaihtuahnain mi ei ral ni ber hian ka inhria,” tiin a sawi. Ani chu eng Bible chângin nge ṭanpui? 1 Petera 5:7-naa: “Anin a ngaihsak ṭhin che u avângin in manganna zawng zawng ama chungah nghat vek rawh u,” tih thu hian a ṭanpui a ni. Yasmine-i chuan: “Hunte a liam zêl a, Jehova hnênah ka ṭawngṭai fan fan avângin ka ṭawngṭaina chu min chhânsak a ni. Ka phur rit tak min paihthlâksak ang mai ni hian ka hria. A chhe zâwnga thil ngaihtuah châng chu ka la nei tho va; mahse, tûnah chuan a chinfel dân ka hre ta,” tiin a sawi.

Nula Isabella-i chuan: “Vuaichana hi mize inthlah chhâwn thil niin ka hria, a chhan chu ka pa pawhin a nei ve a ni. Chawlhhahdamna, leh TV en ang chi engmah lo mai mai tih nân thil pawimawhte chu ka tinghâl ṭhîn lo. Chu chuan rilru hahna a belhchhahin, dâwngdah taka hna min thawhtîr avângin hei hi chîn dân hlauhawm tak a ni,” tiin a sawi. Amah ṭanpuitu thu bul chu 2 Timothea 2:15-a târ lan: ‘Hnathawktu chu zak tûr a ni lo angin, Pathian ngaiha ṭhaa inentîr tûrin ṭhahnem ngai rawh,’ tih hi a ni. Isabella-i chuan, “Ka hnathawh vuaicha vâng maia Jehova tihzah chu ka duh lo,” tiin a sawi. Tûnah chuan, nasa takin hma a sâwn tawh a ni.

Chutiang bawkin, Kelsey-i pawhin: “A hun taka zawhfel tûr hna ka nei a, zawhfel hun a thlen dâwn ṭep thlengin ka la vuaicha a ni. Ka ṭap a, ka mu thei lo va, ka lungngai ṭhîn a. Chu chu ka tân thil ṭha lo tak a ni,” tiin a sawi. Kelsey-i chuan Pathian hnên aṭangin ṭanpuina a hmu a, chu chu Thufingte 13:16-a: “Remhria zawng zawngin finnain an thawk a, mi â erawh chuan âtna a zâr darh ṭhîn,” tih hi a ni. He Bible châng a chhût ngunna aṭanga a thil hriat chu: “Ṭha taka hun duan lâwkna neih hi a finthlâk a ni. Tûnah chuan ka hnathawh tûr duang lâwkte chhinchhiahna bu chu ka dawhkânah ka dah reng a, chu chuan mahni insiamrem tûr leh hnathawh vuaicha lo tûrin min ṭanpui a ni,” tih hi a ni.

Kirsten-i chuan: “Ka pasalin min chhuahsan thut maia, kan fa palite nên min hnutchhiah,” tiin a sawi. Eng Bible thu bulin nge ani chu ṭanpui? Thufingte 17:17-a thu: “Ṭhian chuan englai pawhin a hmangaih reng a, mangan nî atâna unauva piang a ni,” tih hi a ni. Kirsten-i chuan Jehova rawng a bâwlpui dangte hnênah ṭanpuina a dîl a. Eng nge a hmuh? “Ka ṭhiante chuan kawng tam takin min ṭanpui hlâwm a ni! Ṭhenkhat chuan nî tin mamawh thilte leh pangpârte chu ka kawngka bulah an dah a. Ṭum thum lai in danga kan insawnnaah mi engemaw zâtin kei leh ka fate chu min ṭanpui a ni. Pakhat phei chuan hna hmu tûrin min ṭanpui a. Ka ṭhiante chu ka tân an inpeih reng a ni,” tiin a sawi.

Kan sawi tâk Delphine-i pawh, mal nia inhriatna neiin a lunghnual hle a. Thil tam tak a chân hnuah: “Mi dangte chu an hlim tlâng hle a. Kei chu mal tak niin ka inhria,” tiin a sawi. Amah ṭanpuitu Bible châng pakhat chu Sâm 68:6-a thu: “Pathian chuan mi malte chu chhûngkaw zîngahte a teltîr ṭhîn a,” tih hi a ni a. Ani chuan: “He Bible châng hian in tak tak a kâwk lo tih ka hria. Chu aiin, Jehova hmangaihtute nêna inzawmna ṭha tak leh rilru lama inhnaihna min neihtîrtu himna dik tak awmna hmun, thlarau lam in a sawina a ni tih ka hria a. Chu bâkah, Jehova ka hnaih hmasak loh chuan mi dang ka hnaih thei lo tih pawh ka hre bawk. Chuvângin, Sâm 37:4-a: ‘LALPA chungah chuan lâwm bawk rawh; tichuan i thinlung duhzawngte chu a pe ang che,’ tih thu hian min ṭanpui a ni,” tiin a sawi.

Heti hian thu tâwp a siam a ni: “Jehova chunga innghat tlat tûr chuan amah ka hnaih lehzual a ngai tih ka hria. Ani chu mi ṭha berte zînga ṭha ber a ni. Mi dangte nêna kan thawh tlan theih tûr thilte ka ziak chhuak a, tichuan, Jehova hmangaihtute chu ṭhianah ka siam a. Mi dangte ṭhatna lai hmuh dân leh chûng an ṭhatna laite chauh ena cheibâwl dân ka zir bawk,” tiin a sawi.

Ni e, Pathian rawngbâwltu ṭhiante chu an ṭha famkim bîk lo va. Jehova Thuhretute pawhin mi dangte ang bawkin buainate an hmachhawn ve tho a ni. Mahse, Bible zirtîrna chuan a theih phawt chuan mi dang ṭanpui tûrin mite a chêttîr a. Chutiang mite ṭhiana siam chu a finthlâk a ni. A nih leh, Bible thu bulte chuan natna benvawn leh lungngaihna ang chi tûna chinfel theih loh buainate hmachhawn thei tûrin min ṭanpui ang em?