Rose-i chuan: “Nâ ti lutuka min awmtîr rengtu inthlahchhâwn natna ka vei a. Ka dinhmun chu a chau hle,” tiin a sawi. A rilru tihrehawm bertu pakhat chu Bible zirnaah leh thlarau lam thilah ṭha taka rilru a pe thei lo hi a ni. Mahse, Matthaia 19:26-a: “Pathian nên erawh chuan engkim tih theih a ni,” tih Isua thusawit hian nasa takin a ṭanpui a. Rose-i chuan inzîrna neih dân kawng khat aia tam a awm tih a hria. A natna avânga lehkha a chhiar theih miah loh chângte a awm a, chuvângin, Bible leh thu leh hla chhuah aw thunsate chu a ngaithla ṭan ta a. * “Chutianga ka ti a nih loh chuan, ka thlarau lam dinhmun vawn ṭhat dân kawng ka hre lo,” tiin a sawi.

Rose-i chu tûn hma anga thil a tih theih tawh loh avânga a lunghnual hian 2 Korinth 8:12-a chhinchhiah: “Inpeihna chu a awm phawt chuan, mi a neih loh pui ni lovin, a neih angzia zêla a pêk chu lawm tlâk a ni si a,” tih thu hian thlamuanna a pe a ni. Chûng thute chuan a dinhmun a zira a theih ang tâwka a tih avângin Pathian a lâwm tih a hriatnawntîr a ni.

Kan sawi tâk Delphine-i chuan: “Ka fanu kum 18 miin min boralsan hnu chuan, ka tawrhnat êm avângin ka dam chhuah theih pawh ka inring lo. Eng mah hi a pângngai thei thawh lo a ni,” tiin a sawi. Mahse, fakna hla phuahtuin Pathian hnêna a sawi, Sâm 94:19-a thu: “Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn,” tih aṭangin thlamuanna nasa tak a hmu a. “Ka rilru natna thawi damtu tûr thiltih tûrte hre tûra min ṭanpui tûrin Jehova hnênah ka ṭawngṭai ṭhîn,” tiin a sawi.

Tichuan, tlâwmngaia rawngbâwlnaahte a inhmang ta a. A hnuah chuan, a tliah hnu pawha hman theih naupang milem cheina rawng nên a inkhaikhin a. Chu rawng tliak tawh anga beidawn châng nei mah se, mi dangte a la ṭanpui thei tho tih a hre ta a. “Ka Bible zirpuite thlamuan nâna Bible thu bulte leh ngaihtuah dânte ka hrilh hian, chu chu Jehova min hnêm dân leh min thlamuan dân a ni tih ka hre chhuak ta nghâl a ni,” tiin a sawi. Bible-a chuang, lungngaihna nasa tak paltlangtute chanchin chu a la khâwm a. “An vaiin ṭawngṭai fan fantute hlîr an ni,” tih a hmu chhuak a. Chu bâkah, “Bible chhiarna hmang chauhva hmachhawn theih a ni,” tih a hre bawk.

Bible zirna aṭangin Delphine-i chuan thil dang pawh a hriat belh bawk—hun kal tawh ni lovin, nakin hun ngaihtuah tlat tûr a ni, tih chu. Tirhkohte 24:15-a târ lan: “Mi felte leh fel lote thawhlehna a awm ang,” tih beiseina chuan a thlamuan a ni. A fanu chu Jehova’n a kaitho leh ang tih chu engtiang khawpin nge a hriat chian? Delphine-i ngeiin heti hian chhâng a: “Nakin huna ka fanu nêna kan awm dân tûr chu ka hmu a. Kan inhmuh leh hun tûr ‘nî’ chu, ka Pa calender-a chhinchhiah tawh ang maiin a chiang a ni. Ka fanu a pian nîa chiang taka a hmêl ka hmuh a, ka hmangaih tlat angin, nakina kan huana kan awm dun dân tûr chu chiang takin ka hmu thei a ni,” tiin.