Thuziak hmasaa kan sawi tâk Delphine-i chuan a lungkhamna avângin a lutuka zu in ta niin a inhria a. Bible chuan a âwm tâwka zu in chu khap lo mah se, ‘uain heh mite zîngah tel suh,’ tiin a sawi. (Thufingte 23:20) Zu hman sualna chu natna khîrh tak tak te, inlaichînna kehchhiatna te, leh kum tinna a hun lo va mi maktaduai tam tak thihnate nên inzawmna a nei a. Mite’n Bible thurâwn fin tak an zawm chuan chûng buaina tam tak chu an pumpelh thei a ni.

Delphine-i’n chutiang chuan a ti a ni. Ani chuan: “Zu hian ka lungkhamnate a tikiam lo tih ka hria. Philippi 4:6, 7-a thurâwn fing tak: ‘Engah mah mangang suh u; . . . in duhnate chu Pathian hnênah hriattîrin awm zâwk rawh se,’ tih hi ka nunpui a. Ka ngaihtuahna leh ka lungkhamnate a zual châng hian zan tin Jehova hnênah tih tak zetin ka ṭawngṭai ṭhîn. Ka thinrimna, ka rilru natna, leh ka beidawnnate pawh tiamin, ka rilrua awm zawng zawng chu ka hrilh a, tichuan, rilru put hmang ṭha nei lehzual tûrin ka ngên bawk. A tûk zîngah chuan, chûng ka rilru natnate chu pai reng loh ka tum tlat a. Jehova hnêna ka ṭawngṭai ṭhinna chuan ka neih lohte ni lovin ka neihte ngaihtuah tlat tûrin min ṭanpui a ni. Zu in bânsan ka tum a. Rilrua thlamuanna ka neih hi a hlut êm avângin chân ka phal tawh lo a ni,” tiin a sawi.

Hei hi lungngaihna leh hrehawmna thlentu zînga pakhat a ni a. Mahse, Bible thu bulte chuan chûng buainate thlentîr thei thil ṭhenkhat—entîr nân, inchhaiderna mawi lo tak leh saruak lem leh thuziakte—chu a târ lang a, chûngte chu pumpelh thei tûrin min ṭanpui a ni. Ṭhalai Samuel-a chuan: “Inchhaider chu awlsam tak a ni. A châng chuan ka duh vâng pawh a ni lo; mahse, min duh tih ka hriatna chuan inchhaider a tinuam êm êm mai,” tiin a sawi. Samuel-a chuan mite chhaider a tum lo chung pawhin mite’n chhaider hrat tak niin an puh tih a hria a, a tâwpah phei chuan, mite puh hmain tum reng vângin a chhaider ta ṭhîn a ni. Mahse, chu a thil chîn chuan a tibuai hle a. Ani chuan: “Hei hian mahni hmasialna min neihtîr avângin a hlauhawm hle,” tiin a sawi.

Samuel-a chuan jw.org website-a ṭhalaite tâna tihchhuah thuziakte chu a chhiar a. Thufingte 20:11-a thu: “Naupang takngial pawh a thiltihin a intilang ṭhîn. A thiltih chu a thianghlim leh a dik emawin,” tih thu chu a ngaihtuah a. Chu chuan engtin nge a ṭanpui? Chutianga inchhaiderna chu a thianghlim lovin a dik lo tih a hre ta a. Ani chuan: “Inchhaider chîng ṭhalai chuan kawppui ṭha lo tak nihtîrtu miziate a nei thei tih ka hria a. Ka nupui tûrin hmeichhe dang ka chhaider a hmuh huna a rilru nat dân tûr chu ka ngaihtuah ṭan ta a. Chu chuan he chîn dân hi hlauhawm tak a ni tih min hriat chhuahtîr a ni. Sawi duh chu a awlsam avângin a dik tihna a ni lo,” tiin a sawi. Samuel-a chu a inthlâk danglam ta a. Inchhaiderna pumpelhna chuan nungchang bawlhhlawhna pumpelh tûrin a ṭanpui a ni.

Antonio-a chu nungchang bawlhhlawh thlen theitu dinhmun hlauhawm takah a awm a: Saruak lem leh thuziakte en a chîng a ni. A hmangaih tak nupuia a nei chûng pawhin, saruak lem leh thuziakte en chu a bânsan thei lo tih a inhria a. 1 Petera 5:8-a thute a ngaihtuahnain a ṭanpui tak zet tih a sawi a. Chutah chuan: “Ngaihven ula, fîmkhur rawh u; in khingpui Diabola chu sakeibaknei rûm ṭhîn angin a ei theih tûr zawngin a phi ruai ṭhîn,” tiin a sawi a. Antonio-a chuan: “He khawvêlah hian saruak lem leh thuziakte hual vêlin kan awm a, chûng lemte chu rilruah a châm rei thei hle a ni. Bible châng chuan chûng thlêmnate lo chhuahna chungchâng ngaihtuah tûrin min ṭanpui a. Chûng milem ṭawp tak takte leh tenawm tak takte chu ka bânsan vat a ngai a. Ka rilru, ka thinlung, leh kan nupa nun min tibuaitu chu, ‘ngaihven leh fîmkhura’ do thei tûrin Jehova chuahvin min ṭanpui thei tih tûnah ka hre ta,” tiin a sawi. Antonio-a chuan a mamawh ṭanpuina chu a hmu a, a tâwpah chuan a chîn dân ṭha lo chu a bânsan thei ta a. Chu chuan buaina khirh zâwk pawh pumpelh tûrin a ṭanpui a ni.

Bible chuan buaina khirh tak takte pumpelh thei tûra min ṭanpuitu thurâwn ṭangkai tak tak min pe a. A nih leh, thûk taka zung kaih tawh, sutkian theih loh buainate chungchâng hi eng nge ni ve? Pathian Thu-in chûng harsatnate chingfel thei tûra min ṭanpui theih dân i lo en ang u.