Tuemaw chu a miziate kan hriat a, amah kan hriat chian poh leh kan inṭhianna pawh a nghet lehzual ṭhîn a. Chutiang bawkin, Jehova miziate kan hriat tam poh leh eng ang Pathian nge a nih kan hre chiang lehzual a, kan inṭhianna pawh a nghet lehzual a ni. Pathian mize ropui tak tak zîngah, hêng palite hi a langsâr zual bîk a ni: a thiltihtheihna, a finna, a rorêl dikna, leh a hmangaihna.

“Aw Lalpa PATHIAN, ngai rawh, i thiltihtheihna nasa leh i kut pharin lei leh vân i siam a, i tân thiltih harsa lutuk a awm rêng rêng lo va.”—JEREMIA 32:17.

Pathian thiltihtheihzia finfiahna chu a thil siamah a lang a. Entîr nân, nipui laia pâwnna i din hian engtin nge i awm? Nî sa i dawng a. Dik tak chuan, Jehova thil siam aṭangin a thiltihtheihna i dawng a ni. Nî chuan eng ang takin nge thil a tih theih? A laimu sat zâwng chu 27,000,000 degrees Fahrenheit vêl (15,000,000°C) a ni a. Second tinin, nî hian nuclear bomb maktaduai za têl puak keh chakna ang vêl chu a tichhuak reng a ni.

Mahse, nî hi universe-a chhiar sen loh arsi maktaduai tam takte nêna khaikhin chuan a tê hle a. Scientis-te chuan arsi lian berte zînga pakhat UY Scuti an tih chu nî aiin a lêt 1,700 vêla a len an ring a ni. Nî awmna hmunah UY Scuti hi awm ta se la chuan, leilung mai bâkah Jupita planet kal kawng piah lam thlengin hmun a luah thei ang. Chu chuan Pathian Jehova’n a thiltihtheihna nasa tak hmangin lei leh vân, he universe hi a siam tia Jeremai sawi chu hre thiam lehzual tûrin min ṭanpui a ni.

 Engtin nge Pathian thiltihtheihna chu kan hlâwkpui? Kan nunna hi Pathian thil siam, nî leh leilung hausaknaah a innghat tlat a. Chu bâkah, Pathian chuan a thiltihtheihna chu mihringte’n a mi mal taka an hlâwkpui theih nân a hmang a ni. Engtin nge? Kum zabi khatnaah, Pathianin Isua chu thilmakte ti thei tûrin thiltihtheihna a pe a. “Mitdelte an mit a lo var ta, kebaite kein an lo kal ta, phârte an lo thianghlim ta, bengngawngte pawh an beng a lo vâr ta, mitthite pawh kaihthawhin an awm ta,” tiin kan chhiar a ni. (Matthaia 11:5) Tûn laiah eng nge ni ve? Bible chuan: “Chau hnênahte chuan thiltihtheihna a pe ṭhîn,” tia a sawi bâkah, “LALPA nghâktute erawh chuan an chakna chu an siam ṭha leh ang,” tiin a sawi a ni. (Isaia 40:29, 31) Pathian chuan nuna harsatnate chingfel thei tûr leh fiahnate chhel taka tuar chhuak thei tûrin ‘thiltihtheihna nasa tak’ min pe thei a ni. (2 Korinth 4:7) Kan ṭhatna tûra hmangaihna nei taka a thiltihtheihna nasa taka hmangtu Pathian hnaih chu i duh a ni lawm ni?

“Aw LALPA, i thiltihte chu a va tam êm! Finnain i siam vek a ni.”—SAM 104:24.

Pathian thil siamte kan hriat tam poh leh, a finna chu mak kan ti telh telh a. Dik tak chuan, biomimetics tia an koh zirna pakhat a awm a, chu chu scientist-te’n Jehova thil siamte zir a, a pianhmang entawnin an thil siam chhuahte tihchangkân tuma zirna a ni a. Chûng an thil siam chhuahahte chuan thil engemaw kilhna aṭanga thlawhtheihna thlengin a tel a ni.

Pathian finna chu hmun dang zawng aiin mihring taksa siam dânah hian a lang fiah lehzual a. Entîr nân, nausên ṭhan chhoh dân hi han ngaihtuah teh. A insiam ṭan dân chu mûr (cell) pakhat aṭang a ni a, chutah chuan inthlah chhâwnna kaihhruaina zawng zawng a awm a ni. Chu mûr chu amah ang mûr tam takah a inṭhen darh a. Mahse, chûng mûrte chu a hun takah, thisen mûr, hriatna thazâm mûr, leh ruh mûr ang chi mûr hrang hrangah a insiam leh a ni. Rei vak lovah chuan, taksa pianphung neiin, hna a thawk ṭan a. Thla kaw chhûng lêkin, a tîr bera mûr chu mûr tlûklehdingâwn tam taka siam, nausên niin a lo awm ta a ni. Chu thil siama kan hmuh finna chuan mi tam tak chu: “Hlauhawm tak leh mak taka siam ka ni si a,” tia Bible ziaktu sawi hi ṭâwmpui tûrin a chêttîr a ni.—Sâm 139:14.

Engtin nge Pathian finna chu kan hlâwkpui? Siamtu chuan hlimna nei tûra kan mamawhte chu a hria a. Hriatna leh hriatthiamna nasa tak a neih avângin, a Thu, Bible-ah thurâwn fing tak tak min pe a ni. Entîr nân, Bible chuan: “Inngaidam tawn ula,” tiin min fuih a. (Kolossa 3:13) Chu chu thurâwn fing tak a ni em? Ni e. Doctor-te chuan ngaidam ṭhîntu chu tui taka a muthilh theih bâkah, a thisen kal pawh a ṭha tih an sawi a. Ngaihdamna chuan rilru beidawnna nasa tak leh hrisêl lohna dang tam tak pawh a titlêm thei bawk. Pathian chu thurâwn ṭha tak leh ṭangkai tak min pe ṭhîntu fing tak leh hmangaihna nei tak ṭhian ang a ni. (2 Timothea 3:16, 17) Chutiang mi chu ṭhianah i siam duh dâwn lawm ni?

“LALPA chuan rorêlna fel a ngaina si a.”—SAM 37:28.

Pathian chuan thil dik a ti reng ṭhîn. Dik tak chuan, “Pathian chuan thil suaksual tiin, Engkimtitheia chuan thil dik lo chu a ti teuh lo vang!” (Joba 34:10) Fakna hla phuahtuin: “Nangin mi tin chu thlei bîk nei lova ro rêlsakin,” tia Jehova chungchâng a sawi angin, a rorêlnate chu a dik a ni. (Sâm 67:4) ‘LALPA erawh chuan thinlung lam a en zâwk ṭhin’ avângin, ani chu bum theih a nih loh bâkah, thu dik a hriat theih reng avângin, dik takin ro a rêl ṭhîn bawk. (1 Samuela 16:7) Chu bâkah, Pathian chuan he leia rorêlna dik lo leh dik lo taka thiltih zawng zawng chu a hre vek a, rei lo têah “mi suaksualte erawh chu leilung ata tihboral an ni ang,” tih min tiam a ni.—Thufingte 2:22.

Mahse, Pathian chu mite hrem châk tak leh rorêltu râwng tak a ni lo. Ani chuan lainatna lantîr a ṭûl hunah a lantîr a. Bible chuan mi suaksualte chu an inchhîr tak zet chuan an tân “LALPA chu lainatnaa khat, mi khawngaih thei tak” a ni tih a sawi. Chu tak chu rorêlna dik a ni lâwm ni?—Sâm 103:8; 2 Petera 3:9.

Pathian rorêl dikna chu engtin nge kan hlâwkpui? Tirhkoh Petera chuan: “Pathianin mi duhsak bîk a nei lo tih dik takin ka hria e; nimahsela, hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tiin a sawi a. (Tirhkohte 10:34, 35) Pathianin mi thlei bîk emaw, duhsak bîk emaw a neih ngai loh avângin a rorêl dikna chu kan hlâwkpui a ni. Kan hnam te, zirna te, leh dinhmunte chu engpawh ni se, a pawm kan hlawh theiin, amah betute kan ni thei a ni.

Pathianin a rorêl dikna chu kan hriatthiam leh hlâwkpui tûra min duh avângin chhia leh ṭha hriatna min pe a. Bible chuan chhia leh ṭha hriatna chu kan nungchang a ṭhat leh ṭhat loh chungchânga ‘hriatpuitu,’ ‘thinlunga inziak’ tiin a sawi a ni. (Rom 2:13-16) Chu chu engtin nge kan hlâwkpui? Ṭha taka sawizawi kan chhia leh ṭha hriatna chuan thil hlauhawm leh dik lote ti lo tûrin min chêttîr thei a. Thil sual kan tih pawhin, inchhîr a, kawng dik zawh leh tûrin min chêttîr thei bawk. Dik tak  chuan, Pathian rorêl dikna chiang taka hriatna chuan min ṭanpui theiin, amah min hnaihtîr thei a ni!

“Pathian chu hmangaihna a ni si a.”—1 JOHANA 4:8.

Pathian chuan thiltihtheihna te, finna te, leh rorêl diknate lantîr mah se, Bible-in Pathian chu thiltihtheihna, finna, a nih loh leh rorêl dikna a ni tiin a sawi lo. Hmangaihna a ni tiin a sawi zâwk a ni. Engvângin nge? Pathian thiltihtheihna chuan thil a tihtheihtîr a, a rorêl dikna leh finna chuan thil ti tûrin a kaihruai tiin dik takin kan sawi thei a. Mahse, Jehova hmangaihna chuan thil ti tûrin a chêttîr thung. Hmangaihna chuan a thiltih engkimah a thunun a ni.

Jehova chuan engmah tlachham lo mah se, vânah leh leiah, a hmangaihna te, ngaihsaknate dawng a, hlâwkpui theitu tûr, hriatna nei thil siamte siam tûrin a hmangaihna chuan a chêttîr a ni. He lei hi a mihring siamte tâna in ṭha ber ni tûrin mahni hmasialna tel lovin a buatsaih a. Ani chuan a hmangaihna chu mi zawng zawng chungah lantîr zawm zêlin, “mi sualte leh mi ṭhate chungah chuan a nî a chhuahtîr ṭhîn a, mi felte leh mi fel lote chungah pawh ruah a sûrtîr ṭhîn a ni.”—Matthaia 5:45.

Chu bâkah, “Lalpa chu zahngaihna leh khawngaihnain a khat si a.” (Jakoba 5:11 C.L. Re-edited.) Amah hriat tum a, hnaih duhtu, thinlung dik tak pute chungah zahngaihna a lantîr a ni. Pathianin chûng mite chu a mi malin a hre ṭheuh va. Dik tak chuan, ‘ani chuan a ngaihsak ṭhîn che u,’ a ni.—1 Petera 5:7.

Pathian hmangaihna chu engtin nge kan hlâwkpui? Nî tla mawi tak hmuh chu nuam kan ti a. Nautê nui ri chuan min tihlim a ni. Kan pianpui unaute hmangaihna chu kan hlut hle bawk. Chûngte chu kan dam chhunzawm zêlna atâna neih ngei ngei ngai ni lo mah se, kan nun tinuamtute an ni tih erawh hai rual a ni lo.

Pathian hmangaihna kan hlâwkpui theih dân kawng dang leh chu ṭawngṭaina hi a ni a. Bible chuan: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se,” tiin min fuih a ni. Hmangaihna nei tak pa angin, ani chuan lungkhamna kan neih apiangin a ṭanpuina dîl tûrin min duh a. Chuvângin, Jehova chuan mahni hmasialna tel lo a hmangaihna avângin, “thlamuanna, rilru rêng rênga hriat sên loh,” pêk min tiam a ni.—Philippi 4:6, 7.

Hêng Pathian mize bulpuite—a thiltihtheihna, finna, rorêl dikna, leh hmangaihna—sawihona hian Pathian chu eng ang mi nge a nih tih hre thiam lehzual tûrin a ṭanpui che em? Pathian chungchâng hre thiam lehzual tûrin a thiltih tawhte leh i tâna a la tih tûrte chungchâng zir belh tûrin kan sâwm a che.