Mi tam tak chuan Pathian ring niin an inchhâl a. Mahse, Pathian chu tu nge a nih tia i zawh chuan chhânna chi hrang hrang i dawng ngei ang. Mi ṭhenkhat tân chuan Pathian chu rorêltu râwng tak, mite an thil tihsual avânga hrem ṭhîntu a ni a. Mi dangte tân chuan miin eng thil pawh ti se, Pathian chuan anni chu a ngaidamin, a hmangaih reng a ni. Mi dang lehte chuan Pathianin min hlat lutuk bâkah, min ngaihsak lo niin an ring a. Chutiang rin dân hrang hrangte avâng chuan mi tam takin Pathian chu hriat chian theih loh niin an ngai a ni.

Chu chu a pawimawh em? Pawimawh tak meuh mai. Pathian hriat chianna chuan thiltum leh nun awmze nei tak nei tûrin min ṭanpui thei a. (Tirhkohte 17:26-28) Pathian kan hnaih poh leh, a hmangaihna leh a ṭanpuina kan dawng nasa lehzual ang. (Jakoba 4:8) Dik tak chuan, Pathian chungchâng hriatna dik tak neihnain chatuan nunnaah min hruai thei a ni.—Johana 17:3.

Engtin nge Pathian i hriat theih? I hriat chian êm êm, i ṭhian ṭha tak tuemaw chu han ngaihtuah teh. Engtin nge chu inṭhian ṭhatna chu in neih chhoh? A hming te, a mizia te, a duh zâwng leh duh loh zâwng te, a thiltih tawhte leh a la tih tûrte bâkah, a chungchânga thil dangte pawh i hre ngei ang. Chûng a chanchin i hriatnate chuan a inhnaihtîr che a ni.

Chutiang bawkin, hêng a hnuaia thute ngaihtuahna hmangin Pathian kan hre thei a ni:

• PATHIAN HMING CHU TU NGE NI?

• ENG ANG MI NGE A NIH?

• PATHIAN THILTIH TAWHTE CHU ENG NGE NI?

• ENG ENG A TIH ANG?

• PATHIAN HRIATNA CHUAN I TAN ENG AWMZIA NGE A NEIH?

He magazine hi chûng zawhnate atâna Bible aṭanga chhânna pe tûra siam a ni a. Thuziakte chuan Pathian chu tu nge a nih tih chauh ni lovin, amah nêna mi mal inlaichînna neih kan hlâwkpui dân hre tûrin min ṭanpui ang.