He thuziak inzâwmah hian Pathian chu tu nge a nih? tih zawhna hre tûra min ṭanpuitu thilte kan zir tawh a. Bible aṭangin a hming chu Jehova a ni tih leh a mize langsâr ber chu hmangaihna a ni tih kan hria a ni. A thiltihte leh a mihring siamte hlâwkpui atâna a la tih tûrte pawh kan hre bawk. Pathian chanchin zir belh tûr tam tak a awm a; mahse, chutianga zirna chuan i tân awmzia a neih chhante i ngaihtuah mai thei a ni.

Jehova chuan “amah i zawn chuan i hmu ang,” tih a tiam che a. (1 Chronicles 28:9) Pathian i zawn a, i rawn hriat chhoh hian “LALPA ṭhian” nih theihna thilpêk hlu takin a nghâk che angin han mitthla teh! (Sâm 25:14 C.L. Re-edited.) Chutianga inṭhianna chuan i tân eng awmzia nge a neih theih?

Hlimna dik tak. Jehova chu “Pathian hlim,” nia târ lan a ni a. (1 Timothea 1:11, New World Translation.) Amah hnaih a, a kawngte i zawh chuan hlimna dik tak i nei ang a, rilru lam leh taksa lamah i hlâwkpui thei bawk ang. (Sâm 33:12) Nun dân ṭha lote pumpelh a, hrisêlna min neihtîr thei chîn dân ṭha te, leh mi dangte nêna inlaichînna ṭha neihna hmangin nun hlimawm tak kan nei thei bawk. Fakna hla phuahtuin: “Kei atân erawh zawng Pathian hnaih hi a ṭha a ni,” tia a sawi hi i pawm ve ngei ang.—Sâm 73:28.

Mi mal taka enkawlna leh ngaihsakna. Jehova chuan a chhiahhlawhte chu: “Ka mita en reng chung chein rem ka ruatsak zêl ang che,” tiin a tiam a. (Sâm 32:8) Ani chuan a chhiahhlawhte chu mi mal takin a ngaihsak a, an mamawh dik tak chu a pe tihna a ni. (Sâm 139:1, 2) Jehova nêna inlaichînna ṭha i neih tawh chuan, i tân a inpeih reng tih i hria ang.

Nakin hun ropui tak. Pathian Jehova chuan tûnah ngei pawh hlimna leh nun lungawithlâk tak a neihtîr che bâkah, nakin hun ropui tak neih theihna pawh a pe bawk che a. (Isaia 48:17, 18) Bible chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi. (Johana 17:3) He hun harsa takah hian, Pathian min pêk beiseina chuan thîrchakai angin ‘rinawm tak leh nghet takin’ min awmtîr reng thei a ni.—Hebrai 6:19.

A chunga kan sawi tâkte chu Pathian hre chiang lehzual tûr leh amah nêna inlaichînna ṭha nei tûra a pawimawh chhan tam tak zînga ṭhenkhat chauh a ni a. Thu ṭangkai tak takte i hriat belh theih nân Jehova Thuhretute zînga tuemaw chu be pawh la, a nih loh leh jw.org chu tlawh ang che.