Tuemaw hriat chian i duh chuan, a thil hlen chhuahte leh harsatna a pal tlang dânte i hriatna chuan a ṭanpui ngei ang che. Chutiang bawkin, Pathian hriat chian i duh chuan, a thiltih tawhte i hriat a ngai a. Chutianga kan hriat chuan, tûn hmaa a thiltih tam takte tûna kan hlâwkpui dân leh kan la hlâwkpui zêl dân tûrte i hriat chuan mak i ti mai thei a ni.

Pathian Jehova chu Siamtu Ropui a ni a, a “thil hmuh theih loh (a chatuan thiltihtheihna leh a Pathianzia chu) khawvêl siam tirh ata fiah taka hmuhin a awm a, thil siamah chuan a lang a ni.” (Rom 1:20) “A thiltihtheihnain lei a siam a, a finnain khawvêl a din a, a remhriatnain vân a tiparh a.” (Jeremia 10:12) Pathian thil siam mak takte chuan min ngaihsakzia a târ lang a ni.

Jehova’n mihringte chu ‘ama anpuia’ siamin, kan nun a siam danglam bîk dân hi han ngaihtuah teh. (Genesis 1:27) Tehkhin rual loh a miziate chu chhetê tal pawha lantîr thei tûrin min siam tihna a ni. Thlarau lam thilte ngaihven theiin, a nih loh leh a thlîr dânte leh a tehnate hre thiam thei tûrin min siam a. Chûng a tehnate mila nun kan tum hian, kan hlim lehzualin, nun awmze nei zâwk kan nei a. Chu bâkah, amah nêna inlaichînna neih theihna pawh min pe bawk.

Leilunga Pathian thil siamte kan en hian, min ngaihsakzia kan hre thei a. Tirhkoh Paula chuan Pathianin “amah hriattîrna awm lovin a insiam lo, chutin thil a ti ṭha ṭhîn a, vân ata ruahte leh kum ṭhat kumte a pe che u a, in rilru ei tûr leh lâwmnain a tikhah ṭhin che u kha,” tiin a sawi a ni. (Tirhkohte 14:17) Pathian chuan kan nun zêl theih nâna kan mamawhte aia tam min pe a. Hlim taka nun kan hman theih nân thil chi hrang tam tak min pe a ni. Chûngte chu Pathianin kan tân thil min tihsakte zînga tlêmte chauh a ni.

Pathian Jehova chuan leilung hi mihringte chatuana an nun theihna tûrin a siam a. Bible chuan: “Leilung erawh hi chu mihring fate a pe a,” chu  bâkah, “engmah lovah a siam lo va, mihring awm nân a din zâwk a ni,” tiin min hrilh a ni. (Sâm 115:16; Isaia 45:18) A nih leh, tute awmna tûr nge a nih a, eng chen nge an awm ang? “Mi felte chuan ram hi an luah ang a, a chhûngah hian kumkhuain an awm ang.”—Sâm 37:29.

Jehova chuan mi pa leh hmeichhe hmasa ber Adama leh Evi a siam a, lei paradis-ah “a enkawl leh vêng tûrin a dah ta a.” (Genesis 2:8, 15) Tichuan, hnathawh tûr phûrawm tak pahnih: “Chi tam tak thlaha lo pungin, leilung hi luah khat ula, in thu thuin awmtîr rawh u,” tiin thu a pe a ni. (Genesis 1:28) Chuvângin, Adama leh Evi chuan leia tâwp nei lo nun beiseina chu an nei a. Lungchhiatthlâk takin, Pathian thuâwih loh an thlan avângin ‘ram luahtu tûr’ “mi felte” zînga tel theihna chu an hloh ta a ni. Mahse, kan la hriat tûr angin, an thiltih chuan mihringte leh leilung tâna Pathian Jehova thiltum chu a tidanglam lo. A nih chuan, a hmasain, Pathian thiltih tawh ṭhenkhatte i lo ngaihtuah ang u.

Bible hi Pathian Thu tia hriat a ni a. Pathian Jehova’n engvângin nge Bible min pêk? A bîk takin, a chanchin kan zir theih nân a ni. (Thufingte 2:1-5) Bible chuan Pathian chungchânga kan zawhna engpawh chu a chhâng lo ngei mai—eng lehkhabu mahin a chhâng thei ngai lo. (Thuhriltu 3:11) Mahse, Bible-a chuang thu tinrêng hian Pathian hre tûrin min ṭanpui tak zet a ni. Mite a cheibâwl dân aṭangin eng ang Pathian nge a nih kan hre thei a. A mi duh zâwngte leh duh loh zâwngte pawh kan hre thei bawk. (Sâm 15:1-5) Biakna, leh nungchang lam leh khawvêl lam thilte chungchânga a thlîr dân kan hre thei a. Pathian Jehova miziate chu Bible-a târ lan a Fapa, Isua Krista thusawi leh thiltihte aṭangin chiang takin kan hre thei a ni.—Johana 14:9.

Jehova’n a Thu, Bible min pêk chhan dang leh chu nun hlimawm tak leh awmze nei tak kan hriat theih nân a ni a. Ani chuan Bible hmangin chhûngkaw nun hlim neih dân te, lungawina neih dân te, leh lungkhamna chinfel dânte min hrilh a. Bible chuan: Engvângin nge hrehawm tawrhna a tam êm êm? Nakin hunah eng nge lo thleng ang? tih ang chi nuna zawhna pawimawh tak takte chhânna a pe a, chûngte chu he magazine hian a hrilhfiah ang a. Atîra a thiltum tihfamkim nâna Pathian thiltih tawhte pawh a hrilhfiah bawk ang.

Bible ziaktu chu Pathian a nih avângin lehkhabu danglam bîk tak a nih chhan dang tam tak pawh a awm a. Kum 1,600 chuang chhûng mi 40 vêl ziah ni mah se, a Ziaktu dik tak chu Pathian a nih avângin thupui bîk a nei a. (2 Timothea 3:16) Hmân lai lehkhabute nêna inang lo takin, hmân lai kutziak Bible sâng tam takte’n an finfiah angin, vawiin nî thlengin a chhûng thute chu a vawng dik reng a ni. Chu bâkah, Bible hi lehlinna, tihchhuahna, leh chhiarna kawngah minte’n khapbeh tum ṭhîn mah se, an hlawhtling lo. Tûn laiah, Bible chu khawvêla tihchhuah tam ber leh lehkhabu lehlin tam ber a ni. Bible awm rengna hian “kan Pathian thu erawh chu chatuanin a awm reng ang,” tia a sawi hi a dikzia a finfiah a ni.—Isaia 40:8.

Pathian chuan kan tâna a thiltumte chu a thleng famkim ngei ang tih a tiam a ni. Kan sawi tâk angin, Pathianin mihringte chu leia chatuana nung tûrin a duh a. Mahse, Adama’n Pathian thu âwih lo tûra duhthlanna siama, thil sual a tih khân, ama tân chuah ni lovin, nakina a fate tân pawh chatuana nun theihna chu a hloh ta a ni. “Mi pakhat avângin sual khawvêlah a lût a, sual avângin thihna a lût bawk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a.” (Rom 5:12) Mihring thuâwih lohna avângin leilung tâna Pathian thiltum chu thleng famkim thei lo angin a lang a. Engtin nge Jehova’n a chhân lêt?

Pathian Jehova chuan a miziate nêna inmilin thil a ti ṭhîn a. Ani chuan Adama leh Evi chu an thiltih mawh a phûrhtîr a; mahse, nakina a thlahte tân hmangaih takin ruahmanna a siamsak a ni. A finna hmangin, chu dinhmun chu chinfel a tum a, a chinfel dân tûr pawh a puang nghâl a. (Genesis 3:15) Sual leh thihna ata chhuah theihna kawng  chu Pathian Fapa, Isua Krista hmangin a ni ang. Chutah chuan eng nge tel?

Adama helna sawhkhâwk ata mihringte chhan chhuak tûrin, Jehova’n Isua chu mite nun kawng zirtîr tûr leh “mi tam tak tlan nâna a nun pe” tûrin leiah a rawn tîr a. * (Matthaia 20:28; Johana 14:6) Isua chu Adama anga mi ṭha famkim a nih avângin, ani chuan tlanna a pe thei a ni. Mahse, Adama nên in ang lo takin, Isua chuan thih thlengin thuawihna ṭha famkim a lantîr a. Isua chu thi tlâk a nih loh avângin, Pathianin vân nunna chang tûrin a kai tho leh a ni. Tûnah chuan, Isua’n Adama tih theih loh—thuawih mihringte hnêna chatuana nun beiseina chu a pe thei ta a. “Mi pakhat tihmawh avâng khân mi tam tak chu mi sual an lo ni ta a; chutiang bawkin mi pakhat tihâwih avâng khân mi tam tak chu mi fel an lo ni ang.” (Rom 5:19) Isua tlanna inthâwina hmangin, Pathian chuan mihringte leia chatuana nung tûra a thutiam chu a tifamkim tawh ang.

Adama thuâwih lohnain a tihchhuah buaina a chinfel dân aṭangin Pathian Jehova chanchin tam tak kan hria a. Ani chuan thil ti tûra a ṭan tawh chuan, chu chu hlawhtling lo tûrin engmahin a dâl thei lo tih kan hmu a, a thu chu “a hlawhtling” ang. (Isaia 55:11) Jehova’n min hmangaih tak zet tih pawh kan hria a. “He miah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian. He miah hian hmangaihna a awm, keimahnin Pathian kan hmangaih ka ti a ni lo va, amahin min hmangaih a, kan sualte thupha chawina ni tûrin a Fapa a rawn tîr ka ti a ni zâwk e.”—1 Johana 4:9, 10.

Pathian chu “ama Fapa ngei pawh zuah lova, kan zaa aia petu,” a nih avângin a thutiam angin, ani chuan “thil zawng zawng pawh athlâwnin min pe” ang tih kan chiang thei a ni. (Rom 8:32) Pathianin eng thil tihsak tûrin nge min tiam? Chhiar zawm ang che.