Nakin Hun Tûr Chungchâng Thutak
Nakin hun tûr chungchâng i ngaihtuah ngai em? Bible chuan kan hma lawka lo thleng tûr thilthleng pawimawh takte’n leia mi zawng zawng a nghawng dân tûr a târ lang a ni.
Isua chuan ‘Pathian Ram a lo hnai tawh tih kan hriat’ theih dân tûr min hrilh a. (Luka 21:31) Thil dang tam tak bâkah, indona nasa takte leh lîrnghîng lian tham tak takte a awm ang a, ṭâmte a tlain, hrite a lêng ang tia a lo hrilh lâwk chu tûn laiah kan hmu vek tawh a ni.—Luka 21:10-17.
Bible chuan mihringte rorêlna atâna ‘ni hnuhnûng’ chu mite nungchang, chiang lehzuala sawi chuan, nungchang ṭhat loh dân aṭanga hriat theih a ni ang tih a sawi bawk. Timothea thawn hnih 3:1-5-a târ lante chu i chhiar thei a ni. Chutiang rilru put hmang leh thiltihte i hmuh chuan, chu Bible hrilh lâwkna leh tûn laia thilthlengte chu a inmil tih i pawm ngei ang.
A nih leh, chumi awmzia chu eng nge ni? Leia mite’n nun ṭha zâwk an neih theih nâna inthlâk danglamna lian tak thlentîrtu tûr Pathian Ram chu a hnai tawh tihna a ni. (Luka 21:36) Bible-ah chuan Pathianin lei leh a chhûnga chêng tûrte tân thil ṭha tam tak a tiam a. Chûng zînga ṭhenkhat chu hêngte hi a ni.
RORELNA ṬHA
“Tin, rorêlna te, ropuina te, ram te a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân: a rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang.”—DANIELA 7:14.
Chumi awmzia chu: Pathianin Lala a ruat a Fapa hmanga a din khawvêl pum huap sawrkâr ṭha tak hnuaiah nun i chên thei a ni.
HRISELNA ṬHA
“Chumi khuaa awm chuan, ‘Ka dam lo ve,’ a ti lo vang.”—ISAIA 33:24.
Chumi awmzia chu: Dam lo leh ramtuileilovin i awm ngai lo vang a; thi lovin i nun reng tawh ang.
REMNA TLUANTLING
“Ani chuan indonate chu kâwlkil thlengin a tireh ṭhîn a.”—SAM 46:9.
Chumi awmzia chu: Indona avânga hlauhna leh hrehawm tawrhnate a awm tawh lo vang.
LEIAH MI ṬHATE CHAUH AN AWM TAWH ANG
“Mi suaksual chu a awm tawh dâwn si lo . . . Thuhnuairawlhte erawh chuan ram hi an luah ang.”—SAM 37:10, 11.
Chumi awmzia chu: Mi suaksual an awm tawh lo vang a, Pathian thuâwihte chauh an awm tawh ang.
LEI PUMPUI HI PARADIS A NI ANG
“Inte an sa ang a, chûngah chuan an awm reng bawk ang; grêp huante an siam ang a, a rah an ei bawk ang.”—ISAIA 65:21, 22.
Chumi awmzia chu: Lei pumpui hi mawi taka siam a ni ang a. A duh zâwng “leia” thleng tûra kan ṭawngṭaina chu Pathianin a thlen famkimtîr ang.—Matthaia 6:10.
