Pathian Hming Chu Tu Nge Ni? Pathian ngei chuan: “Kei Jehova ka ni,” tiin a sawi. (Exodus 6:2) Bible-ah hian Pathian hming bil chu vawi 7,000 vêl a chuang a. Mahse, Bible lehlin tam takah chuan chu hming chu “Lalpa” ang chi a nihna nêna inâwm lo taka thlâk a ni. Pathianin a ṭhian ni tûra a duh che avângin, “a hming lam” tûrin a fuih che a ni.—Sâm 105:1.

Jehova Nihnate. Bible chuan Jehova sawi nân “Pathian,” “Engkimtithei,” “Siamtu,” “Pa,” “Lalpa,” tih leh “Chungnungber,” tih ang chi a nihnate a hmang a. Ṭawngṭaina tam tak chu Bible-ah chhinchhiah a ni a, chûngahte chuan Jehova chu nihna zahawm tak leh a hming bil Jehova tia sawi lan a ni.—Daniela 9:4.

 Pathian Lan Dân. Pathian chu hmuh theih loh thlarau a ni a. (Johana 4:24) Bible chuan ‘tu mân Pathian an hmu lo,’ tia sawiin chu chu a nemnghet a ni. (Johana 1:18) Chu bâkah, a rilru vei zâwngte a târ lang bawk. Mite chuan ani chu an tilungngai theiin, an ‘tilâwm’ thei a ni.—Thufingte 11:20; Sâm 78:40, 41.

Pathian Mize Ropui Takte. Pathian chuan ṭobul inang lo hnam tina mite chu duhsak bîk nei lovin a cheibâwl a. (Tirhkohte 10:34, 35) Ani chu “lainatnaa khat, mi khawngaih thei tak, thin nel tak, ngilneihna leh thu tak ngah” a ni bawk. (Exodus 34:6, 7) Mahse, Pathian mize palite chuan a bîk takin min hîp a ni.

Thiltihtheihna. “Pathian Engkimtitheia” a nih avângin, a thutiam engpawh tihlawhtling tûrin thiltihtheihna a nei a ni.—Genesis 17:1.

Finna. Pathian finna chu tu dang zawng aiin a chungchuang bîk a. Chutiang a nih avângin Bible chuan “Pathian finga chauh,” tiin a sawi a ni.—Rom 16:27.

Rorêlna Dik. Pathian chuan thil dik a ti reng a. A thiltihte chu ‘a fel famkim a,’ ani chu “khawlohna nei lo” a ni.—Deuteronomy 32:4.

Hmangaihna. Bible chuan “Pathian chu hmangaihna a ni,” tiin a sawi a. (1 Johana 4:8) Pathian chuan hmangaihna a lantîr mai ni lovin, amah ngei chu hmangaihna chhinchhiahna ber a ni. A hmangaihna chungnung tak chuan a thiltih apiangah a thunun a, chu chu kawng tam takin kan hlâwkpui a ni.

Mihringte Nêna Pathian Inṭhian Ṭhatna. Pathian chu hmangaihna nei tak kan Pa vâna mi a ni a. (Matthaia 6:9) A chunga rinna kan neih chuan a ṭhiante kan ni thei a ni. (Sâm 25:14) Dik tak chuan, Pathianin ṭawngṭaia amah hnaih tûr leh ‘min ngaihsak ṭhin avânga kan manganna zawng zawng ama chunga nghat vek’ tûrin min sâwm a ni.—1 Petera 5:7; Jakoba 4:8.

Isua Chu Pathian A Ni Lo. Isua chu a danglam bîk hle a—Pathianin a kut ngeia a siam awmchhun a ni. Chuvângin, Bible-ah chuan ani chu Pathian Fapa tia koh a ni a. (Johana 1:14) Isua a siam hnu chuan, Jehova’n a fa tîr chu mihringte leh thil dang zawng zawng siam nân “mi themthiam angin” a hmang a ni.—Thufingte 8:30, 31; Kolossa 1:15, 16.

 Isua Krista Chuan Pathian Niin A Inchhâl Ngai Lo. Chu aiin, ani chuan: “A [Pathian] hnên aṭanga lo chhuak ka ni a, ani chuan mi tîr a ni,” tiin a sawi zâwk a ni. (Johana 7:29) A zirtîrte zînga pakhat hnênah, Isua chuan Jehova chu “Ka Pa, in Pa, ka Pathian, in Pathian,” tiin a ko va. (Johana 20:17) Isua thih hnuah, Jehova chuan vâna nung tûrin a kaitho leh a, A ding lamah ṭhuttîrin thuneihna sâng tak a pe a ni.—Matthaia 28:18; Tirhkohte 2:32, 33.

Isua Krista Chuan Pathian Hnaih Tûrin Min Ṭanpui Thei

Isua chu a Pa chanchin min zirtîr tûrin leiah a lo kal. Pathian Jehova ngeiin Isua chungchângah: “Hei hi ka Fapa duh tak a ni, ama thu ngai rawh u,” tiin a sawi a. (Marka 9:7) Isua chuan tu dang zawng aiin Pathian chanchin a hre zâwk a. Ani chuan: “Pa pawh chu tu nge a nih, Fapa leh an hnêna Fapain a puan duhnate chauh lo chuan tu mân an hre lo,” tiin a sawi.—Luka 10:22.

Isua chuan Pathian miziate chu ṭha famkimin a lantîr. Isua’n a Pa miziate ṭha famkima a entawn avângin: “Tu pawh mi hmu chu Pa hmu a ni,” tiin a sawi thei a. (Johana 14:9) Isua chuan a thusawi leh thiltihah a Pa hmangaihna a lantîr avângin, mite chu Pathian a hnaihtîr a ni. Ani chuan: “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo,” tiin a sawi. (Johana 14:6) Chu bâkah: “Pathian chibai bûktu tak takten thlarau leh tih tak zetin Pa chibai an bûk ang, Pain chutiang mi chu a chibai bûktu tûrin a zawng a ni,” tiin a sawi belh bawk. (Johana 4:23) Chu chu han ngaihtuah teh! Jehova chuan nangmah anga a chungchâng thutak hre duhtute chu a zawng a ni.