“Pa hnênah eng pawh in dîl chuan, keima hmingin a pe ang che u.”—Johana 16:23.

Isua thusawi chuan Jehova’n milemte, mi thianghlimte, vântirhkohte, leh thlahtu thi tawhte kal tlang ni lovin, Isua Krista hminga a hnêna ṭawngṭai tûrin min duh tih chiang takin a târ lang a. Isua hminga Pathian hnêna kan ṭawngṭai hian Isua chanvo pawimawhzia kan hria tih kan târ lang a ni. Isua chuan, ‘Keimaha kal lo chu tu mah Pa hnênah an thleng thei lo,’ tiin a sawi.—Johana 14:6.

“In thinlung chu a hmaah chuan leihbaw rawh u.”—Sâm 62:8.

Jehova hnêna kan ṭawngṭai hian hmangaihna nei tak pa hnêna thu kan sawi angin kan sawi tûr a ni. Lehkhabu aṭanga chhiar chhuah emaw, hriat sa chham nawn fo emaw aiin, thinlung tak leh zah takin kan sawi zâwk tûr a ni.

‘Eng pawh a duh zâwng anga kan dîl chuan anin min ngaihthlâksak ṭhîn.’—1 Johana 5:14.

Pathian Jehova chuan kan tâna a thiltih tûrte leh a tâna ti tûra min duhte chu a Thu Bible aṭangin min hrilh a. Chuvângin, kan ṭawngṭainate a chhân kan duh chuan “a duh zâwng” mila kan ṭawngṭai a ngai a ni. Chutianga ti tûr chuan, chiang taka amah kan hriat theih nân Bible kan zir a ngai a. Chutianga kan tih chuan kan ṭawngṭainate chuan amah a tilâwm ang.

I mamawhte chu ṭawngṭaiin dîl rawh. Pathian hnênah ei tûr te, silh leh fên te, leh chênna tûr inte ang chi, kan nî tin mamawhte min pe tûrin kan ṭawngṭai thei a. Thu tlûkna dik siam tûra kan mamawh finna leh fiahnate chhel taka tuar thei tûra kan mamawh chaknate min pe tûrin kan dîl thei bawk. Rinna kan neih theih nân te, kan sual ngaihdam a nih theih nân te, leh a ṭanpuinate dîlin kan ṭawngṭai thei bawk a ni.—Luka 11:3, 4, 13; Jakoba 1:5, 17.

Mi dangte tân ṭawngṭai rawh. Hmangaihna nei tak nu leh pate chu an fate an inhmangaih tawn hian an lâwm hle a. Jehova pawhin leia a fate chu inngaihsak tawn tûrin a duh a ni. Chutiang bawkin, kan kawppui te, kan fate, kan chhûngkua te, leh kan ṭhiante tâna ṭawngṭai chu thil inâwm tak a ni a. Zirtîr Jakoba pawhin, “Inṭawngṭaisak tawn ṭhîn rawh u,” tiin a ziak a ni.—Jakoba 5:16.

Lâwm thu sawiin ṭawngṭai rawh. Min Siamtu chungchângah Bible chuan: “Vân ata ruahte leh kum ṭhat kumte a pe che u a, in rilru ei tûr leh lâwmnain a tihkhah ṭhin che u kha,” tiin a sawi. (Tirhkohte 14:17) Pathianin kan tâna min tihsak zawng zawngte kan ngaihtuah hian a hnêna lâwmthu sawi duhna kan nei a ni. Chu bâkah, kan nun dân kawng pawhin Pathian chunga kan lâwmzia lantîr kan duh bawk.—Kolossa 3:15.

Thinlung taka kan ṭawngṭainate chhân a nih nghâl loh avângin lunghnual châng kan nei mai thei a. Chu chu Pathianin min ngaihsak lo tihna a ni em? Ni lo ve! Kan ṭawngṭai zawm zêl a ngai tih târ langtu a hnuaia thiltawnte hi han ngaihtuah teh.

Thuziak hmasa bera târ lan Steve-a chuan, “Ṭawngṭai zawm zêl lo ila chuan hlimna rêng ka nei tawh lo vang,” tiin a sawi. Engin nge ani chu thlâk danglam? Bible a zir ṭan a, ṭawngṭai fan fan a ngai tih a hre ta a ni. Ani chuan, “Pathian hnênah ka ṭhian duh takte hnên aṭanga ka dawn ṭanpuina zawng zawng avânga ka lâwmzia hrilhin ka ṭawngṭai a, tûnah chuan, tûn hma zawng aiin ka hlim tawh zâwk a ni,” tiin a sawi.

A ṭawngṭainate chu Pathian ngaihthlâk tlâk loh nia ngaitu Jenny-i chungchâng hi eng nge ni ve? Ani chuan, “Ka lunghnual lai berin chutianga hlutna nei lo nia inhriatna ka neih chhante hre thiam tûrin Pathian hnênah ṭanpuina ka dîl,” tiin a sawi. Chu chuan engtin nge a ṭanpui? Ani chuan, “Pathian thlîr dân anga mahni inthlîr thiam tûr leh mahni inthiam lohna ka neih hunah pawh Pathianin chutiang chuan min thlîr lo tih hre tûrin min ṭanpui a. Chu chuan beidawng mai lova bei fan fan tûrin min ṭanpui a ni,” tiin a sawi. Eng nge a rah chhuah? “Ṭawngṭaina chuan Pathian Jehova duh zâwng ti tûra theih tâwp ka chhuah chhûng chuan, Ani chu min ṭanpui tûra inpeih rengtu mi tak tak, hmangaihna nei tak, leh ngaihsakna nei tak Pathian, Pa, leh ṭhian anga hmu tûrin min ṭanpui a ni,” tiin.

Isabel-i thiltawn pawh hi han ngaihtuah teh. Nau a pai laiin doctor-in ramtuileilovin fa a hring ang tih a hrilh a. Chu chuan a rilru a tihrehawm ta hle a. Ṭhenkhat chuan nau titla tûrin an fuih hial a ni. “Ka rilru a ipik lutuk chu thi dâwn ni hian ka inhria a,” tiin a sawi. Eng nge a tih tâk? Ani chuan, “Min ṭanpui tûrin Pathian hnênah ka ṭawngṭai mawlh mawlh a,” tiin a sawi. A hnuah, fapa Gerard-a a nei a, ani chu ramtuileilo a ni. Isabel-i chuan a ṭawngṭaina chu Pathianin a chhâng niin a hria em? Hria e! Eng kawngin nge? “Kum 14 mi ka fapa hi ramtuileilo ni mah se, a nun chu hlim taka a hmang ka hmuh hian ani chu ka ṭawngṭaina chhânna leh Pathian Jehova malsâwmna nasa tak a ni tih ka hria,” tiin a sawi.

Chutianga lâwmthu sawina chuan fakna hla phuahtu thusawi: ‘LALPA, thuhnuairawlhte duh zâwng chu i ngaithla tawh a: an thinlung chu i buatsaih ang a, i beng chu i ngaihthlâktîr ang,’ tih hi min hriat chhuahtîr a ni. (Sâm 10:17) Ṭawngṭai fan fanna tûr chhan ṭha tak a va ni êm!

Bible-ah hian Isua ṭawngṭaina tam tak chhinchhiah a ni a. Hriat lâr ber chu a hnungzuitute hnêna ṭawngṭai dân a zirtîr kha a ni. Chu ṭawngṭaina aṭang chuan eng nge kan zir theih?