Pathianin Kan Ṭawngṭainate A Ngaithla Em?
I ṭawngṭai hian Pathianin a ngaihthlâk leh thlâk loh i ngaihtuah tawh ṭhîn em? I ngaihtuah ṭhîn a nih chuan, nangmah chauh i ni lo. Mi tam tak chuan an harsatnate avângin ṭawngṭaiin Pathian an pan a; mahse, an harsatnate chu a bo chuang lo. Chu chu Pathianin kan ṭawngṭainate a ngaithla lo tihna a ni em? Ni lo ve! A duh zâwng mila kan ṭawngṭai chuan Pathianin min ngaihthlâksak tih Bible-in min tiam a ni. Ṭawngṭaina chungchânga Bible sawite chu i lo enho ang u.
PATHIANIN A NGAITHLA.
“Aw, ṭawngṭaina ngaithlatu, i hnênah tisa zawng zawng chu an lo kal ang.”—Sâm 65:2.
Mi ṭhenkhat chuan an ṭawngṭainate ngaithlatu an awm ring lo mah se, ṭawngṭainain rilru nawmna a thlen avângin an ṭawngṭai ṭhîn a. Mahse, ṭawngṭaina chu kan harsatnate hmachhawn thei tûra rilru hahdamna min thlentu mai a ni lo. Bible chuan: “[“Jehova,” NW] * chuan a kotu zawng zawngte chu a hnaih ṭhîn a. Tih tak zeta amah kotu zawng zawngte chu. . . . An au thâwm a hria,” tiin a sawi.—Sâm 145:18, 19.
Chuvângin, Pathian Jehova chuan amah chibai bûktute ṭawngṭaina chu a ngaithla tih kan chiang thei a. Ani chuan hmangaihna nei takin: “Min lam ang a, ka hnênah in rawn ṭawngṭai ang a, ka ngaithla ang che u,” tiin a sawi a ni.—Jeremia 29:12.
PATHIANIN A HNENA ṬAWNGṬAI TURIN A DUH CHE.
“Ṭawngṭaina kawngah chuan ṭawngṭai fan fan ula.”—Rom 12:12.
Bible chuan ‘bâng lova ṭawngṭai’ tûr leh ‘eng hun pawha ṭawngṭai’ tûrin min fuih a. Pathian Jehova chuan a hnêna ṭawngṭai tûrin min duh tih a chiang a ni.—1 Thessalonika 5:17; Ephesi 6:18.
Engvângin nge Pathianin a hnêna ṭawngṭai tûra min duh? Hei hi han ngaihtuah teh: Pate zîngah an fate’n, “Pa, min ṭanpui thei ang em?” tia ṭanpuina an dîl hian tu nge ṭanpui duh lo awm ang. Pate chuan an fate mamawh leh rilru vei zâwngte chu hre mah se, chutianga fate ṭanpui dîlna an hriat hian, an fate’n an rinchhanin, hnaih an duh tih a hriattîr a. Chutiang bawkin, Pathian Jehova hnêna kan ṭawngṭai hian, chu chuan amah kan rinchhanzia leh hnaih kan duhzia a târ lang a ni.—Thufingte 15:8; Jakoba 4:8.
PATHIANIN A NGAIHSAK TAK ZET CHE.
“Anin a ngaihsak ṭhin che u avângin, in manganna zawng zawng ama chungah nghat vek rawh u.”—1 Petera 5:7.
Pathian chuan min hmangaiha min ngaihsak avângin a hnêna ṭawngṭai tûrin min duh a. Kan lungkhamnate leh mangannate a hriat vek avângin min ṭanpui a duh a ni.
Lal Davida chuan a dam chhûngin Pathian Jehova hnênah ṭanpuina dîlin, a rilru vei zâwngte leh a ngaihtuahnate chu a hrilh ṭhîn a. (Sâm 23:1-6) Pathianin Davida chu engtin nge a thlîr? Ani chu a hmangaih êm avângin a ṭawngṭainate chu a ngaihthlâksak a ni. (Tirhkohte 13:22) Chutiang bawkin, Pathianin min ngaihsak avângin kan ṭawngṭainate chu a ngaithla a ni.
‘LALPA CHU KA HMANGAIH A NI, KA AW A NGAIHTHLAK AVANGIN’
Chûng thute chu Bible-a fakna hla phuahtute zînga pakhat thusawi a ni a. Ani chuan a ṭawngṭainate chu Pathianin a ngaithla tih a hre chiang a, chu chuan a chungah nghawng nasa tak a nei a. Pathian hnaih nia a inhriat avângin nuna harsatnate leh lungkhamnate chingfel thei tûrin chakna a nei a ni.—Sâm 116:1-9.
Pathianin kan ṭawngṭainate a ngaithla tih kan hriat chian chuan kan ṭawngṭai zawm zêl ang. Spain hmâr lama awm Pedro-a thiltawn hi han ngaihtuah teh. Ani chuan motor chêtsualnaah kum 19 mi a fapa chu a chân a. A sûn êm avângin, Pathian hnênah thlamuanna leh ṭanpuina dîlin thinlung takin a ṭawngṭai fo va. Eng thil nge thleng? Pedro-a chuan, “Jehova’n ka ṭawngṭaina chu ka nupui leh ka Kristian unaute hnên aṭanga thlamuanna leh ṭanpuina hmangin min chhâng,” tiin a sawi.
Kan ṭawngṭainate chu min ngaihsaktu kan ṭhiante hnên aṭanga thlamuannate leh ṭanpuinate hmangin chhân a ni fo ṭhîn
Ṭawngṭainain a fapa chu kaitho lo mah se, amah leh a chhûngkua chu kawng pawimawh takin a ṭanpui a ni. A nupui María Carmen-i chuan: “Ṭawngṭainate chuan ka lu sûnna tuar thiam tûrin min ṭanpui a. Ka ṭawngṭai hian rilrua thlamuanna ka neih avângin, Pathian Jehova’n ka tawrhna chu min hriatthiampui tih ka hria a ni,” tiin a sawi.
Bible leh chûng mi mal thiltawnte chuan Pathianin kan ṭawngṭainate a ngaithla tih chiang takin a târ lang a. Mahse, ṭawngṭaina zawng zawng chu a chhâng vek lo tih a chiang bawk. Engvângin nge Pathianin ṭawngṭaina ṭhenkhat chu a chhân a, a dang chu a chhân loh?
^ par. 5 Jehova chu Pathian hming bil a ni.—Sâm 83:18.
