Inhuatna A Bo Hlen Hun Tûr Chu!
Kan thinlung aṭangin huatna paih bo tawh mah ila, mi dangte thiltih leh rilru put hmang chu kan thunun thei lo. Chuvângin, pawisawi lo mite chuan huat an la hlawh zawm zêl a ni. A nih chuan, tuin nge inhuatna hi nuai bo hlen thei ang?
Pathian Jehova chauhvin tûn laia kan hmuh inhuatnate hi a nuai bo hlen thei a. Chutiang chuan a ti ngei dâwn tih Bible chuan min tiam a ni.—Thufingte 20:22.
PATHIANIN INHUATNA AWMTIRTUTE CHU A NUAI BO HLEN ANG
-
1. DIABOL-SETANA. Vântirhkoh hel Setana chu tûn laia kan hmuh inhuatna awmtîrtu ber a ni a. Pathian chuan Setana leh a thununna hnuaia awm zawng zawngte chu a tiboral vek ang.—Sâm 37:38; Rom 16:20.
-
2. INHUATNAA KHAT SETANA KHAWVEL. Pathianin inhuatna chawk thotu ei rûk hmang politician-te leh sakhaw hruaitute pawh tiamin, he khawvêla thil ṭha lo zawng zawng hi a nuai bo vang. Chu bâkah, duhâmna leh dik lo taka thiltihnatea khat sumdâwnna khawvêl pawh a nuai bo bawk ang.—2 Petera 3:13.
-
3. MIHRING ṬHAT FAMKIM LOHNA. Bible chuan mi zawng zawng hian ṭhat famkim lohna—sual lam ngaihtuahna, rilrua veina, leh tih duhna kan rochun tih a sawi a. (Rom 5:12) Sual lam tih duhna kan nei tih târ langtu pakhat chu mi dangte chunga huatna kan lantîr ṭhîn hi a ni. Pathianin mihringte chu chutiang ṭhat famkim lohna zawng zawng hneh tûra a ṭanpui dâwn avângin, inhuatna zawng zawng chu chatuanin a bo tawh ang.—Isaia 54:13.
BIBLE CHUAN INHUATNA AWM LOHNA KHAWVEL A TIAM
-
1. RORELNA DIK LO A AWM TAWH LO VANG. Pathian Ram chuan vân aṭangin leiah chatuain ro a rêl tawh ang. (Daniela 2:44) Inpâwng huatna leh dawhtheih lohnate a awm tawh lo vang a. Pathianin tûna mihringte’n kan hmachhawn mêk rorêlna dik lo zawng zawng hi a siam ṭha vek tawh ang.—Luka 18:7.
-
2. MI TININ REMNA AN NEI ANG. Tu mahin tharum thawhna leh indona avângin hrehawm an tuar tawh lo vang a. (Sâm 46:9) Lei hi remna ngainatute chênna hmun him tak a ni tawh ang.—Sâm 72:7.
-
3. MI TIN CHU DINHMUN ṬHA BER HNUAIAH CHATUANIN AN NUNG TAWH ANG. Leia chêng zawng zawngte chuan vêngte hmangaihna dik tak an lantîr ṭheuh tawh ang a. (Matthaia 22:39) Tu mah rilru hrehawmin an awm tawh lo vang a, rilru tinatu thilte chu an hre reng tawh hek lo vang. (Isaia 65:17) Chutih hunah chuan, inhuatna rêng rêng a awm tawh lo vang a, mihringte chu “remna chênin an hmuingîl ang.”—Sâm 37:11.
Chutiang khawvêla nun chu i châk em? Tûnah ngei pawh, mi tam tak chuan Bible thu bulte nunpuiin, huatna hneh theih dân an zir mêk a. (Sâm 37:8) Chu chu khawvêl pum huapa Jehova Thuhretu mi maktaduai tam takte tih mêk a ni. Anni chu hnam leh ṭobul hrang hranga mite ni mah se, hmangaihna leh inpumkhatnaa phuar khâwm chhûngkaw khat ang a ni.—Isaia 2:2-4.
Jehova Thuhretute chuan rorêlna dik lo leh thlei bîk neihna chinfel theih dân chungchânga an thu zirte hrilh che chu an châk hle a. I thu zirte chuan huatna paih bo va, hmangaihna lantîr tûrin a ṭanpui thei che a. Lâwm nachâng hre lo leh huatna nei mite pawh tiamin, mi zawng zawng chu hmangaihna nei taka cheibâwl dân i hre thei a ni. Chûngte chuan, tûna i hlimna tipung tûr leh mi dangte nêna inlaichînna ṭha lehzual nei tûrin a ṭanpui ang che. A pawimawh berah chuan, chatuana inhuatna a bo hlen hun tûr Pathian Lalrama chêng tûra i tih theihte chu i hre bawk ang.—Sâm 37:29.
You May Also Like
VENNAINSANG
Pathian Ramin Eng Nge A Hlen Chhuah Ang?
Isua chuan Pathian Ram chu leia buaina zawng zawng chingfel thei sawrkâr awmchhun a ni tih a hria. Kan rinchhan theih nân chu Ram chuan eng thilte nge a tih tawh?
