I la hlawh ngai lo a nih pawhin, inhuatna chu kawng eng emaw taka i hmuh tawh ngei a rinawm. Ram dang mi leh hnam dang mi an nih avâng leh neih inang kawp chîng mi an nih avânga mite huat hlawh a, dik lo taka cheibâwl tâwktute chu kan hmu ṭhînin an chanchinte kan hre fo va. Chuvângin, sawrkâr tam tak chuan hnam dang mi huatna avânga dân bawhchhetute hrem nân dânte an siam a ni.

Inhuatna chuan inhuatna nasa zâwk a hring chhuak a. Huat hlawhtute chuan phuba an lâk fo ṭhin avângin inhuatna chu a thleng leh ṭhîn.

Inpâwng huatna te, nuihsawhna te, hmuhsitna te, leh vaunate chu i tâwk tawh ṭhîn pawh a ni thei. Mahse, inhuatna chuan chu aia thil pawi zâwk pawh a thlen fo ṭhîn a. Thinurna nasa tak te, mi dang hnehchhiahna te, an thil neih tihchhiatna te, pâwngsualna te, tualthahna te, leh hnam insuatnate hial pawh a hring chhuak ṭhîn a ni.

He magazine hian a hnuaia zawhnate hi a chhâng ang a, inhuatna hneh theih dân pawh a târ lang bawk ang:

• Engvângin nge inhuatna a hluar êm êm?

• Engtin nge inhuatna thleng leh ṭhîn chu kan tihtâwp theih?

• Inhuatna awm tawh loh hun a thleng ngai ang em?