Bible chu rilru put hmang inang lo tak tak nei a hmei a pate chanchinin a khat a. An thiltawnte kan chhiar hian kan rilru put hmang ang pu an awm tih kan hre mai thei.

Mi dangte’n kan rilru min hriatthiampui kan mamawh ṭheuh va. A bîk takin, rilru hrisêlna lama harsatna kan neih hian a ni lehzual a ni. Bible kan chhiar hian kan ngaihtuah ang leh kan rilru ang pu mi dangte chungchâng kan hre thei a. Chuvângin, lungkhamna nasa tak leh rilru lama harsatna kan hmachhawn hian keimahni ang bawkin, mi dangte pawhin hrehawm an tuar tih kan hriat avângin mal lutuk angin kan inhre lo.

• Bible-ah hian ṭanpuitu nei lo anga inngai leh mi beidawng takte thusawi tam tak chhinchhiah a ni a. Dam zêl châkna nei tawh lo khawpin i awm tawh ngai em? Mosia, Elija, leh Davida te chu chutiang chuan an awm a ni.—Numbers 11:14; 1 Lalte 19:4; Sâm 55:4.

• Bible chuan fa a neih theih loh avâng leh, amah ertu Penini’n nasa taka a deusawh ṭhin avânga ‘rilru mangang êm êma awm’ hmeichhe pakhat Hani chungchâng min hrilh a ni.—1 Samuela 1:6, 10.

• Bible chuan a dinhmun kan hriatthiampui theih Joba chungchâng a sawi a. Ani chuan rinna chak tak nei mah se, a rilru a mangan êm avângin ṭum khat chu: “Ka ning hluah hluah, ka nung rei lo vang,” tiin a sawi a ni.—Joba 7:16.

Hêng Bible-a mite’n an ngaihtuahna ṭha lo hlawhtling taka an hmachhawn dân zirna aṭangin, keini pawhin mangannate hmachhawn tûra kan mamawh chakna kan nei thei a ni.