Damdawi lam ziahna lehkhabu ni lo mah se, Bible chuan thurâwn ṭangkai tak a pe a. Chûng thurâwnte chuan rilru hrisêlna lama harsatna neite chu a ṭanpui thei a ni. Entîrna ṭhenkhat lo ngaihtuah ta ila.

“Mi chakte chuan dâktawr an ngai lo va, mi bawrhsâwmte zâwkin an ngai a ni.”—MATTHAIA 9:12.

Bible chuan damdawi lama inenkawlna kan mamawh thei tih a sawi a. Rilru lam natna nei mi tam takte chuan an harsatna chungchâng dik taka an hriatna aṭang leh, doctor an panna aṭangin ṭanpuina an dawng a ni.

“Taksa insawizawina hi sâwt zawng a sâwt ve bawk.”—1 TIMOTHEA 4:8.

I taksa hrisêl tûra i thiltihte chuan i rilru hrisêlna hma sâwn tûrin a ṭanpui thei a. Chûng thiltihah chuan insawizawi ziah te, ei tûr hrisêl ei te, leh kham khawpa mutte a tel a ni.

“Thinlung hlim hi damdawi ṭha tak a ni a, thinlung lungchhia erawh chuan ruh a tiro ṭhîn.”—THUFINGTE 17:22.

Mi tichak thei tak Bible châng chhiar te, leh thiltum inâwm i hlen theih tûr insiamnate chuan hlim tûrin a ṭanpui thei che a. Nuna thil ṭhate i ngaihtuah tlat a, hma lam hunah dinhmun a ṭha lehzual ang tih i rin chuan, chu chuan rilru hrisêlna lama harsatna  i neihte hmachhawn tûrin a ṭanpui thei che a ni.

“Inngaitlâwmte hnênah chuan finna a awm.”—THUFINGTE 11:2.

I thil tih duh apiang nangmahin i ti vek thei lo tih i hre mai thei a; chuvângin, mi dangte ṭanpuina chu inngaitlâwm takin pawm ang che. I ṭhiante leh chhûngte chuan ṭanpui che an duh mai thei a; mahse, ṭanpui dân tûr che an hre lo pawh a ni thei. Chuvângin, i tâna ṭanpuina ṭangkai tak tûrte chu hriattîr rawh. Beisei sâng lutuk lo la, ṭanpuina an pêk che avângin lâwm fo vang che.

“Keimahah thil dik lo a awm nia ka hriat avângin doctor ka râwn a. Ani chuan ka natna chu a enkawl thei a. Chu chuan ka dinhmun dik tak pawm tûr leh ṭha lehzuala ka hrisêlna enkawl tûra damdawi lama inenkawlna hre tûrin min ṭanpui a ni.”—Nicole-i, a nasa taka rilru awm dân inthlâk ṭhîn natna (bipolar disorder) nei.

“Kan nu nêna Bible chhiar ziahna chuan a êng zâwnga thil thlîr a, mi siam ṭha thei thilte ngaihtuaha nî hmang ṭan tûrin min ṭanpui tih ka hria a. Ka natna a zual chângte chuan kan Bible chhiara châng eng emaw bîk tak chuan min thlamuan ṭhîn hle.”—Peter-a, rilru hahna nasa tak (depression) nei.

“Ka natna chu ka zahpui avângin mi dangte hrilh harsa ka ti hle. Mahse, ka ṭhian ṭha tak pakhat chuan min hre thiamin min lainat hle a. Ani chuan rilru nuam taka awm tûr leh ka mal lo a ni tih inhre tûrin min ṭanpui tak zet a ni.”—Ji-yoo-i, ei leh in mumal lohna (eating disorder) avânga harsatna nei.

“Bible chuan hnathawh leh chawlh hahdam chungchângah inbûk tâwk tak leh, a âwm tâwka thil thlîr tûrin min ṭanpui a. A finna thute chuan min tibuai rengtu rilru lama ka harsatna neih chu hmachhawn tûrin min ṭanpui a ni.”—Timothy-a, thil vei ngut ngut ang chi rilru lam natna (obsessive-compulsive disorder) nei.