Khawvêl Pum Huapa Rilru Hrisêlna Lama Harsatna
“Ka pindana keimah chauhva ka ṭhut mai mai pawh hian rilru hahna engemaw tak ka nei ṭhîn.”
“Dam ṭha hle nia ka inhriat pawhin ka lungngai leh thut ṭhîn. Ka thil lo tawn tawh aṭangin ka hlim viau hian ka lungngai leh thut dâwn tih ka hria.”
“Nî tina thil thlengte chauh ngaihtuah ka tum a; mahse, thil dang tam tak ngaihtuahin ka rilru a hah leh thut ṭhîn.”
A chunga thute hi rilru lam natna neite sawi a ni a. Nangmah emaw, i hmangaih tak tuemaw chu, chutiang chuan in awm ve tawh em?
Nangmah chauh i ni lo tih hria ang che. Tûn laia mi tam tak chuan anmahni, a nih loh leh an hmangaih takte’n rilru lama hrisêl lohna an neih avângin harsatna an tâwk a ni.
Kawng hrang hranga rilru hahna thlentu ‘hun khirh takah’ kan nung a ni tih chu phat rual a ni lo. (2 Timothea 3:1) Zir chianna pakhat chuan khawvêl pumah mi pariat zêla pakhatin rilru lama hrisêl lohna an hmachhawn niin a chhût a. COVID-19 hripui lêng avângin kum 2019 aiin, kum 2020-ah lungkhamna nasa tak nei zaa 26 vêlin an pung a, rilru hahna nasa tak nei zaa 28 vêlin an pung bawk a ni.
Lungkhamna nasa tak leh rilru hahna nasa tak neitute zât hriat chu pawimawh tho mah se, nang leh i hmangaih takte’n a ṭha thei ang bera in hmachhawn theih dân hriat chu a pawimawh lehzual a ni.
Rilru lama hrisêlna chu eng nge ni?
Rilru hrisêl ṭha i neih chuan, a tlângpuiin i hlimin ṭha takin thil i ngaihtuah thei ang. Rilru hahna satliahte chu pângngai takin i hmachhawn thei ang a, ṭha taka hna thawkin, nunah lungawina i nei thei ang.
Rilru lam natna . . .
-
Mi mal chak lohna vâng A NI LO.
-
Manganna nasa tak thlen a, ngaihtuahna, rilru vei zâwng, leh nunphung tibuaitu natna chi khat A NI.
-
Mi dangte nêna inlaichînna siam leh nî tina nun pângngai taka hman a tiharsa ṭhîn.
-
Kum eng zât mi pawh niin, hnam, chî, leh sakhaw hrang hranga mite, lehkha thiam leh thiam lo, a nih loh leh eng hnathawkte pawh ni se, a nghawng thei a ni.
Rilru hrisêlna lama harsatna neite tâna ṭanpuina
Nangmah, a nih loh leh i hmangaih takin hriat theih khawpa mize inthlâkna nasa tak te, mut leh ei leh in mumal lohna te, hun rei tak chhûng manganna te, lungkhamna te, a nih loh leh lungngaihnate in nei a nih chuan, a chhan hre tûr leh enkawl tûr che uin mi thiamte ṭanpuina in mamawh thei a. Mahse, ṭanpui tûr che uin tu nge in pan ang?
Nung tawh azawnga mi fing ber, Isua Krista chuan heti hian a sawi: “Mi chakte chuan dâktawr an ngai lo va, mi bawrhsâwmte zâwkin an ngai a ni,” tiin. (Matthaia 9:12) Mi thiamte nêna inbiakna hmanga inenkawlna leh, damdawi hmanga a âwm tâwka inenkawlna dawngtu hrisêlna lama harsatna neite chuan, an natna lang chhuak nasa lo tûrin thil tam tak an ti thei a, nun hlawhtling leh hlimawm tak an nei thei bawk. Chutiang mite tân chuan nasa takin an natna a lang chhuak emaw, hun rei tak an lo tuar tawh emaw a nih chuan inenkawl vat a finthlâk ang. a
Bible hi damdawi lama inkaihhruaina lehkhabu ni lo mah se, a chhûnga thute hi rilru lama hrisêlna atân a ṭangkai a ni. Rilru hrisêlna lama harsatnate hmachhawn tûra Bible-in min ṭanpui theih dân târ langtu, a dawta thuziakte hi ngaihtuah tûrin kan sâwm a che.
a Vênnainsâng hian inenkawlna fak mawi bîk engmah a nei lo. Mi tinte chuan mi mal thu tlûkna an siam hmain, an duh thlannate chu ngun takin an ngaihtuah tûr a ni.
You May Also Like
ESSENTIAL BIBLE TEACHINGS
Engvângin Nge Pathianin Hrehawm Tawrhna Awm A Phal?
Bible chuan chhânna lungawithlâk tak leh thlamuanthlâk tak min pe a ni.
NGAIHVEN RENG RAWH U!
Ṭhalaite Zîngah Rilru Hrisêlna Lama Harsatna A Pung—Bibel-in Eng Nge A Sawi?
Bible chuan rilru hrehawmna tuar ṭhalaite tân ṭanpuina ṭangkai tak a pe.
KAN CHANCHIN
Tlawh Dîlna
Bible zawhna pakhat sawiho, a nih loh leh Jehova Thuhretute chungchâng hriat belh rawh.
