Kan ṭhian tuemawin rilru lam natna a neih hian ṭanpui theihna nei lo angin kan inngai mai thei a. Mahse, rilru hrisêlna lama a harsatna tawh hmachhawn tûra ṭanpuiin, kan ngaihsak tak zet tih kan lantîr thei a ni. Engtin nge?

“Ngaihthlâk chuh sela.”—JAKOBA 1:19.

I ṭhian i ṭanpui theih dân kawng ṭha ber pakhat chu a thusawite i ngaihthlâksak hi a ni a. A thusawi zawng zawng i chhân lêt vek a ngai lo. I ngaithlain, i ngaihsak a ni tih hriattîr la. A awm dân chu hriatthiam tum la, sawisêl suh ang che. A thil sawi tum loh pui, a hnua a inchhîr lehna tûrte a sawi palh thei tih hre reng bawk rawh.—Joba 6:2, 3.

“Thlamuan ula.”—1 THESSALONIKA 5:14, C.L. Re-edited.

I ṭhian chu a mangang thei a, a nih loh leh tlâktlai lo nia inhriatna a nei thei bawk. Sawi tûr ber i hre lo a nih pawhin, i ngaihsak a ni tih hriatnawntîrin i thlamuanin i tichak thei a ni.

“Ṭhian chuan englai pawhin a hmangaih reng.”—THUFINGTE 17:17.

Ṭanpuina ṭangkai tak pe rawh. Ṭanpui theih dân hria anga inngai mai lovin, i ṭanpui theih dân tûr zâwt zâwk ang che. I ṭhian chuan a mamawhte sawi chhuah harsa a tih chuan,  vah harhpui ang chi in tih dun theih thilte chu tihpui tum la. A nih loh pawhin, bazarsak te, in tihthianghlimsak te, a nih loh leh thil dangah ṭanpui theihna i neih leh neih loh i zâwt thei bawk ang.—Galatia 6:2.

“Dawhthei takin awm rawh u.”—1 THESSALONIKA 5:14.

I ṭhian chuan inbiak a peih reng lo mai thei a. Inbiak a duh hunah ngaihthlâksak i inpeih reng tih hrilh ang che. A natna avângin i ṭhian chuan i rilru tinatu thu sawiin, thil a ti thei a. In ruahmannate ṭhulh san chein, a hlim lo pawh a ni thei. I ṭanpui hunah dawhthei tak leh hriatthiamna nei tak ni ang che.—Thufingte 18:24.

“Engtik lai pawha a biak theih a ṭhian ka ni tih ka hriattîr a. A harsatna tawhte chinfelsak thei lo mah ila, a thusawite ngaihthlâksak ziah ka tum ṭhîn. A châng chuan a mamawh zawng chu a thusawi ngaihthlâksak a ni a, chutiang chuan a awm a nuam sawt ṭhîn.”—Farrah-i, a ei leh in mumal lohna leh lungkhamna nasa tak (eating and anxiety disorders) leh enkawl ngai khawpa lungngaihna nasa tak (clinical depression) tuartu ṭhian.

“Ka ṭhian pakhat chu mi ngilnei leh mi fuih thiam tak a ni a. Chaw tui tak ei tûrin a inah min sâwm a. Chutiang boruak nuam takah chuan ka rilrua awmte sawi chhuah awlsam ka ti. Chu chuan min tichak tak zet!”—Ha-eun-i, enkawl ngai khawpa lungngaihna nasa tak (clinical depression) nei.

“Dawhtheihna hi a pawimawh hle a. Ka nupuiin min tih thinrim châng hian, chu chu a tum rêng vâng ni lovin a natna lan chhuahna a ni tih ka inhriatnawntîr ṭhîn a. Chu chuan thinrim lo tûr leh a chunga ngilneihna lantîr lehzual tûrin min ṭanpui a ni.”—Jacob-a, enkawl ngai khawpa lungngaihna nasa tak (clinical depression) tuartu pasal.

“Ka nupui chu min ṭanpuitu leh min thlamuantu ṭha tak a ni a. Lungkhamna nasa takin min tlâkbuak hian ka tih duh lohte ti tûrin min nawrlui ngai lo. Chuvâng chuan, a tih châk zâwngte tih theih loh châng a nei ṭhîn. Ani chu ngilnei tak leh mahni hmasial lo tak a nih avângin ka tân a hlu hle.”—Enrico-a, lungkhamna nasa tak (anxiety disorder) nei.