Costa Rica tuipui chhak lama awm Puerto Limón khawpui leh a chheh vêla seilian ka ni a. Unau pariat kan ni a, a pasarihna ka ni. Kum riat mi ka nihin ka pain min boralsan a. Chuta ṭang chuan, ka nuin pasal dang nei lovin kan unau za chuan min enkawl seilian ta a ni.

Baseball hi ka nuna thil pawimawh ber a ni reng a. Ka naupan têt aṭangin ka ngaina a. Ka tleirâwl chhoh chuan, intihhlim nâna infiamna team-ah ka tel a. Kum 20 mi nia, chutiang team pakhata ka infiam lai chuan en diktu pakhatin Nicaragua rama professional team-a infiam tûrin min sâwm a. Chutih lai chuan ka nu hrisêl lo tak ka enkawl avângin Nicaragua-a infiam tûra sâwmna chu ka hnâwl ta a ni. A hnuah, infiamna lama talent neite zawngtu mi pakhatin intihhlim nâna inkhêl mai maite zînga thiam zual thlan khâwmte hmanga din, Costa Rica’s national baseball team-a inkhêl tûrin min sâwm leh a. Chumi ṭumah chuan sâwmna chu ka pawm ta a. Chu team-ah chuan kum 1949 aṭangin 1952 thleng ka awm a, Cuba, Mexico, leh Nicaragua-a infiamna tam takah ka tel a ni. Baseman-ah ka ṭang a, ka ti ṭha thei hle a, inzawm zata vawi 17 kan inkhelhnaah pawh vawi khat mah ka ti sual ngai lo. Mipuiin ka hminga min au ri ka hriat chuan nuam ka ti thei hle!

Lungchhiatthlâk takin, nungchang bawlhhlawhna lamah ka tlu lût bawk. Bialnu pakhat nei reng chungin, hmeichhe dang pawh ka kawp ṭhîn a. Zû pawh ka in nasa hle. Ni khat chu zû ka rui lutuk a, a tûka ka han harh chhuah chuan ina ka haw leh dân pawh ka hre chhuak thei lo! Domino khelhte leh lottery ticket hmanga pawisa inkhelhte pawh ka chîng hle a ni.

Chutiang nun kawng ka zawh lai chuan, ka nu chu Jehova Thuhretu a ni tawh a. A rinna ngaihventîr min tum ṭhîn a; mahse, infiamnaa ka inpêk pumhlûm avângin atîrah chuan a hlawhtling lo. Chaw ei hun thlenga ka infiam pawhin, ka ril a ṭâm ngai lo! Infiam chauh ka ngaihtuah a. Eng dang zawng aiin baseball hi ka ngaina a ni!

Mahse, kum 29 mi ka nihin, infiamnaa ball man ka tumnaah  na takin ka inhliam a. Ka ṭhat chhoh leh hnu chuan, professional team chu ka chhuahsan ta a ni. Mahse, kan in bula awm intihhlimna nâna infiamna team-a mite zirtîrtu niin infiamna lamah ka la tel tho a ni.

Kum 1957-ah, ka lo infiam ṭhinna hmun stadium-a neih Jehova Thuhretute inkhâwmpuia tel ve tûra sâwm ka ni a. Mipui zînga ka ṭhut laiin Thuhretute zînga inzah tawnna chu baseball khelh huna mipui bengchheng tak nên a danglamzia chu hai rual a ni lo. Chu inkhâwmpuia ka thil hmuh chuan Thuhretute nêna Bible zir duhna nei tûr leh kohhran inkhâwma tel tûrin min chêttîr a ni.

Ka thu hriat Bible zirtîrnate chuan ka thinlung a khawih hle a. Entîr nân, Isua chuan nî hnuhnûngah a zirtîrte’n Pathian Ram chanchin ṭha chu khawvêl pumpuiah an hril ang tih a sawi lâwk a. (Matthaia 24:14) Kristian dikte chuan an rawngbâwlna chu sum zawn nân an hmang lo tih ka hre bawk. Isua’n: “Athlâwnin in hmu a, athlâwnin pe ang che u,” tiin a sawi.—Matthaia 10:8.

Bible ka zir chuan, ka thu hriatte leh Jehova Thuhretute zînga ka thil hmuhte chu ka khaikhin a. Khawvêl pum huapa Pathian Ram chanchin ṭha theih tâwp chhuaha an hril chu ka ngaisâng hle. Isua’n Kristiante hnênah pêk duhna rilru nei tûra a thupêk chu an zîngah a awm tih ka hmu a. Chuvângin, Marka 10:21-ah, “Lo kal la, mi zui ang che,” tia Isua sâwmna ka chhiar chuan Thuhretu nih ka duh ta a ni.

Mahse, chutianga awm tûr chuan hun engemaw chen a ngai a. Entîr nân, kum tam tak chhûng chu ka “vânneihna” number hmangin chawlhkâr tin pawisa ka khêl ṭhîn a ni. Mahse, Pathianin ‘Vânneihna Siamtu,’ betute leh mi duhâmte chu a dem tih Bible aṭangin ka hre ta a. (Isaia 65:11; Kolossa 3:5) Chuvângin, pawisa khelh chu bânsan ka tum ta a ni. Pawisa khelh ka bânsan hnu Chawlhni hmasa berah ka “vânneihna” number chuan a man fuh ta chiah mai a! Chu chawlhkâra pawisa ka lo khelh loh avângin mite chuan min nuihzat a, khêl zawm leh tûrin min fuih nasa hle a; mahse, ka khêl zawm ta lo. Chuta ṭang chuan pawisa ka khêl tawh ngai lo.

Jehova Thuhretute inkhâwmpuia baptisma ka chan nî ngei chuan ‘mihring thara’ nun ka tumnaah fiahna dang ka tâwk leh a. (Ephesi 4:24) Chumi tlaia ka thlenna hotel-a ka kîr leh chuan tûn hmaa ka bialnuin ka room kawngka bulah min lo nghâk a. “Sammy, lo kal rawh, hun i hmang dûn ang!” tiin min sâwm a. “Ka duh lo!” tiin ka chhâng nghâl a. Tûnah chuan Bible nungchang tehna milin ka nung tawh ka ti a. (1 Korinth 6:18) Thinrim tak hian “Eng a?” a ti a. Tichuan mipat hmeichhiatna chungchânga Bible thlîr dân chu sawichhiain, inlaichînna nei ṭha leh tûrin min sâwm nasa hle a. Mahse, ka room-ah luhsanin, kawngkâ ka khâr ta a ni. Kum 1958-a Thuhretu ka nih aṭang khân, ka nun dân thlâk danglamin, rinawm takin ka la awm zêl tih inchhuang takin ka sawi thei a ni.

Bible kaihhruaina ka zawm avânga hlâwkna ka hmuhte chu ziak dâwn ta ila, lehkhabu pakhat a tlin theih ka ring! Chûng hlâwkna ka neih zînga ṭhenkhat chu ṭhian ṭha tak tak neih te, nun lungawithlâk tak neih te, leh hlimna dik tak neihte hi a ni.

Baseball infiamna hi nuam ka la ti reng a, mahse, ka thil ngainatte chu ka thlâk tawh a ni. Baseball ka khelh lai chuan mipui ngaihsân hlawhin pawisa hmu mah ila, chûngte chu a daih rei ṭhîn lo. Mahse, Pathian nêna kan inlaichînna leh unaute zînga ka telna chuan chatuan a daih dâwn a ni. Bible chuan: “Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tiin a sawi a. (1 Johana 2:17) Tûnah chuan thil dang zawng aiin Pathian Jehova leh a mite chu ka hmangaih tawh a ni!