I HMA LAM HUN TUR ATAN DUH THLANNA DIK TAK I SIAM EM? Mi ṭhenkhat chuan an nun chu an duh thlanna ni lovin, ruat lâwknain a thunun niin an ring a. An thiltum ṭhenkhat a hlawhtlin loh hunah, ruat lâwk anga ngaiin an ngaihthah mai ṭhîn a. “Ruat lâwk a ni tlat a!” an ti a ni.

Mi ṭhenkhat chu hnehchhiahna leh dik lohnaa khat kan chênna khawvêl ata tlân chhuahna kawng an hriat loh avângin an lunghnual a. Nun nuam zâwk neih an tum a; mahse, indona te, dân bawhchhiatna te, leilung chhiatna te, leh natnate chuan an ruahmannate chu a tikhawlo ṭhîn tih an hmu a ni. ‘Engah nge thil hi a kal tluan loh?’ tiin an inzâwt ṭhîn a ni.

Kan dinhmunte hian kan ruahmannate a nghawng nasa thei hle tih chu a dik ngei mai. (Thuhriltu 9:11) Mahse, i chatuan hma lam hun atân duh thlanna dik tak i siam thei a ni. Bible-in i hma lam hun chu i duh thlannaah a innghat tih a sawi a. Bible sawite chu han ngaihtuah ta ila.

Hmân lai Israel hnam hruaitu Mosia chuan Ram Tiam an luh dâwn ṭep khân, mite hnênah: “In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan nunna chu thlang rawh u, in nun theih nân, nangni leh in thlahte nên; LALPA in Pathian hmangaih a, a awkâ âwih a, amah vuan tlatin,” tiin a hrilh a ni.—Deuteronomy 30:15, 19, 20.

‘In hmaah nunna leh thihna, malsâwmna leh ânchhia ka dah a ni; chutichuan nunna chu thlang rawh u.’—Deuteronomy 30:19

Ni e! Pathian chuan Israel mite chu Aigupta sal tânna ata chhan chhuakin, chu Ram Tiamah zalên tak leh hlim taka nun theihna hun remchâng a pe a. Mahse, chûng zawng zawng chu amahin a awm nghâl dâwn lo. Chûng malsâwmnate dawng tûr chuan, ‘nunna chu an thlan’ a ngai a ni. Engtin nge? ‘Pathian an hmangaih a, a awkâ an âwih a, amah an vawn tlatna hmangin,’ a ni.

Tûn laiah, keini pawh chutiang duh thlanna chu kan nei ve a, kan duh thlannain kan hma lam hun tûr chu a hril ang. Pathian kan hmangaih a, a awkâ kan âwih a, amah kan vawn tlat chuan, lei paradis-a chatuana nun chu kan thlang a ni ang. A nih leh, chûng rahbiahte chuan eng nge tel?

Hmangaihna chu Pathian mize bul ber a ni a. Tirhkoh Johana chuan thlarauva thâwk khuma awmin, “Pathian chu hmangaihna a ni si a,” tiin a ziak a. (1 Johana 4:8) Chuvângin, thupêk zawng zawnga ropui ber an zawh khân, Isua chuan: “Lalpa i Pathian chu i thinlung zawng zawngin, i thlarau zawng zawngin, i rilru zawng zawngin i hmangaih tûr a ni,” tiin a chhâng a. (Matthaia 22:37) Pathian Jehova nêna inlaichînna dik tak chu hlauhna emaw, pâwngpaw thuâwihna emawah innghat lovin, hmangaihnaah a innghat tûr a ni. A nih leh, engvângin nge amah hmangaih chu kan thlan ang?

Jehova’n mihringte a hmangaihna chu nu leh pate’n an fate an hmangaihna ang a ni a. Ṭha famkim lo ni mah se, hmangaihna nei nu leh pate chuan an fate chu hlimna leh hlawhtlinna neihtîr an duh avângin kaihhruaina te, fuihna te, ṭanpuina te, thununnate an pe a ni. Nu leh pate chuan eng nge an beisei lêt? An fate’n an hmangaih lêt a, an ṭhatna  tûra an thu hrilhte chu thinlungah vawng tlat se an duh a ni. Kan Pa vâna mi ṭha famkim chuan kan tâna thil min tihsak zawng zawng avânga lâwmna lantîr tûra min beisei chu a inâwm hle lo maw?

Pathian thu âwih tûr chuan, a thusawite kan hriat a ngai a. Pathian aw chu a ngial a ngana kan hriat theih loh avângin, Bible-a a thute kan chhiar a, kan nunpuina hmangin a thu kan âwih thei a ni.—1 Johana 5:3.

Pathian awkâ âwih a pawimawhzia hriattîr a duh avângin, ṭum khat chu Isua’n: “Mihring hi chhang chauhvin an nung lo vang a, Pathian kaa thu tin chhuakin an nung zâwk ang,” tiin a sawi a. (Matthaia 4:4) Kan tân tisa lam chaw a pawimawh ang bawkin, Pathian hriatna neih chu a pawimawh lehzual a ni. Engvângin nge? Lal fing Solomona chuan: “Finna hi himna a ni si, tangka sum himna a ni bawk; hriatna ṭangkaizia erawh chu, a neitu nun chu finnain a tiharh ṭhîn,” tiin a hrilhfiah a. (Thuhriltu 7:12) Pathian min pêk hriatna leh finna chuan tûn laiah min vênghim theiin, nakina chatuan nunnaa min hruaitu duh thlanna fing siam tûrin min ṭanpui thei bawk.

Thuziak hmasaa kan sawi tâk Isua tehkhin thu kha han ngaihtuah leh ta ila, ani chuan: “Nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” tiin a sawi. (Matthaia 7:13, 14) Chu kawnga kan kal hunah, kan thlenna tûr hmun—chatuan nunna—thlen kan duh chuan, hruaitu thiam tak kan neih a, a mah zui tlat chu kan hlâwkpui ngei ang. Chuvângin, Pathian hnaih tlatna tûr chhan ṭha kan nei a ni. (Sâm 16:8) A nih leh, engtin nge kan hnaih theih?

Ni tin hian, thiltih tûr tam tak kan nei a, kan thiltih duh zâwngte chu a tam lehzual a ni. Chûngte chuan min ti buaiin, kan rilru a lâk pên theih ṭhin avângin Pathianin ti tûra min duhte chu kan ngaihtuah hman ṭhîn lo. Chuvângin, Bible chuan: “Mi fing lote anga awm lovin, mi fingte anga awm zâwkin, in awm dânah fîmkhur rawh u; nîte hi a ṭhat loh avângin remchânnate lei zêl rawh u,” tiin min hriatnawntîr a ni. (Ephesi 5:15, 16) Pathian nêna inlaichînna chu kan nuna kan dah pawimawh ber chuan amah kan hnaih tlat a ni ang.—Matthaia 6:33.

I hun kal tawh chu siam danglam thei tawh lo mah la, nang leh i hmangaihte tân nakin hun ṭha tak nei tûrin duh i thlang thei a. Bible-in kan Pa, vâna mi Pathian Jehova chuan min hmangaih tak zetin, ti tûra min duhte chu min hriattîr tih a târ lang a ni. Zâwlnei Mika thusawite hi chhinchhiah ang che:

“Aw mihring, ṭha chu a entîr tawh che a ni; LALPAN a phût che chu eng nge ni? Dik taka tih leh khawngaihna ngainat leh i Pathian nêna thuhnuairawlh taka lên dun a ni lo vem ni?”—Mika 6:8.

Jehova’n amah nêna leng dûn tûr leh chutianga leng dûnte tâna a buatsaih chatuan malsâwmnate hmu tûrin A sâwmna chu i pawm ang em? Duh i thlang thei a ni!