BEISEINA ROPUI TAK A VA NI EM! Min siamtu chuan he lei ngeiah hian chatuan nunna pêk min tiam a. Mahse, mi tam tak chuan chu chu rin harsa an ti. ‘Engtik niah emaw chuan kan la thi vek dâwn a, kan nung a, kan thi chu thil nih dân pângngai mai a ni,’ tiin an sawi. Mi dang ve thung chuan chatuana nun chu thil ni thei a ni a; mahse, he leiah a nih an ring lo va. Chu chatuan nunna chu thih hnu, vâna lâwn hunah chauh neih theih niin an sawi bawk. Nang, engtin nge i ngaih?

Chu zawhna i chhân hmain, Bible-in hêng zawhna pathum a chhân dân hi engvângin nge i ngaihtuah loh vang: Mihring siam a nih dân hian a dam chen tûr chungchâng eng nge a târ lan? Leilung leh mihringte tâna atîra Pathian thiltum chu eng nge ni? Engtin nge mihringte chungah thihna a lo thlen?

Pathian siam lei chunga nunna nei zawng zawng zîngah, mihringte chu an danglam hle a. Engtin nge? Bible chuan mihringte chauh hi Pathian ‘anpui’ leh amah ‘ang taka’ siam an ni tih a sawi a. (Genesis 1:26, 27) Chu chuan eng awmzia nge a neih? Hmangaihna leh rorêl dikna ang chi Pathian miziate lan chhuahtîr theia siam kan ni tihna a ni.

Mihringte chuan a chhia leh a ṭha kan hriat theih bâkah, Pathian nêna inlaichînna neih duhna kan nei bawk a. Chuvângin, universe ropui tak te, leilung pianken thil mak tak te, lemziah thiamna te, rimawi te, leh hla phuahte chu kan hlut thei a ni. Thil dang zawng aiin, mihringte hian Siamtu biak theihna danglam bîk tak kan nei a. Chûng miziate avâng chuan, mihringte chu leilunga thilsiam dang zawng zawngte lakah kan danglam hle a ni.

Chuvângin, heti hian han ngaihtuah teh: Pathianin mihringte chu kum rei lote chhûng chauh nung tûra a siam a nih chuan, chûng mize danglam takte leh chûngte tih hmasawn zêl theihna chu a pe ang em? Dik takin, Pathianin mihringte chu he leia chatuana nung thei tûrin chûng mize danglam takte leh theihnate chu a pe a ni.

Mahse, mi ṭhenkhat chuan Pathianin mihringte chu leia chatuana nung tûrin a siam lo an ti a. Lei hi rei lotê chhûng chauh awmna tûr hmun, Pathian nêna chatuana nung tlâk an nih leh nih loh mihringte fiahna hmun atâna siam a ni tiin an sawi. Chu chu a dik a nih chuan, Pathian chu khawvêla sualna leh thil ṭha lo zawng zawnga mawhphurtu a  ni dâwn lâwm ni? Mahse, chu chu Pathian nihna nên inkalh chiah a ni. A chungchângah Bible chuan: “A awm dân zawng zawng chu dân a ni: Pathian rinawm, khawlohna nei lo, fel leh ṭha a ni,” tiin a sawi.—Deuteronomy 32:4.

Bible chuan leilung atâna atîra Pathian thiltum chu chiang takin heti hian a sawi a ni: “Vânte khi LALPA vânte a ni a; leilung erawh hi chu mihring fate a pe a ni,” tiin. (Sâm 115:16) Ni e, Pathianin leilung chu mihringte chatuan in ni tûrin mawi takin a siam a, nun awmze nei tak leh tâwp nei lo nun kan chên theih nân kan mamawh tinrêngin a tikhat a ni.—Genesis 2:8, 9.

Bible chuan mihringte tâna Pathian thiltum pawh chiang takin a sawi bawk. Nupa tuak hmasa berte chu “leilung hi luah khat ula, in thu thuin awmtîr rawh u; . . . thil nung leia bawkvâka kal zawng zawng chungah te thu nei bawk rawh u,” tiin thu a pe a. (Genesis 1:28) An Paradis in chu enkawl a, leilung pum huapa zauh zêl chu an tân chanvo ropui a va ni êm! Dik tak chuan, Adama leh Evi leh an thlahte hmabâk chu vâna lâwmman dawn ni lovin, leia chatuana nun a ni.

A nih leh, engvângin nge kan thih? Pathian thlarau thilsiam zînga pakhat, a hnua Diabol Setana lo ni ta chuan Eden huana Pathian ruahmanna chu tihchhiat a tum tih Bible-in a târ lang a. Engtin nge?

Setana chuan kan nu leh pa hmasa ber Adama leh Evi chu Pathian laka helnaah a lama ṭang tûrin a hmin a. Pathianin an lakah thil ṭha engemaw—a chhia leh a ṭha chungchânga mahnia thu tlûkna siam tûra dikna—thup anga a puh khân, Setana lamah ṭangin, Pathian chu an hawisan a ni. Eng nge a rah chhuah? Pathianin a vaukhân lâwk ang ngeiin, a tâwpah an thi a. Lei Paradis-a chatuana nun beiseina chu an hloh ta a ni.—Genesis 2:17; 3:1-6; 5:5.

Adama leh Evi helna chuan tûn laia mi zawng zawng chungah nghawng a nei a. Pathian Thu chuan: “Mi pakhat [Adama] avângin sual khawvêlah a lût a, sual avângin thihna a lût bawk a, . . . thihnain mi zawng zawng a fan chhuak ta,” tiin a sawi. (Rom 5:12) Ruat lâwk emaw, Pathian ‘ruahmanna’ hriat phâk loh emaw vâng ni lovin, kan nu leh pa hmasa berte hnên aṭanga sual leh thihna kan rochun avângin kan thi a ni.

Eden huana helna chuan mihringte leh leilung atâna atîra Pathian thiltum chu a tihlawhchham lo. Pathian hmangaihna ṭha famkim leh rorêl dikna chuan ani chu kan rochun sual leh thihna bawih ata zalênna kawng min hawnsak tûrin a chêttîr a. Tirhkoh Paula chuan: “Sual man chu thihna a ni si a; Pathian thilthlâwnpêk erawh chu kan Lalpa Krista Isua zârah chuan chatuana nunna a ni,” tiin a hrilhfiah a ni. (Rom 6:23) Pathian chuan hmangaihna nei takin, “a fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân.” (Johana 3:16) Tlanna inthawina atâna inhuam taka inpein, Isua chuan Adama avânga kan chân zawng zawngte chu a tlan leh vek a ni. a

Lei paradis ni tûra Pathian thiltum chu rei lotêah a takin a lo thleng tawh ang. He nakin hun ropui tak hi i ta ni thei tûr chuan, Isua fuihna: “Kawngka zîmah chuan lût rawh u; boralnaa kalna kawngka chu a zau va, a kawng pawh a zau bawk a, chu mi lama lût chu tam pawh an tam hle a ni; nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” tih hi i zâwm tûr a ni. (Matthaia 7:13, 14) Ni e, i nakin hun chu i kutah a awm. Eng nge i tih ang?