THIHNAAH i hmangaih tak i chân tawh a nih chuan, rilru hrehawmna tam tak i nei mai thei a: lungchhiatna, mal nia inhriatna, leh ṭanpuitu nei lo nia inhriatnate i nei ngei ang. Thinrimna te, inthiam lohna te, leh hlauhnate pawh i nei mai thei bawk. Nungdama awm hi manhla tak a nih leh nih loh ngaihtuah châng pawh i nei mai thei a ni.

Thihna avânga lungngaih hi chak lohna a ni lo tih hria ang che. Chu chuan i hmangaih tak chu i tân a hlutzia a târ lang a ni. A nih leh, lusûnna avânga i tawrhnaah thlamuanna i hmu thei ang em?

I tawrhna chu tâwp thei tawh lo tûra a lan laiin, a hnuaia thurâwnte hi i nunpui chuan thlamuanthlâk tak a ni tih i hmu ang:

THIHNA AVANGA LUNGNGAIH CHU THIL PANGNGAI A NI

Mi tinte hi kan lusûn dân leh kan sûn hun rei zâwngte a inang vek lo va. Mahse, a ri chhuaka ṭahna chuan rilru ipik lutuk chu a tiziaawm thei a ni. A chunga kan sawi tâk Vanessa-i chuan: “Ka rilru hrehawm lutuk tihzangkhai deuh nân ka ṭap chhuak a,” tiin a sawi. Sofía-i chuan a unaunu a boral thut chuan: “Ka chunga thilthleng ka ngaihtuah hian hrehawm ka ti lutuk, pân na tak a damna tûra silfai ang mai a ni. Tawrh zawh loh khawpa na ni mah se, chu chu a damna tûrin a ṭangkai si a,” tiin a sawi.

 I RILRUA AWMTE CHU SAWI CHHUAK RAWH

Mahni chauhva awm duh châng i nei chu hriatthiam awm tak a ni a. Mahse, mahni chauhva lusûnna tawrh chu harsa tak a ni. A pa chântu kum sawm leh pasarih mi Jared-a chuan: “Ka rilrua awmte chu mi dangte ka hrilh a. Fiah takin sawi chhuak thiam lo mah ila, mi dangte ka hrilh hian ka rilru a hahdam a ni,” tiin a sawi. Thuziak hmasaa târ lan tâk Janice-i chuan hlâwkna dang a hmuh chu heti hian a sawi a ni: “Mi dangte hnêna rilrua awmte sawi chhuah hi thlamuanthlâk tak a ni. Mi dangin min hriatthiampui nia ka hriat avângin mal niin ka inhre tawh lo,” tiin.

ṬANPUINA CHU PAWM RAWH

Doctor pakhat chuan: “Lusûn hlimte chu an ṭhiante leh an chhûngte ṭanpuina chuan an hrehawm tawrhte chhel taka tuar chhuak thei tûr leh hmachhawn thei tûrin a ṭanpui,” tih a sawi a. I ṭhiante chu an ṭanpui theih dân tûr che hriattîr la; ṭanpui che duh mah se, ṭanpui dân tûr che an hre lo pawh a ni thei.—Thufingte 17:17.

PATHIAN HNAIH RAWH

Tina-i chuan: “Ka pasalin cancer natna avânga min boralsan thut chuan, ka harsatnate chu a hnêna ka hrilh theih tawh loh avângin, Pathian hnênah engkim ka hrilh a! Ni lênga min ṭanpui tûrin nî tin hian ka dîl ṭhîn. Pathian chuan ka dîl aia nasain min ṭanpui a ni,” tiin a sawi. Kum 22 a nih laia a nuin a boralsan tâk, Tarsha-i chuan: “Bible chhiar hi nî tina min thlamuantu ber a ni a. Chu chuan min tichak thei thilte ngaihtuah tûrin min ṭanpui a ni,” tiin a sawi.

THAWHLEHNA CHU MITTHLA RAWH

Tina-i chuan: “Chutih hun laia ka pasal ka mamawhna leh ka fate’n pa an mamawhna chu a nasat êm avângin, thawhleh beiseina chuan atîrah chuan min thlamuan lêm lo. Mahse, tûnah chuan kum li lai a liam tawh a, chu beiseina chu ka vuan nghet tlat tawh a. Ka dam chhan a ni tawh. Kan inhmuh leh hun tûr chu ka mitthla a, chu chuan thlamuanna leh hlimna min va pe tak êm!” tiin a sawi zawm a ni.

Lû i sûn hian rilru hahdamna i hmu nghâl lo pawh a ni mai thei. Mahse, Vanessa-i thiltawn aṭangin thil pakhat i chiang thei a ni. Ani chuan, “Tawrh zawh i inring lo pawh a ni mai thei; mahse, i lusûnna chu zawi zawiin a reh chho zêl tih i hria ang,” tiin a sawi.

Thinlungah ruak huai nia inhre chung pawhin, nungdama awm hi manhla tak a ni tih hre reng ang che. Ngilneihna nei taka Pathian ṭanpuinain, ṭhian ṭha tak takte nên nun hlimawm tak leh nun awmze nei tak i la nei thei reng a ni. Rei lotêah, Pathianin mitthite a kaitho tawh ang. Pathian chuan i hmangaih tak kuah leh thei tûr chein a duh che a. Tichuan, i tawrhna zawng zawngte chu chatuana tihdamin a awm tawh ang!