LEILUNG chhiatnaa dam khawchhuak tawh i nih chuan, chutianga dam khawchhuakte thiltawn: thin ṭhawngna, rinhlelhna, rilru chi-aina, lungngaihna, leh hrehawm tawrhnate chu i hre thiam ngei ang. Chutiang beidawnna leh lungngaihna nasa tak neia dam khawchhuakte chuan nun zawm zêl duhna pawh an nei tawh lo a ni.

Leilung chhiatna râpthlâk tak tuartu i nih chuan, rilru hahna leh mangannate chu tuar zo tawh lo niin i inhre mai thei. Nun hi manhla lo tak niin i ngai ṭan thei a. Mahse, Bible chuan nungdama awm hi a manhla tih min hrilh a, chu bâkah, nakin hun ṭha zâwk pawh kan beisei thei tih min hrilh bawk a ni.

Thuhriltu 7:8-na chuan: “Thil tâwpna chu a ṭha zâwk ṭhîn, a ṭanna aiin,” tiin a sawi a. Leilung chhiatna i tawh hnua rilru fîm i han put leh chuan, nun hi beisei bo niin i thlîr mai thei. Mahse, dinhmun ṭha chho tûra dawhthei taka i ṭan lâkna chuan, i nun chu a ṭha zâwngin a thlâk thei a ni.

Bible chuan ‘ṭap thâwm hriat a nih tawh loh va, chiau thâwm pawh hriat a nih tawh loh’ hun tûr chu a sawi lâwk a. (Isaia 65:19) He lei hi Pathian Ramin a awp a, paradis-a a chan hunah, chu chu a thleng dik ang. (Sâm 37:11, 29) Leilung chhiatnate chu tûn hma thil a ni tawh ang. Engkimtithei Pathianin: “Tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tia a tiam avângin rilru natnate leh hrehawm tawrhnate chu a awm tawh lo vang.—Isaia 65:17.

Hei hi han ngaihtuah teh: Siamtu chuan “beiseina pe tûr che uin” ruahmanna a siam a ni—Pathian rorêlna ṭha famkim hnuaia nun thlamuanthlâk tak chu. (Jeremia 29:11) Chu thutak hriatna chuan beiseina nei tûrin a ṭanpui thei che ang em? Thuziak hmasa bera kan sawi tâk Sally-i chuan: “Pathian Ramin nakina kan tâna a tih tûr thil ṭha zawng zawngte inhriatnawntîrna chuan tûn hma thilte theihnghilh a, tûna kan dinhmunte hmachhawn thei tûrin a ṭanpui thei che a ni,” tiin a sawi.

A nih leh, Pathian Ramin nakin lawka mihringte tâna a tih tûrte chu engvângin nge i zir loh vang? Chutianga i zir chuan, leilung chhiatna avângin hrehawm tuar mah la, leilung chhiatna awm tawh loh hun tûr chu phûr taka i nghah laiin tûna nungdama i awm chu manhla tak a ni tih i hria ang. Chutih rualin, Bible chuan leilung chhiatna sawhkhâwkte hmachhawn thei tûra ṭanpui theitu kaihhruaina ṭha tak takte a târ lang a. Entîrna ṭhenkhat i lo ngaihtuah ang u.