THUZIAK hmasate chuan thiltawn râpthlâk tak takte’n tawrh zawh loh khawpa nun a tihharsat dân a târ lang a. Mi mal harsatnate i tawrh laiin, nun hi manhla tak a nih leh nih loh emaw, ngaihsaktu che an awm leh awm loh emaw i ngaihtuah mai thei a. Pathian chuan i manganna chu a ngaihsak tih hria ang che. A tân i hlu a ni.

Sâm 86-na ziaktu chuan Pathian a rinchhanzia heti hian a sawi a: “Ka mangan nî chuan ka ko vang che; nangin mi chhâng dâwn si a,” tiin. (Sâm 86:7) Mahse, “ka mangan nî chuan,” ‘Engtin nge Pathianin min chhân ang?’ tiin i ngaihtuah mai thei.

Pathian chuan i harsatnate chu chinfelsak nghâl che lo mah se, a Thu, Bible chuan hmachhawn thei tûra a ṭanpui theih dân che chu heti hian a sawi a ni: “Engah mah mangang suh u; engkimah ṭawngṭai leh dîlin, lâwmthu hril tel zêlin, in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u,” tiin. (Philippi 4:6, 7) A hnuaia Bible chângte hian Pathianin min ngaihsak tak zet tih rinnghehna min neihtîr dân hi khawngaihin ngaihtuah ang che.

“An zinga [chawngzawng] pakhat mah Pathianin a hmaih ngai si lo. . . . chawngzawng tam tak aiin in hlu zâwk a ni.”—Luka 12:6, 7.

NGAIHTUAH TUR: Hlutna nei lo anga lang savate chu Pathianin a ngaihsak a. Chawngzawng pakhat tê pawh Pathian hriat lohvin a awm lo; sava zawng zawngte hi nunna nei thil siam hlu tak an ni. Pathian tân chuan mihringte hi chawngzawngte aiin an hlu lehzual a. Leilunga Pathian thilsiam zînga mak danglam ber mihringte chu a “anpuiin” a siam a, a mize ropui tak takte chu kan neiin, kan lantîr thei a ni.—Genesis 1:26, 27.

“Aw LALPA, nangin ngun takin mi en chhuak a, mi hre ta . . . Ka ngaihtuahna hi . . . i hre thiam ṭhîn. . . . Mi fiah la, ka ngaihtuahnate hi hria ang che.”—Sâm 139:1, 2, 23.

NGAIHTUAH TUR: Pathian chuan a mi mal takin a hria che a. Ani chuan chhûngrila i ngaihtuahte leh i lungkhamte chu a hria a ni. Mi dangin i buainate leh i mangannate chu hre thiam lo mah se, Pathian chuan a ngaihsak chein, ṭanpui che a duh a. Chu tak chu a ni, nungdama awm a manhla chhan chu.

“Aw LALPA, ka ṭawngṭaina hi ngaithla la, Ka au thâwm hi i hnên thleng rawh se. . . . Ka lamah hian i beng rawn dawh la; Ka koh hun che chuan mi chhâng thuai ang che. . . . Pachhiate ṭawngṭaina chu a ngaihsak a.”—Sâm 102:1, 2, 17.

NGAIHTUAH TUR: Mihringte hrehawm tawrhna inṭan phat aṭangin, Jehova chuan hrehawm kan tawrh avânga kan mittui tlate chu a hria a. (Sâm 56:8) Chutah chuan i mittui pawh a tel. Pathian tâna i hlut êm avângin fiahna i tawhte leh i mittui zawng zawngte chu a hria a ni.

“Mangang suh u, kei in Pathian ka ni si a. Ka tichak ang che u a, a ni, ka ṭanpui ang che u; . . . Kei LALPA in Pathian hian, ‘Hlau suh u, ka ṭanpui dâwn a che u.’”—Isaia 41:10, 13.

NGAIHTUAH TUR: Pathian chu ṭanpui tûr chein a inpeih reng a. I tlûk chuan a kai tho leh ang che.

“Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân.”—Johana 3:16.

NGAIHTUAH TUR: Pathian tâna mi duhawm tak i nih avângin, ani chuan a Fapa Isua chu i tâna inthawi nân phal takin a pe a ni. Chu chuan nun hlimawm tak leh awmze nei taka chatuana nun theihna hun remchâng a pe che a ni. *