Isua chuan: “Hnam hrang leh hnam hrang an indo vang a, ram hrang leh ram hrang an indo vang a; lîr nasa takin a nghîng a nghîng ang a, hmun hrang hrangah ṭâmte a tla ang a, hrite a lêng bawk ang,” tiin a sawi a. (Luka 21:10, 11) Kut zungṭanga inrînte chuan kut zia a siam ang bawkin, chûng thilthleng zawng zawngte chuan hai rual loh chhinchhiahna a siam a ni. Mi chu a kut zia aṭanga hriat theih a nih angin, a ruala chûng thilthlengte chuan “Pathian ram a lo hnai tawh,” tih a târ lang  a ni. Chûng thilthlengte chu a rualin leh khawvêl huapa hmuh theihin a thleng tawh em? Finfiahnate hi han ngaihtuah teh.

1. INDONA

Kum 1914 khân, mihring chanchina la hriat ngai loh khawpa nasain indona a chhuak a! Kum 1914-ah khawvêl indopui pakhatna a chhuah avângin, hmân lai chanchin zir mite chuan chumi kum chu mihring chanchin inthlâk danglam ṭanna a ni tih an sawi. Chu indonaah chuan tank te, thlawhna aṭanga thlâk chi bomb te, silai puak rang te, tûr pai boruak te leh, thihna thlen thei râlthuam dangte chu nasa taka hman ṭan a ni a. Chumi hnuah indopui pahnihnain a rawn zui a, a tom bomb hman ṭan a ni ta a ni. Kum 1914 aṭangin hmun hrang hrangah indona a thleng reng a, chûng indonate chuan mi maktaduai tam takte nunna a la a ni.

2. LIRNGHINGTE

Kum tin hian “chhiatna nasa tak” thlen thei lîrnghîng 100 vêl a thleng ziah niin Britannica Academic chuan a sawi. United States Geological Survey chuan: “Hun rei tak aṭanga (kum 1900 vêl aṭanga) chhinchhiah dân chuan, eng kumah pawh ni se, lîrnghîng lian tham tak 16 vêl chu kan beisei reng a ni,” tiin a sawi. Mi ṭhenkhat chuan lîrnghîng a tam tial tial ni lovin, lîrnghîng hriat theihna hmaraw ṭha zâwkte kan neih vâng a ni an ti a. Mahse, dik tak chuan, khawvêl pum huapa thleng lîrnghîng lian tham tak takte hian tûn hma zawng aia nasain hrehawm tawrhna leh thihna a thlen a ni.

3. ṬAMTE

Indona te, dik lo taka thil tihna te, sumdâwnna tlâkchhiatna te, leilung hman ṭhat lohna te, leh sik leh sa nasa taka inthlâk thleng tûra thiltihnate avângin, khawvêl pumpuiah ṭâmte a tla a. World Food Programme-in a buatsaih “Kum 2018 Thlîr Lêtna” chuan: “Khawvêl pumpuiah hian, mi maktaduai 821 te chu rilṭâmin an awm a, mi maktaduai 124 te chu ṭâm lutukin an awm a ni,” tiin a sawi. Ei tûr ṭha an neih loh avângin kum tinin naupang maktaduai 3.1 vêl an thi a. Kum 2011 khân, khawvêl pumpuia naupang thi zawng zawng zaa 45 chu ei tûr ṭha neih loh vânga thi an ni.

4. NATNA LEH HRITE

World Health Organization tihchhuah thuziak pakhat chuan: “Kum zabi 21-na hian hri hlauhawm tak tak a tuar dêr tawh a ni. Tuihri te, hripui te, leh khawsik natna chi khat (vun a lo eng chhuak ṭhîn) ang chi, tûn hmaa hri lêng ṭhîn natnate chu lo thar chhuak lehin SAR natna te, influenza hri lêng te, MERS te, Ebola te, leh Zika natna ang chi natna thar te’n an rawn fin a ni,” tiin a sawi. Tûn hnaiah chuan COVID-19 hripui hi a lêng a. Scientist-te leh doctor-te hian natna chungchâng zir belh zêl mah se, natna zawng zawng tân a tihdamna an hmu thei lo a ni.

5. KHAWVEL PUM HUAP THU HRILH RAWNGBAWLNA

Isua chuan chhinchhiahna pêng dang pakhat chungchâng hetiang hian a sawi lâwk a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilin a awm ang a; chumi zawhah chuan tâwpna chu a lo thleng ang,” tiin. (Matthaia 24:14) Khawvêlin buaina khirh tak tak a hmachhawn laiin, hnam tina mi maktaduai riat chuangte chuan ram 240-ah ṭawng 1,000 aia tamin Pathian Ram chanchin ṭha chu an puang mêk a. Mihring chanchinah hetiang hi a la awm ngai rêng rêng lo.

Isua pêk chhinchhiahnate chu tûn laiah a thleng mêk a. Engvângin nge chûngte chu kan ngaihven ang? Isua’n: “Chûng chu a lo thleng in hmuh hun chuan Pathian ram a lo hnai tawh tih hria ang che u,” tia a sawi vâng a ni.—Luka 21:31.

Isua pêk chhinchhiahna leh Bible hun chhuinate chuan Pathianin a Lalram chu vânah kum 1914-ah a din tawh tih hre thiam tûrin min ṭanpui a. a Chumi kum chuan, Jehova’n a Fapa Isua Krista chu Lalah a siam a ni. (Sâm 2:2, 4, 6-9) Nakin lawkah chuan, Pathian Ramin leiah ro a rêl ang a, sawrkâr dang zawng zawng chu nuai bovin, lei chu mihringte chatuan nuna atân paradis-ah a chantîr tawh ang.

A tawi zâwnga sawi chuan, Isua min zirtîr Lal ṭawngṭaina: “I ram lo thleng rawh se. I duh zâwng vâna an tih angin leia mi’n ti rawh se,” tih chu a thleng famkim tawh ang. (Matthaia 6:10) A nih leh, kum 1914 aṭanga din a nih aṭang khân, Lalram chuan eng nge a la tih zawm zêl? Chu chuan mi zawng zawng chunga ro a rêl hunah eng nge kan beisei theih?