MIHRINGTE

Bible sawi dân chuan: Pathianin ‘leilung hi eng mah lovah a siam lo va, mihring awm nân a din zâwk a ni.’—ISAIA 45:18.

LEILUNG

Bible sawi dân chuan: “Chhuan khat an liam a, chhuan dang an lo chhuak a, lei hi erawh chu a awm reng mai.”—THUHRILTU 1:4.

A AWMZIA: Bible sawi dân chuan lei hi tihchhiat a ni ngai lo vang a, mihringte an chêng reng zâwk ang. A nih chuan, khawvêl tâwp tih awmzia chu eng nge ni?

NGAIHTUAH RAWH: Bible chuan khawvêl tâwp lo awm tûr chu Nova hun laia thilthlengte nên a khaikhin a. Chu tih hun lai chuan, lei chu “inpâwngnêknain a khat” a ni. (Genesis 6:13) Mahse, Nova chu mi fel a ni a. Chuvângin, Pathianin tui tilêtin mi suaksualte chu tiboral mah se, Nova leh a chhûngte chu a tiboral lo. Bible chuan chutih hun laia thilthleng chu heti hian a sawi a ni: “Chumi laia khawvêl awm chu tuiin a chîm a, a boral ta,” tiin. (2 Petera 3:6) Chu chu chutih hun laia khawvêl tâwpna a ni. A nih leh, tihborala awm chu eng nge ni? Lei ni lovin, leia mi suaksualte an ni. Chuvângin, Bible-in khawvêl tâwpna chungchâng a sawi hian he lei tihchhiatna chungchâng a sawina a ni lo. Chu aiin, leia mi suaksualte leh a chhûnga thil ṭha lo zawng zawng tihchhiatna a sawina a ni zâwk.

HARSATNATE LEH SUAHSUALNATE

Bible sawi dân chuan: “Rei lo tê achinah mi suaksual chu a awm tawh dâwn si lo; a ni, a awmna hmun chu en en mah la, a awm tawh lo vang. Thuhnuairawlhte erawh chuan ram hi an luah ang a, remna chênin an hmuingîl ang.”—SAM 37:10, 11.

A AWMZIA: Nova hun laia Tûilêt chuan suahsualna chu kumkhua atân a tiboral hlen lo. Tuilêt hnuah, mi suaksualte chuan leiah hian thil ṭha lo an ti leh a. Mahse, nakin lawkah chuan, Pathianin suahsualna chu a titâwp ang. Fakna hla phuahtu sawi angin: ‘Mi suaksual chu a awm tawh lo vang.’ Pathian chuan a Lalram hmangin suahsualna a titâwp ang a, chu Lalram chu vân aṭanga mi felte chunga rorêltu tûr khawvêl sawrkâr a ni.

NGAIHTUAH RAWH: Tûna leia rorêltute hian Pathian Lalram chu an thlâwp ang em? Bible chuan an thlâwp dâwn lo tih a sawi a. Atthlâk takin, Pathian Lalram chu an dodâl ang. (Sâm 2:2) Chu chuan eng nge a rah chhuah ang? Pathian Lalram chuan mihring sawrkâr zawng zawng aiawhin ro a rêl tawh ang a, “kumkhuain a ding reng ang.” (Daniela 2:44) A nih leh, engvângin nge mihringte rorêlna chu tihtâwp a ngaih?

Bible sawi dân chuan: “Tungchhova kal mihringah hian, a pheikhai hruai tûr a awm lo.”—JEREMIA 10:23.

A AWMZIA: Mihringte hi mahnia ro inrêl thei tûra siam kan ni lo va. Mi dangte chungah hlawhtling takin ro an rêl thei lo va, an harsatnate pawh an chingfel thei hek lo.

NGAIHTUAH RAWH: Britannica Academic tih lehkhabu chuan sawrkâr tinte hian “retheihna te, ṭâm te, natna te, leilung chhiatna te, leh indona emaw, tharum thawhna emawte ang chi harsatnate chu an chingfel thei lo niin a lang,” tiin a sawi. Chu bâkah: “Mi ṭhenkhat chuan . . . khawvêl sawrkâr ṭangrual chauhvin chûng harsatnate chu a chinfel theih an ring a ni,” tiin a sawi belh a. Mahse, khawvêla sawrkâr zawng zawng hi ṭangrual teh rêng pawh ni se, khawvêl hi a chunga kan sawi tâk harsatnate chingfel thei lo, ṭha famkim lo mihringte rorêlna hnuaiah a la awm tho vang. Pathian Lalram chauh hi khawvêl puma harsatna zawng zawng chingfel hlen tûra thiltihtheihna nei awmchhun a ni.

Chuvângin, Bible sawi dân chuan he khawvêl suaksual tak tâwpna chu mi ṭhate tân hlauh tûr a ni lo va. He khawvêl chhe tak leh hlui tak hi Pathian khawvêl thar ropui taka thlâk a nih dâwn avângin, chu chu beisei zâwk tûr a ni.

Eng hunah nge chûng zawng zawng chu a thlen ang? A dawta thuziakah Bible chhânnate târ lan a ni ang.