Nakin lawka Pathian vân sawrkâr tharin mihringte chunga ro a rêl hunah, khawvêl chu mite hlim taka an chênho theihna leh hna ṭha leh lungawithlâk takte an thawh theihna hmun nuam tak a ni tawh ang. Pathian chuan Isua Krista chu leia rorêl tûrin a ruat tawh a. Tûn laia rorêltu tam takte ang lo takin, Isua chuan a khua leh tuite chu tih tak zetin a ngaihsak ang. A rorêlna chu hmangaihnaa innghat a ni ang a, ani chu khawngaihna, zahngaihna leh dik taka rorêltu Lal a ni ang.—Isaia 11:4.

Khawvêl thara chêngte chu hnam leh chi avânga inṭhen hrangin an awm lo vang a. Mite chu inpumkhat takin an awm tawh ang. (Thu Puan 7:9, 10) Leia chêng mihring zawng zawng chuan Pathian leh an vêngte chu an hmangaih ang a, anni chuan an chênna lei enkawl tûra a tîra Pathian thiltum chu inlungrual takin an tihlawhtling tawh ang.—Sâm 115:16.

Pathian Ramin leia ro a rêl hun chuan, Siamtu chuan sik leh sa leh boruak awm dân zawng zawng chu inchawih tâwk taka awm tûrin a thunun tawh ang. (Sâm 24:1, 2) Isua chuan leia a awm laiin, Pathian pêk thiltihtheihna hmangin thlipui na tak chu a tireh a. (Marka 4:39, 41) Krista rorêlna hnuaiah chuan, tu mahin leilung chhiatnate an hlauh a ngai tawh lo vang. Chu bâkah, Pathian Ram chuan ramsate leh mihringte inkâra a tîra inremna an neih ang chu a awmtîr leh ang.—Hosea 2:18.

Mi tinin hrisêlna ṭha famkim an nei tawh ang a. Natna te, tarna te, leh thihnate a awm tawh lo vang. (Isaia 35:5, 6) Mite chu Eden huana mihring hmasa ber Adama leh Evi te neih ang boruak thianghlim tak leh chhehvêl mawi takah an awm tawh ang. Eden huan angin, khawvêl tharah chuan, lei hian rah tam tak a chhuah tawh ang a, a chhûnga chêng zawng zawngte chuan ei tûr tam tak an nei tawh ang. (Genesis 2:9) Hmân laia Pathian hnam thlan Israelte angin, Paradis-a chêng zawng zawngte chuan ‘an chhangte chu hnianghnâr takin an chên tawh ang.’—Leviticus 26:4, 5.

Pathian rorêlna hnuaiah chuan mi zawng zawngin remna chênin hmangaihna nei tak leh dik takin an incheibâwl tawn tawh ang. Indonate thuneihna hman sualna te a awm tawh lo vang a, kan mamawh bulpuite atâna kan buai a ngai tawh hek lo vang. Bible chuan: “Mi tinte chu an grêp hrui hnuaiah leh an theipui kûng hnuaiah an ṭhu zâwk ang a, tu mân an tihlau lo vang,” tiin min tiam a ni.—Mika 4:3, 4.

Chhûngkaw tinte chuan chênna in an nei ṭheuh vang a, chûngte chu chân leh an hlauh a ngai tawh lo vang a, an hnathawh zawng zawngte chu malsâwmin a awm ang. Bible sawi angin, Pathian khawvêl thara awmte chu “a thlâwnin an thawk rim lo vang.”—Isaia 65:21-23.

Bible chuan: “Leilung hi LALPA hriatnain a khat zo vek dâwn a ni,” tiin a sawi a. (Isaia 11:9) Pathian Rama chêngte chuan tâwp nei lo Siamtu Jehova finna leh a thil siam mawi takte chungchâng chu an zir ang a. An hriatna chu râlthuam te siam nân leh mi dangte tihnat nân an hmang lo vang. (Isaia 2:4) Chu aiin, inrem taka awmho dân leh leilung enkawl dân an zir tawh zâwk ang.—Sâm 37:11.

Pathian chuan nî tina kan nun theih nân leilung chu ṭha takin min buatsaihsak a. Mihringte chu leiah hian chatuana nung tûrin a duh a ni. (Sâm 37:29; Isaia 45:18) A tîra a thiltum tihfamkim nân, Pathianin ‘thihna chu a lem hlen tawh ang.’ (Isaia 25:8) Bible chuan: “Thihna a awm leh thei tawh lo vang a, lungngaih te, ṭah te, leh natna te pawh a awm leh tawh hek lo vang,” tiin min tiam a ni. (Thu Puan 21:4) Pathianin mi zawng zawng—he khawvêl suaksual tak a tihchhiat huna a chhandamte leh khawvêl thara mitthi chhiarsen loh a kaihthawh tûrte—chu chatuana nun theihna hun remchâng a pe ang.—Johana 5:28, 29; Tirhkohte 24:15.

 Tûnah ngei pawh, khawvêl puma mi maktaduai tam tak chu lo thleng mai tawh tûr Pathian khawvêl thar atân an inbuatsaih mêk a. Anni chu ṭha famkim lo ni mah se, Pathianin khawvêl thara chêng tûra a duh ang mite nih an tum tawh a ni. Engtin nge? Pathian Jehova leh a tirh Isua Krista chanchin zirna hmangin a ni.—Johana 17:3.

He khawvêl a tâwp huna i dam khawchhuah theih dân leh lo awm tûr khawvêl ṭha zâwka i nun theih dân chu hriat belh tum ang che. Jehova Thuhretute zînga pakhat nên Chatuanin I Hlim Thei! tih lehkhabu hmangin a thlâwna phûrawm taka Bible sawihona nei ang che.