LUZIA-I CHU A KE VEI LAM A ṬHA LO. A naupan laiin, taksa tha zâm natna chi khat polio (zeng hri natna) a vei a. Kum 16 mi a nihin, amah enkawltu chuan, “I nu i zah lo va, a thu i âwih loh avângin Pathianin he zeng natna hian a hrem che a nih hi,” tiin a hrilh a. Kum tam tak a liam hnuah pawh Luzia-i chuan chutih hun laia a lunghnualna chu a la hre reng a ni.

DAMARIS-I’N THLUAK CANCER A NEI TIH A HRIAT CHUAN, a pain: “I chunga hetiang thilthleng tûr hian eng thil nge i tih? Thil sual tak engemaw i ti a ni ngei ang. Chuvângin, Pathianin a hrem che a nih hi,” a ti a. A pa thusawi avângin Damaris-i chu a rilru a na hle.

Hmân lai aṭang tawhin natna kan tawrhte chu Pathian hremna niin an lo ngai tawh a. Manners and Customs of Bible Lands tih lehkhabu chuan Krista hun laia mi tam takin “natna chu a tuartu, a nih loh leh a laichînte thil sual tih vâng a ni a, chu chu thil sual tih avânga hremna a ni,” tih an rinzia a sawi a ni. Middle Ages hun laiin, “mi ṭhenkhat chuan an thil sual tih avângin Pathianin an chungah hri a lêntîr ṭhîn tih an ring a,” tiin Medieval Medicine and the Plague tih lehkhabuin a sawi. A nih leh, kum zabi 14-naa hri avânga Europe khawmuala mi maktaduai tam tak an thi chu mi sualte chunga Pathian rorêlna a ni em? Nge ni a, damdawi lama mi thiamte rin dân angin kai chhâwn theih bacteria avânga hri vei an ni zâwk? Pathianin mite chu thil sual an tih avânga hrem nân natna a tawrhtîr tak tak em? tiin mi ṭhenkhat chuan an ngaihtuah mai thei. *

NGAIHTUAH TUR: Natna leh hrehawm tawrhna chu Pathian hremna a nih chuan engvângin nge a Fapa Isua’n dam lote a tihdam? Chu chu Pathian dikna leh felna sawi chhiatna a ni dâwn lâwm ni? (Matthaia 4:23, 24) Isua chuan Pathian thiltihte chu englai mahin a kalh ngai lo va. Ani chuan: ‘A thil lâwmzâwng apiang ka ti fo va, Pain thu mi pêk ang zêlin thil ka ti,’ tiin a sawi.—Johana 8:29; 14:31.

Bible chuan Pathian Jehova chu “khawlohna nei lo” tiin chiang takin a sawi a. (Deuteronomy 32:4) Entîr nân, Pathianin thlawhnaa chuang tuemaw a hrem duh vâng maiin, thlawhna chu chêt sualtîrin pawisawi lo mi a za tel tihboral chu a duh lo ngei ang! Pathian felna nêna inmilin, a chhiahhlawh rinawm Abrahama chuan Pathianin ‘mi felte chu mi sualte zîngah a tiboral’ ngai lo vang tih a sawi a. Pathianin chutiang chuan a “ti âwm êm si lo va,” tiin a sawi. (Genesis 18:23, 25) Bible-in “Pathian chuan suaksual takin a ti lul lo vang a,” “thil suaksual” chu a ti lo vang tiin a sawi bawk.—Joba 34:10-12.

Kan hrehawm tawrhte chu thil sual engemaw kan tih avânga Pathian min hremna a ni lo va. Isua ngei pawhin chu chu a dikzia a hria a, a zirtîrte nên pian tirh ata mitdel an hmuh khân a hriat theih a ni. “A zirtîrten a hnênah, ‘Rabbi, mitdel saa a pian hi tuin nge thil tisual, he mi hian nge a nu leh a pain?’ an ti a, an zâwt a. Isuan, ‘He mi hian a tisual hek lo, a nu leh a pain an tisual hek lo; Pathian hnathawh a chunga a lanna tûr a nih zâwk hi’” tiin a chhâng a ni.—Johana 9:1-3.

Ngaih dân dik lote a darhzau êm avângin Isua’n  a hnungzuite hnênah mitdel chunga thilthleng chu amah vâng emaw, a nu leh pa vâng emaw a ni lo tih a hrilh chuan mak an ti ngei ang. Isua’n mitdel chu a tidam mai ni lovin, hrehawm tawrhna chu Pathian min hremna a ni tih ngaih dân chu a dik lohzia a hai lang a ni. (Johana 9:6, 7) Tûn laia natna khirh tak tuartute pawhin an hrehawm tawrhna chu Pathian vâng a ni lo tih hriatna aṭangin thlamuanna an hmu thei a ni.

Hêng Bible chângte hian min rinnghehtîr

• “Pathian chu sual thlêm rual a ni lo, amah pawhin tumah a thlêm ngai lo.”(JAKOBA 1:13) Dik tak chuan natna te, hrehawmna te, thihnate pawh tiamin, kum zabi tam tak chhûng mihringte tihrehawmtu “sual” chu nuai bo a ni thuai tawh ang.

• Isua Krista chuan “dam lo zawng zawngte chu a tidam bawk a.”(MATTHAIA 8:16) A hnêna lo kal zawng zawngte chu tidamin Pathian Fapa chuan Pathian Ramin khawvêl puma a thil hlen chhuah tûrte chu a târ lang.

• “[Pathianin] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta.”—THU PUAN 21:3-5.

A nih leh, engvângin nge mihringte hian natna leh hrehawm tawrhnate chu heti khawpa kan tawrh ni? Mihringte hian chu zawhna chu kum zabi tam tak chhûng an lo ngaihtuah tawh a. Pathian chu mawhpuh tûr a nih loh chuan tu nge kan mawhpuh tâk ang? Chûng zawhnate chhânna chu a dawta thuziakah kan sawiho vang.