CHHIATNA RAPTHLAK TAK A THLEN HIAN, ‘KHAWIAH NGE PATHIAN A AWM?’ TIIN I NGAIHTUAH NGAI EM? A NIH LOH LEH I NUNAH THILTHLENG RAPTHLAK TAK I TAWH HIAN PATHIANIN A MI MAL TAKIN A NGAIHSAK CHE TIH I RINGHLEL EM?

United States-a awm Sheila-i angin i ngai ve mai thei. Sakhaw ngaihsak tak chhûngkuaa seilian a ni a, ani chuan: “Pathian chu min Siamtu a nih avângin ka naupan têt aṭangin ka ngaina hle a. Mahse, ka hnaih ngai miah lo niin ka hria. Ani chuan hla tak aṭangin min en mai ni hian ka hria a. Min huat ka ring lo ang bawkin min ngaihsak pawh ka ring hek lo,” tiin a sawi. Engvângin nge Sheila-i chuan rinhlelhna a neih? “Kan chhûngkua chuan inzawm zatin harsatna kan tâwk a; mahse, Pathianin min ṭanpui lo hulhual niin a lang,” tiin a sawi belh a ni.

Sheila-i angin, Pathian Engkimtithei a awm tih chu i ring ngei ang. Mahse, a ngaihsak tak zet che leh che loh i ngaihtuah pawh a ni thei. Chutiang rinhlelhna chu Siamtuin thiltihtheihna leh finna a nei tih ringtu mi fel Joba pawhin a nei a ni. (Joba 2:3; 9:4) Chhiatna râpthlâk tak takte inzawm zata a tawh avânga rilrua hahdamna reng a neih loh hnu chuan Pathian hnênah: “Engah nge i hmêl i thupa, i hmêlmaa mi ngaih le?” tiin a zâwt a ni.—Joba 13:24.

Bible-in eng nge a sawi? Chhiatna râpthlâk takte a thlen hian Pathian kan mawhpuh tûr a ni em? Pathianin mi nâwlpuite bâkah mi mal tinte chu a ngaihsak tak zet tih finfiahna a awm em? Pathianin a mi mal takin min hriain, min hre thiamin, min tawrhpuiin, kan buainaahte min ṭanpui dâwn leh dâwn loh kan hre thei em?

A dawta thuziakahte chuan Pathianin min ngaihsak tak zet dân thilsiamte’n min zirtîr chu kan ngaihtuahho vang. (Rom 1:20) Tichuan, Pathian ngaihsakna chungchâng Bible sawite pawh kan enho bawk ang. A thilsiamte leh a Thu aṭanga ‘amah kan hriat’ tam poh leh ‘min ngaihsak’ tih kan chiang lehzual ang.—1 Johana 2:3; 1 Petera 5:7.