Hrehawm tawrna chu Pathian vâng a nih loh chuan ṭâmna te, retheihna te, indona nasa tak te, natna khirh tak tak te, leh leilung chhiatnate hi engvânga awm nge ni ta ang? Pathian Thu Bible-in mihringte hrehawm tawrh chhan bulpui pathum chu a târ lang a ni:

1. Hmasialna, Duhâmna, leh Huatna. “Mi, mi dang chungah pawi khawpin a intilal ṭhîn a.” (Thuhriltu 8:9) Mite chuan ṭhat famkim lohna te, mahni hmasialna te, a nih loh leh nunrâwngnate avângin hrehawm an tuar fo ṭhîn a ni.

2. Hun leh Hriat Lâwk Loh Thilthlengte. Mi hringte chuan ‘hun leh beisei loh thilte a thlen ṭhin avângin’ hrehawm an tuar ṭhîn a. (Thuhriltu 9:11, NW) Mite chuan a hun lo leh a hmun lova an awm avângin accident-te an tâwk a, a nih loh leh an fîmkhur loh avângin thil an tisual ṭhîn a ni.

3. Khawvêl Rorêltu Sual Tak. Bible chuan mihringte hrehawm tawrh chhan bul ber chu chiang takin a târ lang a. “Khawvêl pumhlûm hi mi sual thu thuin a awm,” tiin a sawi. (1 Johana 5:19) Chu “mi sual” chu Diabol Setana a ni a, ani chu a tîrin Pathian vântirhkoh, thlarau thil siam thiltithei tak ni mah se, “thutakah a awm lo.” (Johana 8:44) Thlarau thil siam dangte chuan Setana chu thlâwpin mahni hmasialna an ûm avângin Pathian lakah an hel a, ramhuaiah an insiam a ni. (Genesis 6:1-5) An hel aṭangin Setana leh a ramhuaite chuan he khawvêl chungah an thiltihtheihnate chu râwng takin an hmang a. Chu chu kan hunah hian a thleng dik lehzual a ni. Tûnah, Diabola chu a thinrim êm avângin ‘khawvêl zawng zawng a bum a,’ chu chuan ‘leiah chung pikna’ a thlen a ni. (Thu Puan 12:9, 12) Dik tak chuan Setana chu rorêltu nunrâwng tak a ni a. Mihringte hrehawm tuar a hmuh hian a lungawi hle a. Chuvângin, mihringte chunga hrehawm tawrhna thlentîrtu chu Pathian ni lovin, Setana a ni.

NGAIHTUAH TUR: Lainatna thinlung nei lo mi sual tak pakhat chauh pawhin pawisawi lote chungah hrehawm tawrhna a thlentîr thei a. Chu mi nêna inkalh takin Bible chuan: “Pathian chu hmangaihna a ni si a,” tiin a sawi. (1 Johana 4:8) A hmangaihna mizia nêna inmil takin “Pathian chuan thil suaksual tiin, Engkimtitheia chuan thil dik lo chu a ti teuh lo vang!”—Joba 34:10.

Amaherawh chu ‘Pathian Engkimtitheia chuan Setana awpna râwng tak chu eng chen nge a awmtîr ang?’ tiin i ngaihtuah mai thei. Kan hmuh tawh angin, Pathianin sual chu a hua a, kan hrehawm tawrhnain ani chu nasa takin a tihrehawm a ni. Chu bâkah, a Thuin: “Anin a ngaihsak ṭhin che u avângin in manganna zawng zawng ama chungah nghat vek rawh u,” tiin min fuih bawk. (1 Petera 5:7) A dawta thuziaka kan hmuh tûr angin, Pathian chuan min hmangaihin, hrehawmna leh rorêl dik lohna zawng zawng nuai bo tûrin thiltihtheihna a nei a ni. *