Pathianin kan taksa hi mak taka amaha intidam thei tûrin a siam a. Kan taksa chu kan zai palhin, kan tipemin, kan chhun palh a nih chuan “hliam chu a nasa emaw, nasa lo emaw pawh ni se, amaha intidam tûrin, taksa hian hna a thawk nghâl a ni.” (Johns Hopkins Medicine) Taksa hian thisen chhuak chu a titâwp nghâl a, hliam chu a tiziaawm a, pangti mur-te chu a tichak a ni.

NGAIHTUAH TUR: Pathianin kan taksa hliam chu amaha intidam thei tûra a siam a nih chuan, rilru hliamte tidam tûra a thutiamte chu kan ring thei dâwn lâwm ni? Fakna hla phuahtu chuan “Lungchhiate chu a tidam a, an hliamnate chu a tuam ṭhîn,” tiin a ziak a ni. (Sâm 147:3) A nih leh, rilru natna emaw, hrehawmna emaw nei ta la, Jehova’n i hliamte chu tûnah leh nakinah a tidam ang tih engtin nge i chian theih?

Pathian chuan: “Hlau suh u, kei in hnênah ka awm si a; mangang suh u, kei in Pathian ka ni si a: ka tichak ang che u a; a ni, ka ṭanpui ang che u,” tiin min tiam a. (Isaia 41:10) Jehova’n min ngaihsak a ni tih hretu chuan rilru thlamuanna a nei a, fiahna chi hrang hrangte hmachhawn tûrin chakna a nei a ni. Tirhkoh Paula chuan chu chhûngrila thlamuanna chu “Pathian thlamuanna, rilru rêng rênga hriat sên loh” tiin a sawi a. “Mi tichaktuah chuan engkim ka ti thei,” tiin a sawi belh bawk.—Philippi 4:4-7, 9, 13.

Bible-in rinna nei tûra min ṭanpuina chu mihringte hma lam hun atâna Jehova thutiamah a ni. Entîr nân, Thu Puan 21:4, 5 (phêk leh lamah târ lan a ni) chuan a tih tûr leh kan rin chhan theih dânte min hrilh a ni:

• Mihringte mit ata “mittui zawng zawng a hrufai ang.” Kan hrehawm tawrhna te, manganna te, leh mi dangte tâna ho tak anga lang kan lungkhamna zawng zawngte pawh a nuai bo tawh ang.

• Vâna “lalṭhutphaha ṭhu,” thil engkim Siamtu leh Engkimtithei Lal chuan kan hrehawm tawrhnate nuai bo tûr leh kan mamawhte min ṭanpui tûrin a thiltihtheihna leh thuneihna a hmang tawh ang.

• Jehova chuan a thutiamte chu “a rinawmin a dik si a,” tiin a tiam a. Chu chu, a thutiamte tihfamkimna hmangin Pathian dik a nihzia a lan chhuahtîr ang tihna a ni.

“‘An mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,’ a tih ka hria. Tin, lalṭhutphaha ṭhu chuan, ‘Ngai teh, thil engkim ka siam thar e,’ a ti a. Tin, ‘Ziak rawh, hêng thu hi a rinawmin a dik si a.’”—Thu Puan 21:4, 5.

Kan Pa vâna mi miziate chu universe leh Bible-in a târ lang a. Thil siamte chuan Pathian chu ṭhian hnai tak anga hre tûrin min sâwm a, chu sâwmna chu Bible-in: “Pathian hnaih rawh u, tichuan anin a hnaih ang che u,” tiin tlang takin a sawi a. (Jakoba 4:8) Tirhkohte 17:27 chuan: “Ani chuan min hlat lo ṭheuh si a,” tiin a sawi bawk.

Pathian hre tûra hun i pêk chuan “a ngaihsak ṭhin che,” tih i ring nghet lehzual ang. (1 Petera 5:7) Jehova chunga chutiang rinna kan neih avânga hlâwknate chu eng nge ni?

Japan rama Toru-a thiltawn hi han ngaihtuah teh. Kristian mi a nuin a enkawl seilian a; mahse, Japanese Mafia pâwl râwng tak yakuza pâwlah a tel a. Ani chuan, “Pathian hian min hua niin ka hria, mitthite, a bîk takin ka chhûngkhat thite hi Pathian min hremna niin ka ngai,” tiin a sawi. He khawvêl boruak ṭha lo leh rilru chhe tak kârah hian “ngilneihna leh khawngaihna nei lovin” ka seilian a. A thiltum chungchângah, “Kei aia mi hmingthang zâwk tuemaw thah a, mahni hming chawi lâr hnua thih mai chu ka duh a ni,” tiin a sawi belh bawk.

Mahse, Toru-a’n a nupui Hannah-i ruala Bible a zir hnuah a nun dân leh a thil thlîr dân chu a thlâk  thleng ta a. A nupuiin “Ka pasal chu ka mithmuh ngeiah a inthlâk a ni,” tiin a sawi. Tûnah chuan, Toru-a’n: “Mi mal tin min ngaihsak tak zettu Pathian a awm a. Ani chuan tuma boral a duh lo va, an thil sual tih avânga inchhîr tak zette chu ngaihdam a duh a. Tumah kan hrilh ngam loh thute leh tuman min hriatthiampui loh tûr thute chu a hnênah kan sawiin, min ngaihthlâksak ṭhîn a ni. Nakin lawkah, Jehova chuan buaina te, hrehawm tawrhna te, leh rilru natna zawng zawng chu a nuai bo vang. Tûnah ngei pawh kan beisei loh kawngtein min ṭanpui a. Kan lunghnual hunahte min ngaihsakin, min thlamuan ṭhîn a ni,” tiin a sawi.—Sâm 136:23.

Toru-a thiltawnin a târ lan angin Pathianin hrehawm tawrhna zawng zawng a nuai bo ang a, kan mittuite a hrufai theiin, hma a la thuai ang tih hriatna chuan nakin hun atân beiseina dik tak min pêk mai bâkah tûnah ngei pawh nun ṭha zâwk nei tûrin min ṭanpui a ni. Ni e, hrehawm tawrhnaa khat khawvêlah awm mah ila, Pathian hmangaihna chu i hlâwkpui thei a ni.