Mihringte neih inlaichînna hnai ber zînga pakhat—hriat hran theih loh khawpa inang phîrte hi han ngaihtuah teh. Inhriat tawnna danglam bîk tak an nei a. Phîr ṭhenkhat chuan “hrilh fiah ngai lova an sawi tum chiah hre thiamtu hnêna thusawi chu engtiang nge ni tih an hre” thei a ni tiin phîrpui nei Twin Studies Center-a Director Nancy Segal-i chuan a sawi. Nu pakhat chuan amah leh a phirpui inkâra an inlaichînna chu heti hian a sawi a: “Engkim kan inhre tawn vek a ni,” tiin.

Chutianga inhriatthiamna danglam bîk tak a awm chhan chu eng nge ni? Zir chîk mite chuan pian leh murna te, nu leh pa enkawlna te, bâkah phîrte ze inthlah chhâwnna inang tak vâng a ni deuh ber niin an sawi.

NGAIHTUAH TUR: Chutiang inthlah chhâwnna mak tak Siamtu chuan mi zawng zawng taksa siam dân chu a hre chiang hle a. Dik tak chuan, fakna hla phuahtu Davida chuan: “Ka nu pum chhûngah mi khuh a. A rûka siama . . . ka awm lai khân ka ruhrêl chu i lakah thupin a awm lo. Ka rîruang la famkim lo chu i mitin a hmu a, i lehkhabuah chuan ka pêngte zawng zawng hi ziak vek a ni,” tiin a sawi a ni. (Sâm 139:13, 15, 16) Kan ze inthlah chhâwn dânte mai ni lovin, kan nuna thilthleng zawng zawngte hre vektu chu Pathian chauh a ni. Kan ze inthlah chhâwn dânte leh kan chungchâng a hriat chian êm avângin kawng engkimah min hre thiam tih kan chiang thei a ni.

Davida chu heti hian a ṭawngṭai a: “Aw LALPA, nangin ngun takin mi en chhuak a, mi hre ta. Nangin ka ṭhut leh ka din hi i hre ṭhîn a, ka ngaihtuahna hi hla tak aṭang pawhin i hre thiam ṭhîn. Ngai teh, aw LALPA, nangin i hriat fai vek loh chu, ka leiah hian thu rêng rêng a awm lo,” tiin. (Sâm 139:1, 2, 4) Chu bâkah, Jehova chuan chhûngrila kan ngaihtuahnate pawh a hriain, “rilrua suangtuah zawng zawngte hi a hre vek a ni.” (1 Chronicles 28:9; 1 Samuela 16:6, 7) Hêng Bible chângte hian Pathian chungchâng eng nge a târ lan?

Kan ngaihtuahna leh kan rilrua awm zawng zawngte chu sawi chhuak vek lo mah ila, min Siamtu chuan kan thiltihte a hmu mai ni lovin, kan tih chhante pawh a hre thiam bawk a ni. Chu bâkah, thinlung takin thil ṭha tihduhna nei mah ila, tih theih chin tâwk kan nei tih pawh a hre thiam. Pathianin kan thinlungah hmangaihna a dah avângin kan ngaihtuahna leh min chêttîrtute chu hmuh a duhin, hriat a châk a ni.—1 Johana 4:7-10.

 Hêng Bible chângte hian min rinnghehtîr

• “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn a.”—1 PETERA 3:12.

• Pathianin: “Fing taka awmtîr chein i kalna tûr kawng chu ka entîr ang chia: Ka mita en reng chung chein rem ka ruatsak zêl ang che,” tiin min tiam a ni.—SAM 32:8.

Pathianin kan dinhmun leh rilru put hmangte a hre thiam a ni tih hriatna chuan kan harsatnate hmachhawn tûrin min ṭanpui thei em? Nigeria rama Anna-i chunga thilthleng hi han ngaihtuah teh. “Ka dinhmun beidawnthlâk tak avângin nun hian awmzia a nei tih ka ringhlel ṭhîn. Hmeithai ka ni a, Hydrocephalus natna (thluaka tui hnâm) avânga damdawi ina mu ka fanu chu ka enkawl mêk bâkah, keimah ngei pawh hnute cancer ka ni a, chemotherapy, leh radiotherapy hmanga enkawl a, zei ngai ka ni. Keimah mai ni lovin, dinhmun derthâwng taka awm ka fanu nên damdawi ina a ruala inenkawl kan ngai chu ka tân dinhmun harsa tak a ni,” tiin a sawi.

A dinhmun hmachhawn thei tûrin Anna-i chu engin nge ṭanpui? “Philippi 4:6, 7-a ‘Pathian thlamuanna, rilru rêng rênga hriat sên loh khân, in thinlung leh in ngaihtuahnate chu . . . a vênsak ang che u,’ tih thute chu ka ngaihtuah ṭhîn a. Ka rilrua he Bibe châng a lo lan apiangin mahni ka inhriat aiin Jehova’n min hre chiang zâwk tih ka hria a, amah nên inlaichînna hnai tak ka nei a ni. Kohhrana unau duhawm takte hnên aṭang pawhin fuihna tam tak ka dawng bawk.

“Ka hrisêlna chu la ṭha chiah hrih lo mah se, ka fanu nêna kan dinhmun chu a ṭha chho telh telh a. Kan lama Jehova a ṭan avângin chûng harsatna kan hmachhawnte chu a chhe zâwnga thlîr loh kan tum tlat a. Jakoba 5:11 chuan: ‘Tuartute chu engthâwl kan ti a; Joba chhelzia chu in hria a, Lalpan a tâwpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha,’” tiin min tiam a. Jehova chuan Joba dinhmun chu a hre vek a, kan harsatna engpawh a hre thiam dâwn tih kan chiang thei a ni.