Nausên a pian aṭanga minute 60 chhûng hian nuin a fa chu a hnaih theih ang bera a awmpui tlat a pawimawh hle a ni. Engvângin nge? Chutianga awmpui tlatna chuan nausên chu rilru leh tisa lama a ṭhan chhohnaah a ṭanpui ang. *

A fa piang hlim ngaihsak tûra nu chêttîr nghâltu chu eng nge ni? Professor Jeannette Crenshaw-a chuan The Journal of Perinatal Education tih lehkhabuah nu taksaa hormone oxytocin rawn tam chho chuan “nausên piang hlim chu khawih a, en a, a hnute hnêktîrnain nu nihna rilru a neihtîr” tiin a hrilhfiah a ni. Chutih ruala hormone dang kiam thla chuan “nu chu nausên a ngaihsak nghâltîr” bâkah an inzawm tawnna a tinghet bawk. Chu chu engvânga danglam tak nge a nih?

Nu leh nausên inkâra inlaichînna hnai tak chu hmangaihna nei tak Siamtu Pathian Jehova duan a ni a. * Lal Davida chuan ‘chhûl ata lâk chhuah’ a nih avâng leh a nu ângchhûngah him nia inhriatna a neihtîr avângin Pathian chu a chawimawi a ni. “Chhûl aṭang rêngin nangma chunga nghah ka ni a: Nang chu ka nu pum chhûng aṭang rêngin ka Pathian i ni,” tiin a ṭawngṭai bawk.—Sâm 22:9, 10.

NGAIHTUAH TUR: Pathianin nu chu hmangaihna nei taka a fa enkawl a, a mamawhte pe tûra mak danglam taka a siam a nih chuan, keini “Pathian thlahte” chu a mi mal takin min ngaihsak a ni tih chu a inâwm hle lo maw?—Tirhkohte 17:29.

Tu dang zawng aia Siamtu hre chiang bertu Isua Krista chuan: “Chawngzawng pahnih dâr tangka pakhatah an hralh ṭhîn lo vem ni? Nimahsela, an zînga pakhat mah in Pa lovin leiah a tla lo vang. In samzaite lam pawh hi chhiar vek a ni asin. Chuvângin hlau suh u; chawngzawng tam tak aiin in hlu zâwk,” tiin min zirtîr a.—Matthaia 10:29-31.

Kan hmuh ṭhin sava tête ngaihventu chu kan tam lo hle a, ‘an zînga pakhat leia tla’ lai hmu pawh kan awm mang meuh lo vang. Mahse, kan Pa vâna mi chuan an zînga pakhat tê pawh a hria asin! A tân chuan mihringte hi sava engpawh aiin an hlu zâwk a ni. Chuvângin, Pathian hriat loh nih chu i ‘hlauh’ a ngai lo tih a chiang hle. Chu aiin, ani chuan a va ngaihsak tak che êm!

 Hêng Bible chângte hian min rinnghehtîr

• “LALPA mit chu hmun tinah a awm a, thil ṭha lo leh ṭha a enthla reng ṭhîn.”—THUFINGTE 15:3.

• “LALPA mit chuan mi felte lam a en ṭhîn a, A beng chuan an au hre tûrin a ngaithla reng ṭhîn.”—SAM 34:15.

• “I ngilneihna avâng hian ka hlimin ka lâwm ang: Ka manganna hi i hmu si ṭhîn a; Ka nunna hi a hrehawm laite pawhin i hre ṭhîn.”—SAM 31:7.

Pathianin kan ṭhatna tûr a ngaihven tak zetin, hmangaihna nei takin min en reng tih hre ta ila, chu chuan kan nun a tidanglam thei ang em? Thei tak meuh mai, England rama Hannah-i * chuan:

“Jehova’n min hmangaih lovin, ka ṭawngṭainate pawh chhân ni hian ka hre ngai lo. Chu chu keima lamah rinna ka tlâkchham vâng ni hian ka hria. Mi pawimawh ka nih loh avângin hrem emaw, ngaihthah emaw ni hian ka inhre bawk a. Pathianin min ngaihsak lo niin ka ngai,” tiin a sawi.

Mahse, tûnah chuan Hannah-i’n Jehova ngaihsakna leh hmangaihna chu a ringhlel tawh lo. Engin nge a ngaih dân thlâk danglam? “Zawi zawiin a inthlâk a. Kum tam tak kal ta khân, ka rilru khawih êm êmtu Isua tlanna inthawina chungchânga Bible ṭanchhan thusawi ka hria a, Jehova’n min hmangaih a ni tih min hriat chhuahtîr leh a ni. Ka ṭawngṭainate chhân a nih chuan Jehova’n min lo hmangaih tak zet a ni tih ka hriat chhuah avângin ka mittui a tla ta zawih zawih a. Bible zirna leh Kristian inkhâwma ka telna aṭangin Jehova, a mizia, leh min thlîr dânte chu ka hriat belh a ni. Tûnah chuan Jehova’n kan zain min ṭanpuiin, min hmangaih a ni tih leh mi mal tinte chu ngaihsak a duh tak zet tih ka hre chiang ta,” tiin a sawi.

Hannah-i thusawi chuan min tichak a. A nih leh, Pathianin i rilru vei zâwngte chu a hre thiamin, a hre reng tih engtin nge i hriat theih? Chu chu a dawta thuziakah chhân a ni ang.