Lainatna tih awmzia chu “mi dangte rilru vei zâwng leh thiltawnte hriat nân an dinhmuna mahni inchan a, tawrhpuina” hi a ni. Rilru hrisêlna lama mi thiam, Dr. Rick Hanson-a chuan “lainatna chu kan ruh chhûnga awm a ni,” tiin a sawi.

NGAIHTUAH TUR: Thil siam dangte neih mizia nêna khaikhin rual loh lainatna chu engvânga nei nge kan nih? Bible chuan Pathianin mihringte chu a anpuiin a siam tih min hrilh a. (Genesis 1:26) Pathian anpuia siam kan nih avângin a mize ṭhate chu engemaw chên kan lantîr thei a ni. Chuvângin, lainatnain mi dangte ṭanpui tûra min chêttîr hian khawngaihnaa khat Siamtu Pathian Jehova lainatna chu kan lan chhuahtîr a ni.—Thufingte 14:31.

Pathianin min lainat avângin hrehawm kan tawrh chu hmuh nuam a ti lo va. Aigupta rama hrehawm taka sal an tân hnua thlalêra kum 40 chhûng harsatna tâwk hmân lai Israel mite chungchângah Bible chuan: “An manganna zawng zawngah chuan ani chu a mangang ve ṭhîn a,” tiin a sawi. (Isaia 63:9) Pathian chuan an manganna chu a hre mai a ni lo tih chhinchhiah ang che. An natna chu a tawrhpui zâwk a. “An lungngaihnate chu ka hre reng si a,” tiin a sawi. (Exodus 3:7) Pathian chuan “Nangni khawihtu chuan ka mit nautê a khawih a ni mai,” tiin a sawi bawk. (Zekaria 2: 8, New World Translation) Mi dangte’n min tihnat hian min tawrhpui a ni.

Mahni inthiam lohna kan nei a, Pathian lainatna dawng tlâk lova kan inngai a nih pawhin “Pathian chu kan rilru aiin a ropui zâwk a, engkim a hre si a,” tiin Bible chuan min tiam a. (1 Johana 3:19, 20) Pathian chuan mahni kan inhriat aia chiangin min hria a. Kan dinhmun te, ngaihtuahna te, leh rilru vei zâwngte chu a hre vek a. Ani chuan min lainat a ni.

 Hêng Bible chângte hian min rinnghehtîr

• “I ko vang a, tichuan LALPAN a chhâng ang: i au vang a, tichuan anin, ‘Heta hi ka awm,’ a ti ang.”—ISAIA 58:9.

• “Nangni lama ka rilru putzia chu ka inhre si a, in hun hnuhnûng tâwpah chuan beiseina pe tûr che uin, thil ṭha lo ni lovin, ṭhatna ka ngaihtuah asin. Tin, min lam ang a, ka hnênah in rawn ṭawngṭai ang a, ka ngaithla ang che u.”—JEREMIA 29:11, 12.

• “Ka mittuite hi i savun pengah chuan thun ang che; I lehkhabuah a chuang hlawm lâwm ni?”—SAM 56:8.

Pathianin min lainat tih hriatna chuan kan harsatnate hmachhawn thei tûrin min ṭanpui em? Maria-i thiltawn hi han ngaihtuah teh:

“Kum 2 chhûng hrehawm taka cancer natna vei, ka fapa kum 18 mi ka chân hnu chuan nun hi ka tân a hrehawm tak zet a. Pathian Jehova chu ka fapa tidam tûra a rawn inrawlh loh avângin a chungah ka thin a rim hle!

“Kum ruk a liam hnuah, kohhrana hmangaihna leh khawngaihna nei tak ka ṭhian pakhat chuan Jehova’n min hmangaih lo nia ka hriat thute ka sawi chu ṭha takin min ngaihthlâksak a. Ka thusawite ka sawi zawh thlenga ngun taka min ngaihthlâksak hnuah ka rilru khawih deuhtu Bible châng pakhat—1 Johana 3:19, 20-a thu: ‘Pathian chu kan rilru aiin a ropui zâwk a, engkim a hre si a,’ tih hi min hrilh a. Jehova’n kan hrehawm tawrhte chu min hriatthiampui tih min hrilh a ni.

“Chutichung pawhin ka thinrim chu a la reh nghâl mai thei lo! Tichuan, Sâm 94:19-a: ‘Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn,’ tih thu hi ka chhiar a. Ka tâna ziah ni hian ka hria! A tâwpah chuan Jehova’n min ngaithlain, min hre thiam a ni tih ka hriat avângin ka hrehawm tawrhte hrilh chu nuam ka ti ta a ni,” tiin a sawi.

Pathianin min hre thiamin min tawrhpui a ni tih hriat chu a va thlamuanthlâk tak êm! A nih leh, engvângin nge hrehawm tawrhna a tam êm êm? Thil sual kan tih avânga Pathian min hremna a ni em? Pathianin hrehawm tawrhna zawng zawng a ti tâwp ang em? Chûng thute chu a dawta thuziakah târ lan a ni ang.