A Zâwlneite Hnên Aṭangin Pathian Chungchâng Kan Zir
Tûn hma chuan, Pathianin a thuchah pawimawhte chu a zâwlneite hmangin mihringte hnênah a pe a. Chûng thuchahte chuan Pathian malsâwmnate dawn theih dân min hriattîr thei em? Thei e. Zâwlnei rinawm pathumte hnên aṭanga kan zir theihte chu i lo en ang u.
ABRAHAMA
Pathian chuan thlei bîk a nei lo va, mi zawng zawng chu malsâwm a duh a ni.
Pathian chuan zâwlnei Abrahama chu “nangmahah chuan leia hnam tin an la thawveng ang,” tih a tiam a ni.—Genesis 12:3.
Eng nge kan zir? Pathian chuan min hmangaih êm avângin, a thuâwihtu chhûngkua zawng zawng—a hmei a pa leh naupang te—chu malsâwm a duh a ni.
MOSIA
Pathian chu mi khawngaih thei tak a ni a, ani chuan amah hriat tumtute chu mal a sâwm a ni.
Engkimtitheia chuan zâwlnei Mosia chu thilmak ropui takte ti thei tûrin thiltihtheihna a pe a. Mahse, Mosia chu: “Nangmah ka hriat chian theih nân che leh i mittlunga ka awm theih nân tûnah hian i kawngte hi khawngaih takin mi hriattîr ang che,” tiin a ṭawngṭai a ni. (Exodus 33:13) Pathianin Mosia ngenna chu a lawm êm avângin A kawngte leh miziate hriat chian lehzualna leh hriatthiam theihna pein mal a sâwm a. Entîr nân, Mosia chuan Siamtu chu, “Pathian lainatnaa khat, mi khawngaih thei tak” a ni tih a hria a ni.—Exodus 34:6, 7.
Eng nge kan zir? Pathian chuan a hmei a pa leh naupangte pawh tiamin, amah hriat chian lehzual tumtu zawng zawngte chu malsâwm a duh a. Pathian Lehkha Thu-ah chuan amah kan biak theih dân te, a duhsakna leh malsâwmnate dawng tûra min duhziate a târ lang a ni.
ISUA
Isua chuan natna tinrêng chu khawngaihna nei takin a tidam
Isua thiltihte leh zirtîrnate chungchâng kan zir a nih chuan, Pathian tiam chatuan malsâwmnate chu kan dawng thei a ni.
Pathian Thu, Bible-ah hian Isua nun leh zirtîrnate chu chipchiar takin a chuang a. Pathian chuan Isua chu mitdel te, bengngawng te, leh kebaite tihdam theihna ang chi thilmak ropui tam tak ti tûrin thiltihtheihna a pe a. Isua chuan mitthite hial pawh a kaitho va. Chutiang chuan, nakin huna mi zawng zawng chunga Pathianin malsâwmna a vûr tûr chu a târ lang a ni. Chûng malsâwmnate kan dawn ṭheuh theih dân chu heti hian a sawi a ni: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin.—Johana 17:3.
Isua chu khawngaihna nei tak, ngilnei tak, leh zahngai thei tak a ni a. A hmei a pa, a pui a pangte chuan he a sâwmna duhawm tak: “Ka hnênah zir rawh u; thuhnuairawlh leh rilrua inngaitlâwm tak ka nih hi; tichuan, in thlarau tân chawlhna in hmu ang,” tih hi an chhâng lêt a ni. (Matthaia 11:29) A hun laia dik lo taka hmeichhiate cheibâwltute nêna inang lo takin, ani chuan hmeichhiate chu ngilnei tak, zahawm tak, leh zah thiam takin a cheibâwl a ni.
Eng nge kan zir? Isua chuan mite a hmangaih tak zetzia lantîrin, kan incheibâwl tawn dân tûr chungchângah entawn tûr ṭha tak a siam a ni.
ISUA CHU PATHIAN A NI LO
Pathian Lehkha Thu chuan, “Keini tân erawh chuan Pathian pakhat chauh (Pa chu) a awm,” tih leh Isua Krista erawh chu Pathian thuchah kengtu inngaitlâwm tak a ni tih min zirtîr a. (1 Korinth 8:6) Isua chuan Pathian chu amah aiin a ropui zâwk tih leh Pathianin ani chu leiah a rawn tîr tih chiang takin a sawi a ni.—Johana 11:41, 42; 14:28. *
^ par. 17 Isua Krista chungchâng hriat belh nân, www.pr418.com-a hmuh theih Real Faith—Your Key to a Happy Life tih brochure bung 8-na leh 9-na chu en ang che.