Pathian chuan zâwlnei Abrahama hnênah a thlahte zînga pakhatin “khawvêla chi tin” tân malsâwmna a thlen dâwn tih a tiam a ni. (Genesis 22:18) Chu thlah chu tu nge ni ang?

Kum 2,000 dâwn lai kal ta khân, Pathianin Abrahama thlah Isua chu thilmak ropui tak tak ti tûrin thiltihtheihna a pe a. Chûng thilmakte chuan Abrahama hnêna thutiam chu Isua hmangin hnam tin chungah a thleng famkim ang tih a târ lang a ni.—Galatia 3:14.

Isua thilmak tihte chuan ani chu mihringte malsâwm tûra Pathian thlan a nihzia a tichiangin, Pathianin mihringte chatuana mal a sâwm dân tûr pawh a târ lang bawk. Isua thilmak tihte’n a mize duhawm ṭhenkhat a târ lan dân hi lo chhinchhiah rawh.

Lainatna—Isua chuan dam lote a tidam.

Ṭum khat chu, phâr pakhatin a natna tihdamsak tûrin Isua a ngên a. Ani chuan chu phâr chu dekin: “Ka duh e!” a ti a. A lo dam ta nghâl a ni.—Marka 1:40-42.

Thilphalna—Isua chuan rilṭâmte chu ei tûr a pe.

Isua chuan mite chu rilṭâma an awm a duh lo va. Chhang tlêm tê leh sangha tlêm tê chu mak taka tipungin, mi sâng tam tak chu ṭum khat aia tam a hrai a. (Matthaia 14:17-21; 15:32-38) An ei zawh hnu chuan, an zain an puar a, a bâng tam tak pawh a awm.

Khawngaihna—Isua chuan mitthite a kaitho.

Isua chuan amah enkawltu tûr fa dang nei lo hmeithai lusûn a hmuh chuan “a khawngaih êm” avângin, a fapa mal neih chhun chu a kaihthawhsak a ni.—Luka 7:12-15.