Pathian chuan mihringte chu thilpêk hlu tak—ṭawngṭaia amah nêna inbiak pawh theihna leh kan rilru vei zâwngte sawi chhuah theihna min pe a. Zâwlnei Davida chu: “Aw ṭawngṭaina ngaithlatu, i hnênah tîsa zawng zawng chu an lo kal ang,” tiin a ṭawngṭai a ni. (Sâm 65:2) A nih leh, Pathian ngaihthlâksak ni tûr leh a malsâwmnate dawng tûrin engtin nge kan ṭawngṭai theih?

Mi mala i ṭawngṭaina chuan i rilru vei zâwng dik tak sawi chhuak a, ‘i thinlung chu Pathian hmâa leihbaw’ tûrin a ṭanpui thei che a. (Sâm 62:8) Engkimtitheia chuan tih tak zeta ṭawngṭaina chu a ngaihlu a ni.

Pathian chuan nihna tam tak nei mah se, hming bil erawh pakhat chauh a nei a. Ani chuan: “Kei Jehova ka ni,” tiin a sawi. (Exodus 6:2) Jehova tih hming chu a tîra ziak Bible-ah chuan vawi 7,000 vêl a chuang a. Zâwlnei tam tak chuan Pathian chu a mi mal hmingin an ko ṭhîn a ni. Abrahama chuan: ‘Aw, LALPA [Jehova, NW] thinur suh ang che, ka han sawi leh teh ang,’ tiin a sawi a. (Genesis 18:30) Keini pawhin, kan ṭawngṭai hunah Pathian hming Jehova chu kan lam tûr a ni.

Eng ṭawng pawh hmang mah ila, Pathian chuan kan ngaihtuahnate leh kan rilru vei zâwngte chu a hre thiam a. A Thu, Bible chuan: “Pathianin mi duhsak bîk a nei lo tih dik takin ka hria e; nimahsela, hnam tin zîngah tu pawh amah ṭiha fel taka ti apiang a lâwm zâwng mi an ni ṭhîn,” tiin min hrilh a ni.—Tirhkohte 10:34, 35.

Mahse, Pathian malsâwmna dawng tûr chuan, ṭawngṭai mai aia tam kan tih a ngai a. A dawta thuziakah chûng kan tih ngaite chu sawiho a ni ang.