Mi ṭhenkhat chuan Pathian Thu chu thlâk danglam a nih leh nih loh an ngaihtuah a. Zâwlnei Isaia chuan Pathian Thu chu “chatuanin a awm reng ang,” tiin a sawi a ni. (Isaia 40:8) Pathian thutiamte chu thlâk danglam a ni lo tih engtin nge kan chian theih?

Pathian chuan A Thu vawng reng tûr leh tihchhiatna laka vênghim tûrin thiltihtheihna a nei a. Hmân lai chuan, kuta lehkha ziah chhâwn a nih hian, fîmkhur taka ziak chhâwngtute chuan lehkha thianghlim chu belh chhah emaw, thlâk danglam emaw, a nih loh leh hmaih emaw a nih loh nân thu mal tinte chu an chhiar ṭhîn a. Mahse, mihringte chu ṭha famkim lo an nih avângin, ziak chhâwngtu ṭhenkhat chuan sawi tham loh ziah sualte an nei a ni.

Hmân lai kutziak Lehkhabu Thianghlim tam tak a la awm a. Chûng zînga pakhat chu chhe têa a danglam a nih pawhin, thu dik hriat nân a dangte nên kan khaikhin thei a ni.—Hriat belh nân, “Has the Bible Been Changed or Tampered With?” tih thuziak chu jw.org-ah en ang che.

Entîr nân, Arab hnam chi khat bedouin-hovin kum 1947-a Tuipui Thi kiang pûka an hmuh chhuah, Tuipui Thi Lehkha Zial tia koh hmân lai lehkha pawimawh hi han ngaihtuah ta ila. Chûng lehkha ziakahte chuan tûn hma kum sâng hnih kal taa ziah Pathian Lehkha Thu-a thu ṭhenkhat a chuang a ni. Mi thiamte chuan chûng hmân lai kutziakte chu tûn laia kan neih Lehkhabu Thianghlim nên an khaikhin a ni. Eng nge an hmuh chhuah?

Mi thiamte chuan tûn laia kan neih Pathian Thu-a thute chu a tîra thuziakte nên a inang tih an hmu chhuak a ni. * Hmân lai kutziak lehkhabute ngun taka endikna chuan Pathian Lehkhabu Thianghlima kan thu chhiarte chu a tîra Pathian thuchahte nên a inang tih a nemnghet a. Chuvângin, Pathianin tûn laiah kan tân A Lehkhabu Thianghlim chu fing takin a vawng ṭha tlat tih kan chiang thei a ni.

Chuvângin, Pathian Thu chu rinhlelhna nei lovin kan chhiar thei a, thlâk danglam a ni lo tih kan ring nghet tlat thei a ni. Chûngte chu rilrua dahin, a zâwlneite hnên aṭanga Pathian chungchâng kan zir theihte chu i lo bih chiang leh ang u.